ᱤᱸᱫᱤᱨᱟ ᱜᱟᱹᱱᱫᱷᱤ
ᱢᱟ.ᱱᱤᱡ ᱤᱸᱫᱤᱨᱟ ᱜᱟᱱᱫᱷᱤ ᱫᱚ ᱥᱤᱧᱚᱛ ᱨᱟᱡᱽᱼᱟ.ᱨᱤ ᱫᱩᱱᱤᱭᱟ. ᱨᱤᱱᱤᱡ ᱥᱮᱨᱢᱟ ᱨᱮ ᱡᱩᱞᱩᱜ ᱪᱟᱸᱫᱚ ᱞᱮᱠᱟ ᱾ ᱵᱚᱝᱥᱚ ᱨᱮᱭᱟᱜ ᱨᱤᱛ ᱞᱮᱠᱟᱛᱮ ᱱᱮᱦᱨᱩ ᱜᱷᱟᱨᱚᱸᱡᱽ ᱥᱤᱧᱚᱛᱤᱭᱟ. ᱨᱟᱡᱽ-ᱟ.ᱨᱤ ᱨᱮ ᱡᱟᱦᱟᱸ ᱞᱮᱠᱟ ᱟᱠᱚ ᱛᱮ ᱟᱠᱚ ᱠᱚ ᱟᱞᱟᱭ ᱫᱟᱲᱮᱭᱟᱜᱼᱟ, ᱚᱱᱠᱟᱱ ᱪᱤᱛᱟ.ᱨ ᱫᱚ ᱯᱟᱞᱮ ᱯᱩᱨᱟ. ᱫᱷᱟ.ᱨᱛᱤ ᱨᱮ ᱟ.ᱰᱤ ᱠᱟ.ᱡ ᱜᱮ ᱧᱮᱞᱚᱜᱼᱟ ᱾ ᱯᱨᱤᱭᱚᱫᱚᱨᱥᱤᱱᱤ ᱤᱸᱫᱤᱨᱟ ᱥᱤᱧᱚᱛᱤᱭᱟ. ᱨᱟᱡᱽ-ᱟ.ᱨᱤ ᱨᱮ ᱡᱟᱦᱟᱸ ᱞᱟᱯᱷᱟᱝ ᱴᱷᱟᱶ ᱮ ᱟᱢᱮᱴ ᱟᱠᱟᱜᱼᱟ, ᱚᱱᱟ ᱠᱷᱟ.ᱛᱤᱨ ᱥᱤᱧᱚᱛ ᱱᱟᱜᱟᱢ ᱨᱮ ᱟᱡᱟᱜ ᱧᱩᱛᱩᱢ ᱥᱚᱱᱟ ᱪᱤᱠᱤ ᱛᱮ ᱚᱞ-ᱛᱚᱞ ᱠᱟᱛᱮ ᱛᱟᱦᱮᱸᱱᱟ ᱾ ᱠᱩᱲᱤ ᱦᱚᱯᱚᱱ ᱫᱚ ᱠᱷᱟ.ᱞᱤ ᱢᱤᱫ ᱜᱷᱟᱨᱚᱸᱡᱽ ᱨᱮ ᱮᱨᱟ ᱥᱮ ᱵᱟ.ᱦᱩ ᱥᱩᱢᱩᱝ ᱫᱚ ᱵᱟᱝ, ᱩᱱᱤ ᱦᱚᱸ ᱢᱤᱫ ᱥᱟᱶᱛᱟ ᱥᱩᱥᱟ.ᱨᱤᱭᱟ., ᱜᱟᱭᱟᱱᱤᱭᱟ. ᱟᱨ ᱫᱤᱥᱚᱢ ᱨᱮ ᱥᱟᱥᱚᱱ ᱪᱟ.ᱞᱩᱭ ᱦᱚᱲ ᱮ ᱦᱩᱭ ᱫᱟᱲᱮᱭᱟᱜᱼᱟ ᱾ ᱱᱚᱶᱟ ᱨᱮᱭᱟᱜ ᱡᱩᱞᱩᱜ ᱠᱟᱱ ᱥᱟ.ᱠᱷᱤ ᱫᱚ ᱢᱟ.ᱱᱤᱡ ᱤᱸᱫᱤᱨᱟ ᱜᱟᱱᱫᱷᱤ ᱠᱟᱱᱟᱭ ᱾
