1. FC Kaiserslautern

Es Fritz-Walter-Štadion ufm Betze, wu die roode Daiwel špiele

1. FC Kaiserslautern
Fakde
Gegrind om	2. Juni 1900
Špitznome	FCK, Betze, Roode Daiwel
Adress	Fritz-Walter-Straße 1 67663 Kaiserslautern Tel.: +49 - 631 - 31 88-0 Fax: +49 - 631 - 31 88-290
Vorstandsvorsitzender	Tobias Frey
Midglieder	ca. 29000 (2024)
Veroinsfaawe	Rood un Waiß
Fußballabdäälung
Liga	2. Bundesliga
Bundeslichasaisons	1963-1996, 1997-2006, 2010-12
Stadion	Fritz-Walter-Stadion (49.327 Plätz)
Daitscher Mäschder	1951, 1953, 1991, 1998
Daitsche Bokalsiecher	1990, 1996
Subberkappsiecher	1991
Inderned
Indanedsaid	www.fck.de
e-mail Adress	[email protected]

De 1. FC Kaiserslautern (korz: 1. FCK orra FCK; Spitznåme: Di roode Daiwel, De Betze) is e Spordveroi aus Lautre, wo voa allem dorch soi Fußballabdäälung in Daitschlond bekånnd iss.

Di Profifußballer spielen said de Säsong 2022/2023 werre in de 2. Bundeslicha un g'heeren mid vier Daitsche Mäschderschafte un zwää DFB-Pokalsieche zu de erfolchraischde Månnschafde im gånze Lånd.

Allg'määnes

De FCK iss agduell uffm achde Platz in de ewisch Tabell vun de Bundeslicha. De Veroi had momendåån mee wie 29000 Midglieder (Stånd April 2024). Näwer de Fußballabdäälung unnahalld de 1. FC Kaiserslautern aa Abdäälunge fär ånre Spordaade wie Basketball, Boxe, Håndball, Hoggey, Laichdadledig un Triadlonn.

Innanationale Erfolche vum Veroi waan unna ånrem es Äraiche vum Verdelfinale in de Champions-League 1999 un di zwäämolisch Dailnååm åm UEFA-Pokal-Halbfinal. Ämolisch iss, dass de FCK in de Säsong 1997/1998 as Uffstaier di daidsch Mäschderschaft gewunn had. Es Stadion vum Veroi iss es Fritz-Walter-Stadion in Lautre. Bennend iss es Stadion noom FCK-Spieler un Kabidän vun de DFB-Nationalelf, wo 1954 de Weldmäschdertiddel gewunn had. Es Stadion laid im Stadddääl Betzenberg. Uffgrund vun em ähmolische Stadionnåme "Stadion auf dem Betzenberg" un soina Laach wern es Stadion un äwefalls de Veroi rechionaal "Betze" genennd.

De FCK iss de änzisch Profiveroi aus de Palz. No de Mäschderschafd 1998 iss es sellemols spordlich immer waider nunnagång, bis de FCK dånn 2006 in die zwädd Bundeslicha abg'stie iss. Jezad, anno Mai 2010, hadder no vier Joor in de zwädde Licha endlich werre de Uffstiech in di erschd Bundeslicha g'schaffd un spield in de Säsong 2010/11 werre gää de Bazi, de Schwowe un die gånze Ruhrpottler.

Des iss de Veroi, in dämm de Fritz Walter, Kapitän vun de Weldmäschder 1954, erschder Ehrespielfierer vunnde daidsch Nationalmånnschafd un ähnzischda Ehrebircher vun Rhailand-Pallds, g'spield had. Domols hän finfe vum Betze in de Daidsch Nationalelf g'spield. De FCK waa långe Zait es Fußball-Aushänge-Schild vum Siedweschde.

Ståmmbååm

De 1. FC Kaiserslautern (bis 1932 FV Phönix Kaiserslautern) iss åm 28. Mai 1929 ausm Zåmmeschluss vum SV Phönix 1910 Kaiserslautern unnem FV 1900 Kaiserslautern ennstånn. De FV 1900 Kaiserslautern iss åm 1. März 1909 aus de Veroine FC 1900 Kaiserslautern, FC Palatia 1901 Kaiserslautern un FC Bavaria 1902 Kaiserslautern ennstånn. De FC 1900 Kaiserslautern werrerum åm 2. Juni 1900 dorch de Zåmmeschluss vum FC Germania 1896 Kaiserslautern un vun de FG 1899 Kaiserslautern.

