Üläufalei

Üläufalei
Верхний Уфалей

Lidnanznam	Flag
Valdkund	Venäma
Eläjiden lugu (2020)	26,716 ristitud
Pind	65 km²
Pämez'	Sergei Tarasov (viluku 2021—)
Telefonkod	+7−35 164-xx-xxx
Avtokod	74, 174
Aigvö	UTC+5 (MSK+2)

Üläufalei (ven.: Ве́рхний Уфале́й, tot.: Югары Өфәле, bašk.: Үрге Өпәле (Үрге Өпәйле, Үрге Өфәле)) om Venäman lidn Čeläbinskan agjan pohjoižes. Se om Üläufalein lidnümbrikon administrativine keskuz.

Istorii

Eländpunktan aluz om pandud vl 1761 kuti žilo Üläufalein kaugedraudan da raudan tegimenno (ven.: Верхне-Уфалейский завод). Nimitihe sijadusen Ufaleik-jogel mödhe. Radnikžilo sai lidnan statusad vn 1940 26. päiväl sulakud. Järed nikelintegim radoi lidnas vll 1933−2017 sijaližel torhudel, pästi nikelid i kobal'tad, mašiništ om konservacijas.

Üläufalei šingotase mašinansauvomižen edheotandoil (metallurgine mašiništ, avtokomponentad, tesauvondan mašinad), akkumulätoriden tegimel, mramoran samižel da ümbriradmižel, raudten edheotandoil (vedimdepo i vagondepo), mugažo mectegimišton edheotandad i leibäntegim ratas lidnas.

Geografijan andmused

Lidn sijadase Keskuralan Ufalein mägisel'gan päivnouzmaižil pautkil, Ufaleik-jogen randal (bašk.: Өпәле 70 km pitte, Kaman hurapol'ne bassein). Üläufalein uit (2 km²) levigandeb lidnan pohjoižpalas. Matkad Sverdlovskan agjahasai om 17 km pohjoižhe orhal, Čeläbinskhasai om 124 km päivnouzmha orhal, 149 km avtotel vai raudtel. Lähembaižed lidnad oma Snežinsk päivnouzmha, Kasli, Ozörsk i Kištim suvipäivnouzmha, Näzepetrovsk päivlaskmha, Polevskoi (Sverdlovskan agj) pohjoižhe.

«Čeläbinsk — Jekaterinburg»-raudte läbitab lidnan päivnouzmašt palad vspäi 1896, Üläufalei-stancii radab sil.

Alaufalei-žilo (2443 rist. vl 2010), Čeremšank-žilo (1025 rist. vl 2010), völ 8 žilod, 2 žilod raudtestancijanno, 1 külä i 1 futor mülüdas lidnümbrikho Üläufalein ližaks. Lidnümbrikon pind — 1613,08 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 30 481 ristitud, lidnümbrikon — 35 006 ristitud. Kaikiš suremb lidnan ristitišt oli 36..40 tuhad eläjid vll 1959−1998 (40 tuh. rist. vl 1967 i 40 061 rist. vl 1989). Vl 2017 kaik 27 879 ristitud elihe lidnas i 31 769 ristitud kaikes lidnümbrikos.

Rahvahad (2010): venälaižed — 85,6%, totarlaižed — 6,0%, baškiralaižed — 5,2%, toižed rahvahad — 3,2%.

Professionaližen opendusen aluzkund om Kaslin tegimištoliž-gumanitarižen tehnikuman Üläufalein filial.

Edeline lidnümbrikon pämez' om Vera Uskova (kül'mku 2015 — viluku 2021).

Galerei

• 
  Pühän Jumalanmaman Sündundan jumalanpert', vn 2018 nägu
• 
  «Ufaleinikel'»-tegim vl 2018
• 
  Mramorkar'jer vl 2006
• 
  Lidnan keskuzline läžundkodi (2014)
• 
  Üläufalei-päraudtestancijan sauvuz vl 2018

Irdkosketused

• Lidnümbrikon oficialine sait (ufaleyadmin.ru). (ven.)