ᱡᱟᱱᱟᱢ ᱟᱨ ᱜᱤᱫᱽᱨᱟ. ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱤᱸᱫᱤᱨᱟ ᱯᱨᱤᱭᱚᱫᱚᱨᱥᱤᱱᱤ ᱫᱚ ᱑᱙᱑᱗ ᱥᱟᱞ ᱱᱚᱵᱷᱮᱢᱵᱚᱨ ᱵᱚᱸᱜᱟ ᱑᱙ ᱢᱟᱺᱦᱤᱛ ᱦᱤᱞᱚᱜ ᱮ ᱡᱟᱱᱟᱢ ᱞᱮᱱᱟ ᱾ ᱩᱱᱤ ᱫᱚ ᱥᱤᱧᱚᱛ ᱨᱤᱱᱤᱡ ᱯᱩᱭᱞᱩ ᱢᱟᱨᱟᱝ ᱢᱚᱱᱛᱨᱤ (Prime Minister ) ᱡᱚᱵᱟᱦᱚᱨᱞᱟᱞ ᱱᱮᱦᱨᱩ ᱟᱨ ᱢᱟ.ᱱᱤᱡ ᱠᱚᱢᱲᱟ ᱱᱮᱦᱨᱩ ᱛᱤᱠᱤᱱᱤᱡ ᱮᱠᱞᱟ ᱦᱚᱯᱚᱱ ᱮᱨᱟ ᱠᱟᱱᱟᱭ ᱾
ᱩᱱ ᱡᱚᱦᱚᱜ ᱥᱤᱧᱚᱛ ᱯᱷᱩᱨᱜᱟ.ᱞ ᱢᱤᱪᱷᱤᱞ ᱨᱮᱭᱟᱜ ᱟᱺᱜᱤᱵᱷᱟᱨ ᱫᱚ ᱢᱚᱦᱟᱛᱢᱟ ᱜᱟᱱᱫᱷᱤᱭ ᱟᱯᱱᱟᱨ ᱟᱠᱟᱫ ᱛᱟᱦᱮᱸᱱ ᱾ ᱛᱤᱱ ᱡᱚᱦᱚᱜ ᱤᱸᱫᱤᱨᱟ ᱦᱟᱜ ᱡᱟᱱᱟᱢ ᱴᱷᱟᱶ ᱵᱟ.ᱠᱷᱩᱞ ᱨᱮ ᱯᱷᱩᱨᱜᱟ.ᱞ ᱢᱤᱪᱷᱤᱞᱤᱭᱟ. ᱠᱚᱣᱟᱜ ᱧᱟᱯᱟᱢ ᱴᱷᱟᱶ ᱦᱩᱭ ᱮᱱᱟ, ᱢᱚᱦᱟᱛᱢᱟ ᱜᱟᱱᱫᱷᱤ ᱟᱨ ᱮᱴᱟᱜ ᱢᱟ.ᱱᱟᱱ ᱢᱚᱱᱛᱨᱤ ᱠᱚᱣᱟᱜ ᱚᱨᱥᱚᱝ ᱤᱸᱫᱤᱨᱟ ᱦᱟᱜ ᱡᱤᱭᱚᱱ ᱨᱮ ᱯᱟᱲᱟᱣᱮᱱᱟ ᱾ ᱜᱤᱫᱽᱨᱟ. ᱚᱠᱛᱚ ᱠᱷᱚᱱ ᱜᱮ ᱩᱱᱤ ᱫᱤᱥᱚᱢ ᱞᱟ.ᱜᱤᱫ ᱟᱡᱟᱜ ᱡᱤᱭᱚᱱ ᱮ ᱟᱞᱟᱭ ᱜᱚᱫ ᱠᱟᱫᱼᱟ ᱾
ᱟᱡᱟᱜ ᱯᱩᱭᱞᱩ ᱟᱨᱵᱟᱝ ᱜᱤᱫᱽᱨᱟ. ᱚᱠᱛᱚ ᱥᱮᱪᱮᱫ ᱫᱚ ᱥᱩᱣᱤᱡᱚᱨᱞᱟᱸᱰ ᱨᱮᱭᱟᱜ ᱢᱤᱫ ᱟᱥᱲᱟ ᱨᱮ ᱦᱩᱭᱩᱜ ᱠᱟᱱ ᱛᱟᱦᱮᱸᱫ ᱾ ᱟᱡᱤᱡ ᱡᱟᱱᱟᱢ ᱟᱭᱳ ᱠᱚᱢᱲᱟ ᱱᱮᱦᱨᱩᱣᱟᱜ ᱜᱩᱨ ᱦᱩᱭ ᱮᱱ ᱛᱟᱭᱚᱢ ᱩᱱᱤ ᱡᱟᱱᱟᱢ ᱫᱤᱥᱚᱢ ᱛᱮᱭ ᱨᱩᱣᱟ.ᱲ ᱦᱮᱡ ᱮᱱᱟ ᱾ ᱤᱱᱟ. ᱛᱟᱭᱚᱢ ᱩᱱᱤ ᱫᱚ ᱥᱮᱪᱮᱫ ᱞᱟ.