G'schicht

Gaulicha (1933-1945)

Zwää Joor noom Wirreruffstiech in di Bezirgslicha had sich de FCK 1933 as Zwädder fär di Gaulicha qualifizierd. No zwää Joor iss de Veroi awwa werre in di Bezirkslicha abg'stie. Im Joor 1937 iss de FCK werre in de Gaulicha serick kumm, awwa iss im selle Joor widda abg'stie. 1939 iss em Veroi dånn werre de Wirreruffstiech in di Gaulicha Siedwescht gelung. Vun 1939 bis 1944 iss dånn de Spielbetrieb in de Gaulicha ing'stelld worr. 1942 had de FCK di Mäschderschafd im Gau Weschtmark gewunn. In de Endrunn um die daidsch Mäschderschafd iss de Veroi awwa gää Schalke 04 mid 3:9 im Achdelfinal geschaidad. Im letschde Kriechsjoor had de FCK e Spielgemäänschafd mim VfR Kaiserslautern gebild, is awwa nimmi zu Pflichdspiele õõgeträäd.

Owwerlicha (1945-1963)

In de Owwerlicha Siedwescht wah de FCK sellemols es Maß alla Dinge. In de erschde 13 Joor is de Veroi zehmo Mäschda worr un zwäämo Vizemäschda. Glaichzaidich hadda aa die Mäschderschaft in de Frånzeesich Besatzungszoon 1947 un 1948 gewunn. Im Joor 1948 wahn die Rode Daiwel es erschde Mol im Finale no de Sieche in de Endrunn gee 1860 Minche un de TuS Neuedorf. Es Finale had de Betze awwa 1:2 gee de 1 FC Nürnberch veloor un im Joor denoo is de Veroi Dridder worr. Åm 30. Juni 1951 is mer dånn zem erschde mo Daitscher Mäschder nohm Siech iwwa Preiße Minschder worr. Die zwädd Mäschderschaft had de Betze dånn im Joor 1953 mid em 4:1 gee de VfB Štuttgadd gewunn. Im Joor druff had mer awwa Iwwerraschend gee Hånnover 96 veloor. In de Weldmäschdermånnschafd vun de Schweiz 1954 hen glai 5 Špieler aus de Raihe vum Veroi midgešpeeld. Des wahn Fritz Walter, Ottmar Walter, Werner Liebrich, Horšt Eckel un Werner Kohlmeyer. Iwwrischens 4 devun in Lautre gebor, nor de Horšt Eckel štåmmd vun Vochelbach in de Näh vun de Štadt Lautre. Zem letschde Mol had mer dånn 1955 åm Endšpiel in de Daitsche Mäschderschafd dailgenumm, wo mer alladings gee Rod-Waiß-Esse mid 3:4 veloor had. Nohm Karriereend vun de 5 Lautrer Weltmäschder un ånre wichdische Špieler wah de Betze dånn nimmi so dominierend in de Owwerlicha Siedwescht. Erschdmols im Finale vum DFB-Bogal wah de FCK dånn im Joor 1961, wo de Veroi alladings gee Werder Bräme mid 0:2 de kerzere gezoo had. Im ledschde Joor voa de Infierung vun de Bundeslicha had mer dånn nochmols die Siedweschtmäschderschaft gehool.

Bundeslicha (1963-1996)

