Änine (jogi)

Sil sanal voib olda toižid znamoičendoid; miše nähta niid, tulgat tänna.

Änižjogi Severoonežskas

Änižjogen bassein

Änine, Änine-jogi vai Änižjogi (ven.: Онега) om Venäman jogi Arhangel'skan agjan päivlaskmas.

Ümbrikirjutand

Jogen piduz om 416 km, basseinan pind om 56 900 km². Keskmäine vedhuz jogensus om 505 m³/s. Änižjogi lähteb Lač-järvespäi 118 m ü.m.t., lankteb Vauktha merhe (Änižlaht). Jogen sistem i Änine-järven bassein ei kosketagoi toine tošt, ka tedomehed ezimeletadas, miše pojavad nimed libudas erištadud parallelišpäi.

Randad oma korktahkod, kazvahtunuded mecal. Om luhtoid keskjoksmuses. Jogi jagase kahteks hijamaks 75 kilometras jogensuspäi: hura Pen' Änine 21 km pitte i oiged Sur' Änine 33 km pitte, sar' niiden keskes om läz 50 km² pindal. Jogensus Änine jagase Dvinan i Karjalan hijamikš, Kii-sar' om niiden keskes. Znamasižed ližajoged oma Vološk, Moš, Kodin, Mudjug, Nel'nüg, Vongud (oiktad), Ken, Iks, Kož, Pon'g (hurad).

Jogen vezi om lumen augotižlibundanke tobjimalaz. Vedhuz reguliruiše joginiškan i ližajogiden järvil. Sur'vezi oleskeleb semendkus-kezakus. Jogi jädub redukun lopus — tal'vkun augotišes, kos'kil vilukus-uhokus; sulab sulakun keskes — semendkus.

Kävutand

Änine-jogi om kos'kekaz, ottas laivjogeks joginiškas (kuz' kilometrad) i jogensuspäi (30 km). Ende kävutihe vuigonkan täht. Kargopol'-lidn sijadase joginiškanno, Severoonežsk-žilo seižub keskjoksmuses, Oneg-lidn om jogensunno. Lidnad oma mecan ümbriradmižen keskused.

Sadas lohed i navagad jogensus.

Sildad

Kaik om nell' sildad Änižes päliči: avtotesildad Kargopoliš i Sorokinskai-küläs, raudte- da avtotesild Oksovskii- i Severoonežsk-žiloiden keskes, raudtesild Arhangel'sk — Belomorsk-keskustal alajoksmuses.

Ehtatimed ühtenzoittas jogen randoid toižiš eländpunktoiš navigacijan aigan.