ᱜᱤᱫ ᱥᱟᱱᱛᱤᱱᱤᱠᱮᱛᱚᱱ ᱮ ᱪᱟᱞᱟᱣ ᱮᱱᱟ | ᱚᱸᱰᱮ ᱛᱤᱱᱟ.ᱝ ᱫᱤᱱ ᱮ ᱛᱟᱦᱮᱸ ᱮᱱ ᱛᱟᱭᱚᱢ ᱤᱸᱜᱽᱞᱚᱸᱰ ᱨᱮᱭᱟᱜ ᱢᱤᱫ ᱧᱩᱛᱩᱢᱟᱱ ᱡᱮᱜᱮᱛ ᱵᱤᱨᱫᱟ.ᱜᱟᱲ ᱚᱠᱥᱯᱷᱚᱨᱰ (Oxford ) ᱨᱮ ᱵᱷᱤᱥᱮᱞᱮᱫ ᱮ ᱦᱟᱛᱟᱣ ᱠᱮᱜᱼᱟ ᱾ ᱢᱚᱦᱟᱛᱢᱟ ᱜᱟᱱᱫᱷᱤᱭᱟᱜ ᱵᱟᱝ-ᱥᱚᱦᱚᱫ (Non-cooperation) ᱢᱤᱪᱷᱤᱞ ᱨᱮ ᱥᱮᱞᱮᱫ ᱠᱟᱛᱮ ᱩᱱᱤ ᱑᱙᱒᱙ ᱥᱟᱞᱮᱨᱮ ᱜᱤᱫᱽᱨᱟ. ᱠᱚ ᱤᱫᱤ ᱠᱟᱛᱮ ᱤᱸᱜᱽᱨᱟ.ᱡᱽ ᱵᱤᱨᱩᱫᱷ ᱨᱮ "ᱦᱟ.ᱬᱩ ᱥᱮᱱᱟ" ᱭ ᱵᱮᱱᱟᱣ ᱠᱮᱜᱼᱟ ᱾ ᱛᱷᱟᱱᱟ ᱵᱟᱦᱨᱮ ᱨᱮ ᱦᱟ.ᱬᱩ ᱯᱷᱟ.ᱫᱽ ᱜᱟᱫᱮᱞ ᱞᱮᱠᱟ ᱜᱤᱫᱽᱨᱟ.ᱠᱚ ᱮᱱᱮᱡ ᱡᱚᱝ ᱮᱱᱮᱡ ᱡᱚᱝ ᱯᱩᱞᱤᱥ ᱠᱚᱣᱟᱜ ᱞᱮᱠᱟᱱᱼᱞᱮᱠᱟᱱ ᱯᱷᱟ.ᱥᱤᱭᱟ.ᱨ/ᱥᱚᱰᱚᱡᱚᱸᱛᱨᱚ ᱤᱫᱤ ᱠᱟᱛᱮ ᱢᱩᱠᱷᱤᱭᱟ. ᱠᱚ ᱞᱟ.ᱭ ᱥᱚᱫᱚᱨ ᱟᱠᱚ ᱠᱟᱱ ᱛᱟᱦᱮᱸᱱ ᱾
ᱥᱟᱱᱛᱤᱱᱤᱠᱮᱛᱚᱱ ᱨᱮ ᱯᱟᱲᱦᱟᱜᱣ ᱠᱟᱱ ᱵᱮᱲᱟᱨᱮ ᱩᱱᱤ ᱢᱚᱬᱤᱯᱩᱨᱤᱭᱟ. ᱮᱱᱮᱡ ᱥᱮᱫ ᱟ.ᱰᱤ ᱡᱩᱨ ᱮ ᱜᱚᱦᱚᱲ ᱞᱮᱱᱟ ᱾ ᱥᱮᱨᱮᱧ, ᱮᱱᱮᱡ ᱟᱨ ᱵᱟᱰᱚᱦᱤ ᱞᱟ.ᱜᱤᱫ ᱟ.ᱰᱤ ᱜᱟᱺᱦᱤᱨ ᱨᱟ.ᱥᱠᱟ. ᱛᱟᱦᱮᱸ ᱠᱟᱱ ᱛᱟᱭᱟ ᱾