De FCK wah in de Saison änna vun de 16 Grindungsmidglieder vun de Bundeslicha un had die erschd Saison as Zwelfder abgeschloss. Åm 1. Juli wah de Fußballclub zem zwädde Mol im DFB-Bogal Final gee Schalke 04, awwa had widda veloor. 1972 had de Betze soi erschdes Europabogalšpiel bai Štoke City mid änna 3:1 Niederlach beštridd. Dorch de Siech im Riggšpiel vun 4:0 is de Veroi ins Verdelfinale kumm, wo mer alladings gee Borussia Menchegladbach veloor had. In de Joore 1976 un 1981 sin die Pälzer waidere zwää Mol ins Ennšpiel vum DFB-Bogal kumm, wo de FCK ernaid mid zwää Niederlache gee de Håmburcher SV un Eintracht Frångfurd vum Platz gång is. In de Bundeslichasaison 1979 hen die Rode Daiwel unna Trainer "Kalli" Feldkamp mim 3. Platz ehr beschdes Ergebnis bis dato erzield. In de Špielzaid 1979/1980 wahn die Lautra nor zwää Plätz vun de Abštiechsräng ennfernd, awwa no änner štargi Riggrunn widda uffm Dridde Platz. Die nägschde baide Saisons had de FCK jewails mim Platz 4 abgeschloss un sich fär de Europabogal qualifizierd. In de erschd Åmdszaid vum Trainer Feldkamp had de Veroi mim Inzuuch ins UEFA-Bogal Halbfinal, nohm Siech gee Real Madrid, soi bisherischer greeschder Erfolch gefaiad. Im Halbfinal had 1. FC Kaiserslautre dånn gee IFK Gedeborch veloor. De FCK is also zem Špitzeclub worr un had mim Kaaf vum Norbert Eilenfeldt soi erschda Millione-Trånsfär gedädichd. Rudi Kröner had die Trainerposition vun Feldkamp, no demm soi Weggong iwwernumm. Åm 21. März 1983 is de Trainer Kröner, dånn awwa widda endloss worr. De Trennungsgrund wah dorchaus omštritt, wail mer in 18 Špiele lediglisch zwää Špiele veloor had. De Noohfolcher vun Kröner wah de bisherische Co-Trainer Ernšt Diehl unna demm mer sich fär de UEFA-Cup qualifizierd had. In de Saison 1983/1984 wah es Saisonziel sich widda fär de Eurobabogal se qualifiziere un e långa Veblaib in de Pogale, was unnam neie Trainer Dietrich Weise aa widda gelung is. Doch trodz denne Erfolche is de FCK in demm Joor daidlich unna de Erwaadunge geblibb un de Trainer Weise had no änna Uflesung vun soinem Vetraach gebott. Unnam Noohfolcher Manfred Krafft is de Veroi awwa aa ned iwwa die voaherisch Platzierung vum zwölfde Platz hinauskumm. Un aa in de Folchejoore dånn unnam Trainer Hannes Bongartz ab 1985 hen die Rode Daiwel nor Plätz im Middelfeld beleed. As die Monnschafd 1987/1988 noh åm Abštiech wah, had mer de Trainer Sepp Štabel vepflichd unna demm die Reddung gelung is. Zwää Saisons špäda is de Betze awwa widda in Abštiechsgefaah kumm, doch wie de Trainer Karl-Heinz Feldkamp de vorherisch Trainer Gerd Roggensack abgelešt had, is de Klasseerhald ernaid gegliggd. Åm 19. Mai 1990 kunnde die Lautrer zum erschde Mol de DFB-Bogal in de Hänn halle, nodemm mer es Finale gee Werder Bräme mid 3:2 gewunn had. Im Joor druff is em FCK de Gewinn vun de dridd Mäschderschafd gelung. Zum Enn vun de Špielzaid had "Kalli" Feldkamp soi Engagement baim Veroi beend. Soi Noohfolcher war Trainer Rainer Zobel, mid demm die Månnschafd awwa 1992/1993 de Inzuuch in de UEFA-Bogal vebassd had un desse Vetraach widda ufgelešt worr is. Denoo is de FCK unnam naie Trainer Friedel Rausch widda ins Špitzefeld vun de Tabell kumm, un had 1994 de zwädde Platz hinna Bayern Minche erraichd. Doch wie zu de Saison 1995/1996, Ciriaco Sforza un Štefan Kuntz de Veroi veloss hen, is de Betze zem erschde Mol in die 2. Bundeslicha abgeštie. Im ledschde Špiel had de 1 FC Kaiserslautre e Siech gee Bayer Leverkuse gebrauchd. Nohm erschde Treffer vun Pavel Kuka zum 0:1, had die "Werkself" aus Leverkuse in de 82. Minudd de Ausglaich ärzield. De Zuschauer blaibd der Gehetreffer in beeser Erinnerung, da e FCK Špieler veletzt wah un de Bayer Špieler Paulo Sergio de Ball ned wie im Gesetz vum Fair Play serick zu em FCK Špieler geschmiss had, sunnern es ungeschribbne Gesetz missachd had un de Ball zem aichne Špieler geworf had. Im folchende Konder had dånn Markus Münch es Door fär Leverkuse geschoss, un de erschde Abštiech fär die Lautrer wah besicheld. Nor ä Woch denoo is de Monnschafd dånn de zwädde Siech vum DFB-Bogal im Finale gee de Kallsruher Špordclub mid 1:0 gelung.

