Uzbakistan

Tagduda n Uzbakistan tga yat tmazirt d yuckan ɣ Wasya tanammast tdru iwtta d kkuẓt tmizar yaḍnin ad tnt igan d Kazaxistan da illan ɣ iẓẓlmḍ nns d Tadjikistan da illan ɣ usammr nns, d Ufɣanistan da illan ɣ iffus nns, d Tukrmanistan da tt isɣummrn sɣ utaram nns, tawwaṭfa n takust nns tga 477.000 km², zdɣn gis yan 35.648.000 n mddn (Sf ussiḍn n 2022) da sawalnin tutlayt Tawzbikt, amaka nnsn gan imuslmn isunniyn f illa iḍiṣ n tɣarast Taṣufiyt tili daɣ ɣ dɣinn yat tdrsi n imsiwln s Trusiyt tlla ka ɣ tɣrmiwin, taggat n ayt uzbakistan ddrn ɣ umaḍal asunan.

Tafrawt n Frgana da idunkln s waman n wasif n Sir Darya a ɣ tlla tẓnagt n Tcqnḍ d tamaẓunt n tɣrmt ad da yaggugn taẓnagt n Zirabcan ɣ llant tɣrmiwin n Samaraqand d Buxara.

Izdma iqaṛiḍn n tmazirt gan tn Sum uzbik d yan udrim n Lmɣrib rad iḍṛ s ma d yaẓn i 1270 n Sum uzbik.

Amzruy

Amzruy aqbur

Akal n Uzbakistan n dɣ ass ad imcacka d ma illan ḍaṛat n wasif n Uksus da tt inn ikkan yan wul ikkatn n umzruy n Wasya tanammast, kkant tt inn gis kra n tqbilin tiraniyn zganin ɣ kṛaḍt tẓnagin n tɣrma n zikk, Xawarizm d Baktryan d Sugdyan, yili iɣrɣr nns yan watig acku tucka d tmazirt ad ɣ uɣaras n umṭṭalfu, maccan tssn yan mnnaw n wazzaɣn n ijakan n Iturkiyn d Imnɣuln d kkanin iẓẓlmḍ.

Snat tɣrmiwin ad igan tugga f izmaz n wurɣ n Uzbikstan: Buxara da tt inn ikkan tga tamaẓunt n Isamanidn, yat tgldit Tafarsiyt n tasut tis 10, d Samarqand da issudr Timur lang sɣ iɣd dffr n dɣ aylli as iskr Jinkiz Xan.