ᱵᱟᱯᱞᱟ ᱟᱨ ᱨᱟᱡᱽᱼᱟ.ᱨᱤ ᱡᱤᱭᱚᱱ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]ᱤᱸᱫᱤᱨᱟ ᱜᱟᱱᱫᱷᱤ ᱫᱚ ᱑᱙᱔᱑ ᱥᱟᱞᱮᱨᱮ ᱯᱷᱤᱨᱚᱡᱽ ᱜᱟᱱᱫᱷᱤ ᱴᱷᱮᱱ ᱠᱚ ᱜᱚᱝ ᱠᱟᱫᱮᱭᱟ ᱾ ᱯᱷᱤᱨᱚᱡᱽ ᱫᱚ ᱢᱤᱫ ᱛᱩᱲᱩᱠ/ᱢᱩᱥᱞᱤᱢ ᱮ ᱛᱟᱦᱮᱸ ᱠᱟᱱᱟ ᱾ ᱦᱤᱱᱫᱩ ᱵᱤᱨᱚᱫᱷᱤ ᱠᱟᱱ ᱠᱷᱟ.ᱛᱤᱨ ᱮ ᱢᱟᱬᱟᱝ ᱫᱚ ᱟᱡ ᱵᱟᱵᱟ ᱡᱚᱵᱟᱦᱚᱨᱞᱟᱞ ᱤᱸᱫᱤᱨᱟ ᱢᱟᱱᱟᱭᱮ ᱠᱟᱱ ᱛᱟᱦᱮᱸᱱ ᱾ ᱤᱠᱷᱟ.ᱱ ᱢᱚᱦᱟᱛᱢᱟ ᱜᱟᱱᱫᱷᱤ ᱯᱷᱤᱨᱚᱡᱽ ᱫᱚ ᱟᱡᱤᱡ ᱦᱚᱯᱚᱱ ᱞᱮᱠᱟᱭ ᱟᱯᱱᱟᱨ ᱠᱮᱫᱮ ᱛᱟᱭᱚᱢ ᱟᱨ ᱥᱟᱶᱛᱟᱨᱤ ᱮᱴᱠᱮᱴᱚᱬᱮ ᱵᱟᱝ ᱡᱟᱱᱟᱢ ᱞᱮᱱᱟ ᱾ ᱡᱟᱶᱟᱭ ᱠᱟᱛᱮ ᱩᱱᱤ ᱫᱚ ᱟᱡᱤᱡ ᱡᱤᱛᱟ. ᱥᱟᱶ ᱞᱚᱠᱷᱱᱚᱣ ᱨᱮᱠᱤᱱ ᱵᱟᱥᱟ ᱵᱚᱥᱠᱚᱫ ᱮᱱᱟ ᱾ ᱑᱙᱔᱒ ᱥᱟᱞᱮᱨᱮ ᱢᱚᱦᱟᱛᱢᱟ ᱜᱟᱱᱫᱷᱤᱭᱟᱜ ᱫᱩᱼᱫᱮᱞᱟ ᱛᱮ ᱥᱤᱧᱚᱛ ᱵᱟ.ᱜᱤ (Quit India) ᱢᱤᱪᱷᱤᱞ ᱨᱮ ᱩᱱᱤ ᱫᱚ ᱫᱚᱱ ᱟᱬᱜᱚ ᱠᱟᱛᱮᱭ ᱥᱮᱞᱮᱫ ᱮᱱᱟ ᱾ ᱡᱟᱦᱟᱸ ᱠᱷᱟ.ᱛᱤᱨ ᱩᱱᱤ ᱯᱩᱨᱟ. ᱜᱮᱞᱯᱮ ᱵᱚᱸᱜᱟ ᱚᱠᱛᱚ ᱩᱛᱟ.ᱨ ᱡᱤᱦᱚᱞ ᱨᱮ ᱡᱤᱭᱚᱱ ᱠᱷᱮᱢᱟᱣ ᱦᱩᱭ ᱟᱫᱮᱭᱟ ᱾
᱑᱙᱔᱗ ᱥᱟᱞ ᱚᱜᱚᱥᱴ ᱑᱕ ᱢᱟᱺᱦᱤᱛ ᱦᱤᱞᱚᱜ ᱫᱤᱥᱚᱢ ᱯᱷᱩᱨᱜᱟ.ᱞ ᱮᱱᱟ ᱟᱨ ᱡᱚᱵᱟᱦᱚᱨᱞᱟᱞ ᱱᱮᱦᱨᱩ ᱵᱷᱟᱨᱚᱛ ᱨᱤᱱᱤᱡ ᱯᱩᱭᱞᱩ ᱢᱟᱨᱟᱝ ᱢᱚᱱᱛᱨᱤ (Prime minister ) ᱞᱮᱠᱟᱛᱮ ᱟᱺᱜᱤᱵᱷᱟᱨ ᱮ ᱟᱯᱱᱟᱨ ᱠᱮᱜᱼᱟ ᱾ ᱤᱱᱟ. ᱦᱤᱞᱚᱜ ᱠᱷᱚᱱ ᱩᱱᱤ, ᱟᱡ ᱵᱟᱵᱟ ᱥᱟᱶ ᱞᱮᱛᱟᱲ ᱛᱟᱦᱮᱸ ᱠᱟᱛᱮ ᱟᱡ ᱛᱮᱜᱮ ᱨᱟᱡᱽᱼᱟ.