Widdaufštiech un Mäschderschafd (1996-2000)

Nohm Abštiech in die 2. Liga is die Monnschafd im Kern zåmme geblibb. Es Präsidium om Norbert Thines is alladings serickgeträäd un de FCK had e naia Ufsichdsroot bekumm. Im Ufsichdroot vum Klub wahn nun Jürgen Friedrich (beraids 2 Mol Präsidend vum Veroi), Robert Wieschemann un Karl-Heinz Feldkamp. Des Weidere sin as naia Präsidend Hubert Keßler un as naia špordlicha Leida Hans-Peter Briegel vorgeštelld worr. Zwää Woche voam Saisonštadd is aa de Trainerposchde vum Eckhard Krautzun zem Otto Rehagel gewechseld worr. Im Europabogal vun de Bogalsiecher un im DFB-Bogal sin die Pälzer dånn glai in de erschde Runn rausgefloo. Doch in de 2. Bundeslicha is em Klub mid änna sensationelli Saison un nor 4 Niederlache de sofordisch Widdaufštiech als Mäschda vun de 2. Licha gegliggd. Es ledschde Špiel gee de SV Meppe štelld noch bis haid es doorraichschde Špiel vun de 2. Bundeslicha mid em Ennergebnis vun 7:6 doo. Ä Joor špäda is em FCK middem Gewinn vun de Mäschderschafd in de 1. Bundeslicha e Novum in de Fußballgeschichd gelung. De Klub wah bisher nämmlich de erschde un änziche Fußballveroi, der as Zwäddlichamäschder un Ufštaier aa noch glai Mäschder in de 1. Bundeslicha worr is. Genaa wie in de Voasaison sin aa nor 4 Špiele velor gång. In de folchende Špielzaid had de "Betze" in de Champions League es Verdelfinale un in de Licha de Rång 5 beleed. No de nohmhafde Naizugäng wie Youri Djorkaeff un Mario Basler had de FCK åm Enn vun de Saison 1999/2000 die Zielvorgaab indernational se špeele mim ernaide Inzuuch in de UEFA-Bogal erraichd. In de Špielzaid 2000/2001 is dånn de Trainer Otto Rehagel no em misslungene Saisonštadd serickgeträäd.

Abštorz un ernaida Abštiech (2000-2006)

Åm Enn vun de Ära Rehagel is de 1 FC Kaiserslautre in špordliche un aa finanzielle Schwierischkääde gerood, die sich dorch viele Fehlinkaafe erkläre geloss had. Unna ånrem dorch Špieler wie Taribo Wešt, Šteffen Freund, Chrištian Nerlinger, Carsten Jancker un Štefan Malz. Unnam Noohfolcher Andreas Brehme vum Voagänger Rehagel wah de športlich Erfolch noch korzfrisdisch werre verhånn. So wah de FCK im März 2001 im UEFA-Bogal-Halbfinal gee Deportivo Alaves, sowie aa uffm Tabelleplatz 3 in de Bundeslicha. Vun demm Zaidpungd õh is awwa de špordlich Abštorz vum Veroi erfolchd, der wenich špäda dorsch de bekånnd geworrne Finånzskandal om die Fierungsrieg vun de FCK-Veåndwordliche flånkierd worr is. Denoo is de FCK chancelos ausm UEFA-Bogal ausgeschied un had no em kataschdrophale Saisonfinal lediglisch de 8. Platz in de Tabell erraichd. Zem Uftagd vun de Saison 2001/2002 had dånn de Klub die erschde 7 Špiele hinnanånna gewunn un somid de Rekord vun Bayern Münche ingeštelld. Åm Saisonenn had mer dånn awwa nor Platz 7 beleed.

