Figu (Ficus carica) de sa Familia Moracee. Arvuree e fruttu. S'agatat sa figu areste (crabufigu) e sa figu cultivada in ortos, chi produet fruttos chi si mandigant. S'arvure vivet a longu. Su truncu de s'arvure est russu si s'arvure est betza, pagu altu e tendet a si dividere in diversos rattos. Sas fozas sunu largas. Sa linna non balet. Sos ramos si benint segados catzana unu latte. Su fruttu est gustosu e podedt essere de colore biancu o nieddu. Madurat in duas o tres boltas a segunnu de sa variedade, a finis de lampadas coghet su crabione, a finis de austu sa segunda incunza e si s'annada est bona un'atera incunza in santuaine. Si consumat frisca o cando est unu pagu sicca (sa cariga); de s'una e de s'atera s'ind agatat in commerciu. Su fruttu est unu pagu modde cando est maduru, cun d'una corza issa puru modde. Su fruttu est impreadu puru po faghere marmellata.
In Sardigna agatat su clima sou ideale pro s'isviluppare, in ue bi nd'ada de divescias calidades, de sas cales, caliguna: figu alba de mannale, figu calaridana ruja, figu niedda, figu cana, figu cariga, figu buldasciotta, figu mattalona, figu pasatina, figu milinzana, figu buttada, figu de tres vias, etc.