ᱨᱤ ᱨᱮ ᱫᱟᱣ ᱦᱟᱛᱟᱣ ᱨᱮᱭ ᱠᱩᱨᱩᱢᱩᱴᱩ ᱠᱮᱜᱼᱟ ᱾ ᱟᱡ ᱵᱟᱵᱟ ᱥᱟᱞᱟᱜ ᱵᱟᱦᱨᱮ ᱫᱤᱥᱚᱢ ᱥᱟᱝᱜᱷᱟᱨ ᱠᱟᱛᱮ ᱵᱷᱮᱜᱟᱨᱼᱵᱷᱮᱜᱟᱨ ᱫᱤᱥᱚᱢ ᱨᱮᱭᱟᱜ ᱨᱟᱡᱽᱼᱟ.ᱨᱤ ᱟᱨ ᱞᱟ.ᱭ-ᱞᱟᱠᱪᱟᱨ ᱚᱱᱟ ᱥᱟᱶᱛᱮ ᱵᱤᱫᱮᱥᱤᱭᱟ. ᱨᱤᱛ ᱪᱮᱛᱟᱱ ᱨᱮ ᱜᱮᱭᱟᱱ ᱮ ᱟᱨᱡᱟᱣ ᱠᱮᱜᱼᱟ ᱾
᱑᱙᱕᱕ ᱥᱟᱞᱮᱨᱮ ᱩᱱᱤ ᱫᱚ ᱠᱚᱝᱜᱨᱮᱥ ᱠᱩᱢᱩᱴ ᱜᱟᱶᱛᱟ ᱨᱮᱭ ᱥᱮᱞᱮᱫ ᱞᱮᱱᱟ ᱾ ᱯᱩᱱ ᱥᱮᱨᱢᱟ ᱛᱟᱭᱚᱢ ᱩᱱᱤ ᱠᱚᱸᱜᱨᱮᱥ ᱥᱚᱵᱷᱟᱯᱚᱛᱤ ᱨᱩᱯᱨᱮ ᱢᱟ.ᱱ ᱢᱟ.ᱪᱤᱭ ᱥᱟᱡᱟᱣ ᱥᱚᱵᱷᱟ ᱞᱮᱜᱼᱟ ᱾ ᱱᱚᱶᱟ ᱵᱷᱤᱛᱨᱤ ᱨᱮ ᱟᱡᱟᱜ ᱛᱤ ᱨᱮᱭᱟᱜ ᱫᱚᱠᱷᱚᱞ ᱫᱟᱨᱟᱭ ᱛᱮ ᱜᱩᱡᱽᱨᱟᱴ, ᱢᱚᱦᱟᱨᱟᱥᱴᱨᱚ ᱵᱤᱵᱟ.ᱫᱽ ᱥᱟᱶᱛᱮ ᱠᱮᱨᱚᱲ ᱨᱮᱭᱟᱜ ᱵᱟᱝ ᱛᱷᱚᱭ ᱨᱟᱡᱽᱼᱟ.ᱨᱤᱭᱟ. ᱚᱵᱚᱥᱛᱟᱭ ᱥᱚᱞᱦᱮ ᱫᱟᱲᱮᱭᱟᱫ ᱛᱟᱦᱮᱸᱫ ᱾
᱑᱙᱖᱐ ᱥᱟᱞᱮᱨᱮ ᱯᱷᱤᱨᱚᱡᱽ ᱟᱜ ᱡᱤᱣᱤᱵᱟ.ᱛᱤ ᱡᱟᱭᱡᱩᱜᱽ ᱞᱟ.ᱜᱤᱫ ᱤᱬᱤᱡ ᱥᱟ.ᱨᱤ ᱮᱱᱟ ᱾ᱥᱚᱶᱛᱟᱨᱤ ᱟᱨ ᱫᱤᱥᱚᱢ ᱦᱤᱛ ᱞᱟ.ᱜᱤᱫ ᱠᱟ.ᱢᱤ ᱨᱮ ᱩᱱᱤ ᱟᱡ ᱛᱮᱫ ᱡᱩᱲᱟ.ᱭ ᱫᱚᱦᱚ ᱠᱟᱛᱮ ᱢᱚᱱᱮ ᱡᱤᱣᱤᱨᱮ ᱱᱤᱥᱛᱟ.ᱨ ᱟᱢᱮᱴ ᱡᱚᱝ ᱞᱟ.ᱜᱤᱫ ᱠᱩᱨᱩᱢᱩᱴᱩ ᱟᱠᱟᱭ ᱛᱟᱦᱮᱸ ᱮᱱᱟ ᱾
