علی ابن زینب

علی ابن زینب
معلومات شخصیت
مقام پیدائش	مکہ
تاریخ وفات	630ء کی دہائی
والد	ابوالعاص
والدہ	زینب بنت محمد
بہن/بھائی	امامہ بنت زینب

آپ کا اسم گرامی علی اور لقب سبط الرسول تھا۔ آپ ابو العاص بن ربیع اور زینب بنت محمد رسول اللہ کے صاحبزادے اور امامہ بنت ابی العاص کے بھائی تھے۔

سلسلہ نسب

والد ماجد کی جانب سے سلسلہ نسب یہ ہے

• ابو العاص (لقیط) بن ربیع بن عبد العزی بن عبد شمس بن عبد مناف

والدہ ماجدہ کی جانب سے سلسلہ نسب یہ ہے

• زینب بن محمد رسول اللہ بن عبد اللہ بن عبد المطلب بن ہاشم بن عبد مناف

پیدائش

آپ ہجرت مدینہ سے قبل مکہ مکرمہ میں پیدا ہوئے تھے۔

رضاعت

بنی غاضرہ کے قبیلے میں آپ نے دودھ پیا تھا۔

رسول اللہ کے زیر کفالت

رضاعت کی مدت پوری ہونے کے بعد رسول اللہ صلی اللہ علیہ وآلہ وسلم نے اپنے نواسے کو اپنے زیر کفالت لے لیا تھا کیونکہ ان کے باپ ابو العاص بن ربیع اس وقت مکہ میں مقیم تھے اور اسلام قبول نہیں کیا تھا۔ رسول اللہ نے فرمایا جو شریک ہو میری اولاد میں تو مجھ کو اس پر اس سے زیادہ حق ہے (یعنی میری دختری اولاد پر ان کے والد سے زیادہ مجھ کو اختیار ہے) اور جو کافر کسی مسلمان کا کسی چیز میں شریک ہو تو مسلمان اس سے زیادہ کا حقدار ہے۔ ابو العاص بن ربیع جب غزوہ بدر میں گرفتار ہوئے تو اس شرط پر رہا ہوئے کہ وہ اپنی بیوی کو مدینہ بھیج دیے گا چنانچہ اس نے رہائی کے بعد زینب بنت رسول اللہ اور اس کے دونوں بچوں (علی بن ابو العاص اور امامہ بنت ابو العاص) کو بھی ساتھ بھیج دیا۔ رسول اللہ صلی اللہ علیہ وآلہ وسلم نے اپنے نواسے کی تربیت اور پرورش خود فرمائی۔

ہم رکاب رسول

الاستیعاب فی معرفة الاصحاب میں ہے

• رسول اللہ صلی اللہ علیہ وآلہ وسلم نے فتح مکہ کے روز اپنی سواری پر علی بن ابو العاص کو اپنے پیچھے سوار کیا تھا ، رسول اللہ صلی اللہ علیہ وآلہ وسلم مکہ میں داخل ہوئے اور علی بن ابو العاص آپ کے ردیف تھے۔

وفات

علی بن ابو العاص نے رسول اللہ کی زندگی ہی میں بلوغت کے قریب پہنچ کر وفات پائی۔ البتہ ابن عساکر نے بعض اہل علم کا قول نقل کیا ہے کہ جنگ یرموک کے موقع پر شہید ہوئے۔ علامہ اقبال نے اپنی نظم 'جنگ یرموک' میں جس نوجوان کو خراج تحسین پیش کی ہے وہ علی زینبی رض ہی ہیں۔ اللہ کے رسول صلی اللہ علیہ وآلہ وسلم نے فتح مکہ کے وقت کعبہ کے بڑے بتوں کو توڑنے کے لیے علی زینبی رض کو اپنے کندھے پہ بٹھایا تھا اور انھوں نے کلہاڑی کی مدد سے ان بتوں پہ ضرب لگائی تھی۔ صحیح بخاری کی حدیث عن اسامہ بن زید میں ہے:

• ہم نبی صلی اللہ علیہ وآلہ وسلم کی خدمت میں تھے کہ حضور کی ایک لڑکی کا خادم آیا کہ وہ حضور کو بلا رہی ہیں اور ان کا فرزند بستر موت پر ہے۔ فرمایا جاؤ لڑکی سے کہہ دو اللہ ہی کا ہے جو کچھ وہ واپس لیتا ہے یا عطا کرتا ہے اور اس کے ہاں ہر چیز کا وقت مقرر ہے۔ لڑکی سے یہ بھی کہہ دینا کہ صبر و شکیب قائم رکھے۔ خادم پھر واپس آیا، کہا وہ حضور کو قسم دیتی ہیں کہ حضور ضرور تشریف لائیں۔ نبی کریم چل پڑے۔ حضور کے ساتھ سعد بن عبادہ اور معاذ بن جبل بھی تھے۔ حضور کو بچہ دکھایا گیا وہ اس وقت سانس توڑ رہا تھا اور سسکیاں بھر رہا تھا۔

غالباً یہ حدیث علی بن ابو العاص سبط الرسول ہی کی وفات کے متعلق ہے۔