William Webb Ellis

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

William Webb Ellis a l'era nassù a Salford (davzin a Manchester) ai 24 ëd novèmber dël 1806 e a l'é mòrt a Menton, an Fransa, ai 24 ëd gené dël 1872. A l'é sotrà ant ël campossanto dël vej castel ëd Menton.

Dal 1816 al 1822 a l'ha studià a la Rugby School ëd Rugby. A l'ha peui studià a l'università d'Oxford, prima dë dventé n'òm ëd cesa: a l'é stàit resior ëd vàire cese anglican-e, a Londra e a Essex.

L'invension dël rugby

As conta che, dël 1823, cand ch'a l'era në student, durant na partìa ëd fótbal, Ellis a l'abia pijà la bala an man e a sia butasse a core fin al fond dël camp. Parèj... a l'avrìa inventà 'l gieugh dël rugby!
Costa a l'é, press che sicur, na legenda, ma William Webb Ellis a l'é passà a la stòria coma l'inventor del rugby e la copa ch'as dà a la squadra ch'a vagna ël campionà dël mond (Rugby World Cup) a porta sò nòm.

La placa

A la "Rugby School" ëd Rugby a l'han butà na placa për arcordé l' "exploit" ëd William Webb Ellis:

THIS STONE

COMMEMORATES THE EXPLOIT OF

WILLIAM WEBB ELLIS

WHO WITH A FINE DISREGARD FOR THE RULES OF FOOTBALL

AS PLAYED IN HIS TIME

FIRST TOOK THE BALL IN HIS ARMS AND RAN WITH IT

THUS ORIGINATING THE DISTINCTIVE FEATURE OF

THE RUGBY GAME

A.D. 1823