᱑᱙᱖᱔ ᱥᱟᱞᱮᱨᱮ ᱵᱟᱵᱟ ᱡᱚᱵᱟᱦᱚᱨᱞᱟᱞ ᱟᱜ ᱜᱩᱨ ᱜᱷᱚᱴᱚᱱ ᱟᱡᱟᱜ ᱡᱤᱭᱚᱱ ᱨᱮ ᱫᱩᱠᱷᱟ.ᱞᱤ ᱜᱟᱨ ᱨᱮᱭᱟᱜ ᱜᱟᱺᱦᱤᱨ ᱚᱨᱥᱚᱝ ᱯᱟᱲᱟᱣ ᱮᱱᱟ ᱾ ᱤᱱᱟ. ᱛᱟᱭᱚᱢ ᱞᱟᱞᱵᱟᱦᱟᱫᱩᱨ ᱥᱟᱥᱛᱨᱤ ᱭᱟᱜ ᱢᱚᱱᱛᱨᱤ ᱡᱷᱩᱲ (cabinet) ᱨᱮ ᱟᱡ ᱫᱚ ᱵᱮᱣᱨᱟ (information) ᱟᱨ ᱦᱚᱲ ᱥᱟ.ᱜᱟ.ᱭ ᱵᱤᱵᱷᱟᱜᱽ ᱨᱮ ᱢᱚᱱᱛᱨᱤ ᱯᱚᱫᱽ ᱨᱮᱭᱟᱜ ᱫᱟᱣ ᱮ ᱟᱯᱱᱟᱨ ᱠᱮᱜᱼᱟ ᱾
ᱢᱟᱨᱟᱝ ᱢᱚᱱᱛᱨᱤ ᱟᱨ ᱫᱤᱥᱚᱢ ᱦᱤᱛ ᱞᱟ.ᱜᱤᱫ ᱠᱟ.ᱢᱤ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]᱑᱙᱖᱗ ᱥᱟᱞᱮᱨᱮ ᱞᱟᱞᱵᱟᱦᱟᱫᱩᱨ ᱟᱜ ᱜᱩᱨ ᱦᱩᱭ ᱮᱱ ᱫᱟᱨᱟᱭ ᱛᱮ ᱠᱚᱸᱜᱨᱮᱥ ᱜᱟᱫᱮᱞ ᱨᱮ ᱢᱟᱨᱟᱝ ᱢᱚᱱᱛᱨᱤ ᱯᱚᱫᱽ ᱞᱟ.ᱜᱤᱫ ᱟ.ᱰᱤ ᱞᱮᱠᱟᱱ ᱮᱴᱠᱮᱴᱚᱬᱮ ᱡᱟᱱᱟᱢ ᱮᱱᱟ ᱾ ᱢᱩᱪᱟ.ᱫ ᱨᱮ ᱢᱟ.ᱱᱤᱡ ᱜᱟᱱᱫᱷᱤ ᱭᱟᱜ ᱵᱤᱱ ᱦᱮᱯᱨᱟᱣ ᱛᱮᱜᱮ ᱵᱟᱪᱷᱚᱱ ᱦᱩᱭ ᱞᱮᱱᱟ ᱟᱨ ᱩᱱᱤ ᱥᱤᱧᱚᱛ ᱨᱤᱱᱤᱡ ᱢᱟᱨᱟᱝ ᱢᱚᱱᱛᱨᱤ ᱞᱮᱠᱟᱛᱮ ᱟᱺᱜᱤᱵᱷᱟᱨ ᱮ ᱟᱯᱱᱟᱨ ᱞᱮᱜᱼᱟ ᱾
ᱱᱚᱶᱟ ᱛᱟᱭᱚᱢ ᱫᱮᱥᱼᱵᱤᱫᱮᱥ ᱨᱮ ᱟᱡᱟᱜ ᱧᱩᱛᱩᱢ ᱯᱟᱥᱱᱟᱣ ᱮᱱᱟ ᱾ ᱑᱙᱖᱗ ᱵᱟᱪᱷᱚᱱ ᱛᱟᱭᱚᱢ ᱩᱱᱤ ᱟᱨ ᱢᱤᱫ ᱫᱷᱟᱣ ᱠᱚᱸᱜᱨᱮᱥ ᱫᱚᱞ ᱟᱡᱟᱜ ᱧᱮᱞ ᱡᱚᱛᱚᱱ ᱨᱮ ᱦᱩᱭᱩᱜ ᱞᱟ.