Chittagong
Chittagong (bengal: চট্টগ্রাম, Caṭṭagrām, Chattagram) è ina citad dal Bangladesch. Cun 2'123'709 abitants en la citad sezza e 3'672'366 en l'aglomeraziun (1. da schaner 2005) è ella la segund pli gronda citad dal pajais, suenter la chapitala Dhaka ed avant Khulna. Chittagong è la chapitala d'in district e d'ina divisiun da medem num.
Geografia
[modifitgar | modifitgar il code]Chittagong giascha en il sidost dal pajais ed è circumdà da palmas, collinas verdas e flums.
Clima
[modifitgar | modifitgar il code]Las temperaturas varieschan tranter 19 °C il schaner e 28 °C il matg. La stad èsi da quintar cun precipitaziuns autas.
Economia
[modifitgar | modifitgar il code]
Chittagong è in center d'economia cun grond'impurtanza per il pajais. La citad è ina zona economica speziala ed i exista in'interpresa d'atschal, raffinarias da petroli, construcziun da navs sco era las industrias da cement, textilias e tgirom dal pajais. Chittagong ha il pli grond port da mar dal Bangladesch, ch'è responsabel per ina considerabla part dal commerzi internaziunal. Ils plazzals da demoliziun enturn Chittagong appartegnan als centers da l'industria da demoliziun da navs dal mund.
Sco consequenza da la creschientscha economica rapida patescha la citad d'ina contaminaziun da smog fitg auta.
Ina part considerabla dals abitants lavura en las fabricas da textilias.
Istorgia
[modifitgar | modifitgar il code]A partir dal 9aval tschientaner appartegneva Chittagong al Reginavel d'Arakan, dapi il 1666 a Bengala ed il 1760 è ella vegnida cedida als Englais.
Da Pasca 1930 èsi vegnì tar la Revolta da Chittagong, ina da las pli grondas revoltas cunter il domini colonial britannic. Sut la guida da Surya Sen han ins assaglì duas casernas.
Il december 2010 hai dà a Chittagong confruntaziuns violentas tranter lavurers da l'industria da textilias e forzas da segirtad. Latiers èn trais persunas mortas e 185 vegnidas blessadas. Ils protests èn ruts ora perquai ch'intgins interpresas n'èn betg sa tegnidas vi da la paja minimala legala.
Populaziun
[modifitgar | modifitgar il code]En la regiun metropolitana da Chittagong vivan 3,7 milliuns persunas. L'islam è la religiun la pli derasada. 84 pertschient da la populaziun èn muslims, 14 pertschient èn hindus e 2 pertschient professeschan il budissem theravada.
Attracziuns
[modifitgar | modifitgar il code]En la regiun datti bleras moscheas e blers minarets.
Persunalitads
[modifitgar | modifitgar il code]- Muhammad Yunus (* 1940), econom e purtader dal Premi Nobel per la pasch
Colliaziuns
[modifitgar | modifitgar il code]
Commons: Chittagong – Collecziun da maletgs, videos e datotecas d'audio- In film documentar davart Chittagong (per tudestg)