ᱜᱤᱫ ᱮ ᱟᱯᱱᱟᱨ ᱠᱮᱜᱼᱟ ᱾ ᱱᱚᱶᱟ ᱚᱠᱛᱚᱨᱮ ᱡᱟᱛᱤᱥᱚᱝᱜᱷᱚ ᱨᱮᱭᱟᱜ ᱢᱤᱫ ᱥᱮᱱᱮᱞᱮᱫ ᱨᱮ ᱜᱟᱞᱚᱪ ᱮᱢ ᱠᱟᱛᱮ ᱜᱚᱨᱚᱵᱽ ᱨᱮᱭᱚᱜ ᱴᱷᱟᱶ ᱮ ᱟᱢᱮᱴ ᱞᱮᱜᱼᱟ ᱾ ᱫᱷᱟ.ᱨᱛᱤ ᱨᱮ ᱥᱟ.ᱱᱛᱤ ᱟᱨ ᱱᱤᱥᱛᱟ.ᱨ ᱟ.ᱜᱩᱭ ᱠᱟ.ᱢᱤᱨᱮ ᱟᱡᱟᱜ ᱴᱷᱟᱶ ᱫᱚ ᱥᱟᱨᱦᱟᱣ ᱟᱱᱟᱜ ᱠᱟᱱᱟ ᱾
᱑᱙᱗᱑ ᱥᱟᱞᱨᱮ ᱦᱚᱸ ᱥᱟᱫᱷᱟᱨᱚᱱ ᱵᱟᱪᱷᱚᱱ ᱴᱷᱟ.ᱣᱠᱟ. ᱥᱟᱯᱲᱟᱣ ᱮᱱᱟ ᱾ ᱟᱡᱟᱜ ᱧᱮᱞ ᱡᱚᱛᱚᱱᱨᱮ ᱠᱚᱸᱜᱨᱮᱥ ᱟ.ᱰᱤ ᱵᱟ.ᱲᱛᱤ ᱮᱞᱮᱞ ᱨᱮ ᱡᱤᱛᱠᱟ.ᱨ ᱮ ᱟᱢᱮᱴ ᱠᱮᱜᱼᱟ ᱾ ᱡᱟᱦᱟᱸ ᱫᱟᱨᱟᱭ ᱛᱮ ᱑᱙᱗᱗ ᱥᱟᱞ ᱫᱷᱟ.ᱵᱤᱡ ᱢᱟᱨᱟᱝ ᱢᱚᱱᱛᱨᱤ ᱭᱟᱜ ᱢᱟ.ᱱ ᱯᱚᱫᱽᱨᱮ ᱴᱷᱟᱶ ᱮ ᱟᱢᱮᱴ ᱠᱮᱜᱼᱟ ᱾ᱟᱡᱟᱜ ᱠᱟ.ᱢᱤ/ᱟᱺᱜᱤᱵᱷᱟᱨ ᱠᱚ ᱧᱮᱞ ᱠᱟᱛᱮ ᱟ.ᱰᱤ ᱵᱟ.ᱲᱛᱤ ᱠᱩᱥᱤᱭ ᱟ.ᱭᱠᱟ.ᱣ ᱠᱮᱫ ᱠᱷᱟ.ᱛᱤᱨ ᱟ.ᱰᱤ ᱩᱥᱟ.ᱨᱟ ᱜᱮ ᱫᱤᱥᱚᱢ ᱜᱚᱢᱠᱮ ᱵᱷᱤᱼᱵᱷᱤ ᱜᱤᱨᱤ ᱫᱚ ᱩᱱᱤ "ᱵᱷᱟᱨᱚᱛ ᱨᱚᱛᱱᱚ" ᱥᱤᱨᱯᱷᱟ.ᱛᱮ ᱥᱟᱡᱟᱣ ᱠᱟᱛᱮ ᱢᱟ.ᱱ ᱮ ᱪᱟᱞ ᱟᱫᱮᱭᱟ ᱾
ᱱᱟᱜᱟ, ᱵᱤᱦᱟᱨ, ᱟᱥᱟᱢ ᱠᱚᱨᱮᱱᱟᱜ ᱮᱴᱠᱮᱴᱚᱬᱮ ᱥᱟᱶᱼᱥᱟᱶ ᱛᱮ ᱵᱮᱸᱠ ᱟᱨ ᱵᱟᱸᱜᱽᱞᱟ ᱫᱤᱥᱚᱢ ᱠᱚᱨᱮᱱᱟᱜ ᱟ.ᱰᱤ ᱠᱩᱴᱷᱤᱱ ᱮᱴᱠᱮᱴᱚᱬᱮ ᱠᱚᱦᱚᱸ ᱟ.ᱰᱤ ᱱᱟᱯᱟᱭ ᱛᱮᱭ ᱥᱚᱞᱦᱮ ᱫᱟᱲᱮᱭᱟᱫ ᱛᱟᱦᱮᱸᱱ ᱾ ᱫᱤᱥᱚᱢ ᱵᱷᱤᱛᱨᱤ ᱨᱮᱭᱟᱜ ᱦᱟᱞᱚᱛ ᱟ.ᱰᱤ ᱜᱮ ᱵᱟ.ᱲᱤᱡ ᱮᱱ ᱠᱷᱟ.ᱛᱤᱨ ᱩᱱᱤ ᱑᱙᱗᱕ ᱥᱟᱞᱮᱨᱮ ᱞᱟ.ᱠᱛᱤᱭᱟᱱᱟᱜ (emergency) ᱯᱚᱨᱤᱥᱛᱤᱛᱤᱭ ᱡᱟ.ᱨᱤ ᱠᱮᱜᱼᱟ ᱾ ᱱᱤᱭᱟ. ᱚᱠᱛᱚ ᱵᱷᱤᱛᱨᱤ ᱨᱮ ᱫᱤᱥᱚᱢ ᱨᱮᱭᱟᱜ ᱞᱮᱠᱟᱱᱼᱞᱮᱠᱟᱱ ᱩᱛᱱᱟ.ᱣ ᱦᱩᱭ ᱟᱠᱟᱱ ᱛᱟᱦᱮᱸᱱ ᱾ ᱤᱠᱷᱟ.ᱱ ᱞᱟ.ᱠᱛᱤᱜ ᱠᱟᱱ ᱚᱠᱛᱚ ᱨᱮᱭᱟᱜ ᱫᱟᱣ ᱦᱟᱛᱟᱣ ᱠᱟᱛᱮ ᱟ.ᱰᱤ ᱦᱚᱲ ᱞᱮᱠᱟᱱ-ᱞᱮᱠᱟᱱ ᱵᱟ.ᱲᱤᱡ ᱵᱮᱵᱷᱟᱨ ᱠᱚ ᱥᱚᱫᱚᱨ ᱠᱮᱜ-ᱟ | ᱡᱟᱦᱟ ᱠᱷᱟ.ᱛᱤᱨ ᱩᱱᱤᱭ ᱢᱟ.ᱱᱦᱟ.ᱱᱤ ᱮᱱᱟ | ᱱᱚᱝᱠᱟ ᱛᱮ ᱑᱙᱘᱔ ᱚᱠᱴᱚᱵᱚᱨ ᱓᱑ ᱢᱟ:ᱦᱤᱛ ᱦᱤᱞᱚᱜ ᱵᱟ.ᱭᱨᱤ ᱩᱱᱤ ᱫᱚ ᱵᱟ:ᱫᱩᱠ ᱜᱩᱞᱤ ᱛᱮᱠᱚ ᱜᱷᱟ.ᱞ ᱵᱷᱤᱱᱫᱟ.ᱲ ᱠᱮᱫᱮᱭᱟ | ᱱᱤᱛᱚᱜ ᱟᱡ ᱫᱚ ᱟᱵᱚ ᱥᱟᱶ ᱨᱮ ᱵᱟ.ᱱᱩᱜ ᱮ ᱨᱮᱦᱚ' ᱟᱡᱟᱜ ᱠᱟ.ᱢᱤ ᱟᱨ ᱧᱩᱛᱩᱢ ᱫᱚ ᱱᱚᱶᱟ ᱫᱷᱟ.ᱨᱛᱤ ᱨᱮ ᱡᱟᱭᱡᱩᱜ ᱡᱤᱭᱟ.ᱲ ᱛᱟᱦᱮᱱᱟ |
ᱵᱟᱨᱦᱮ ᱡᱚᱱᱚᱲ
[ᱥᱟᱯᱲᱟᱣ | ᱯᱷᱮᱰᱟᱛ ᱥᱟᱯᱲᱟᱣ]- Rare pictures of Indira Gandhi Archived ᱒᱐᱑᱑-᱐᱒-᱑᱒ at the Wayback Machine.
- Rare letters by Indira Gandhi
- Famous and Historic speeches given by Indira Gandhi
- website of Indira gandhi