In de nohfolchende Špielzaid 2002/2003 wah de Veroi pragdisch schunn abgeštie un korz voa de Insolvenz, doch de Brehme-Noohfolcher Eric Gerets had de Fußballclub, no na sensationelle Riggrunn, werre in die Špur gebrung un de Klasseerhald noch vehinnad. E waidera Erfolg hads im Joor 2003 gebb, wie de FCK es DFB-Bogalfinal erraichd had, des alladings gee Bayern Münche mid 1:3 velor worr is. Finånziell kunnd de Veroi mid de Hilf vum FCK-Vorštandsvorsitzende Rene C. Jäggi waidgehend sånierd werre. Des is awwa aa nor mid em Štadionvekaaf vum voahär Veroinsaichene Štadion so guud gelung. In Saison 2003/2004 wah de 1. FC Kaiserslautre ernaid in Abštiechsnod.

Eric Gerets had denoo soi Štuhl fer de naie eschdraischiche Trainer Kurt Jara misse roome, där widdarum de Klasseerhald geschaffd had. No na solide Säsong 2004/2005, in där jedoch de uubeliebde Träner Jara endloss worr is, had die Månnschafd åm Enn de 12. Pladz beleed. In de Säsong 2005/2006 is uf de naie junge Träner Michael Henke gesetzd worr, där awwa wennich speder Ufgrund vun mångeldem Erfolch werre fer e naier Träner, de ehemalische FCK-Spieler Wolfgang Wolf, had waiche misse. Doch aa mim Wolf kunnd mer ned de Abstiech vehinnre, sodass de Betze in där Säsong zum zwädde Mol in soiner Veroingeschichd aus de Bunneslicha abgestie is. Åm ledschde Spieldaa vun där Säsong had es 2:2 Remis gee de diregde Konkurrend VfL Wolfsburch ned gelångd um die Klass se halle.

Vier Joore Zwäddklassischkääd (2006-2010)

Trodz em Abstiech hån sich innahalb vun zwää Monade iwwa 1.000 naie Midglieder oogemelld un so is die Midgliederzahl baim FCK erschd uf 11.100 oogehoob worr und dånn bis åm Enn vum November nochmo uf rund 11.500 waida oogestie. Die Säsong 2006/2007 is fer die Lautrer dennoch endaischend veloff. Trodz em 4. Rång in de Winderpaus mid nor 2 Pungde Riggstånd uf e Ufstiechspladz is mer åm Säsongend Sechsder worr, wäswee de Veroi de Träner Wolf noch in de Säsong endloss had un de bisherische Co-Träner Wolfgang Funkel die Månnschaft aus Lautre bis zum Säsongend iwwernumm had.

Unnam nai vepflichtede norwechische Träner Kjetil Rekdal hån die roode Daiwel in de Säsong 2007/2008 no de Riggrunn e Abstiechspladz beleed. Die 1:2 Niederlache gee 60 Minche åm 19. Spieldaa had dånn fer de Träner Rekdal Konsequenze gehadd, där Ufgrund vun de oodauernde spordliche Misserfolche vum Voastånd frai gestelld worr is. Bis zu de Vepflichdung vun soim Nofolcher Milan Sasic waa Alois Schwartz Interimsträner. Unnerm Milan Sasic is dånn e klänni Ufholjachd gelung, aa wann sich de Veroi bis zum vorledschde Spieldaa uffm Abstiechspladz befunn had. De FCK hat dann doch mid em 3:0 Siech, in em denkwirdische Heimspiel gee de 1. FC Köln de Klasseerhald uffm ledschde Drigger gepaggt. In de folschende Säsong mussd dann aa de Trainer Sasic, no schlechde Laischdunge un interne Querele, am 4. Mai gehe. Als Interimsträner wurd ernaid de Alois Schwartz oigestelld, mid demm die Mannschafd am End de 7. Platz beleed had.

Said em Summer 2009 is de Nohfolcher un agduelle Chefträner Marco Kurz baim FCK im Amd. Die Mannschafd dann unner ihm mim waiderkumme im DFB-Pogaal un zwä Sieche in die Säsong gestadded. Am 7. Spieldaa had de Betze dann die Tabellespitz iwwernumm un is midna guude Hinnrunn am End souverän Herbschdmäschder mit 39 Punkde worr. Aa in de Riggrunn is es weida so guud geloff un am 32. Spieldaa had ma erschdmols die Chance, sisch de vorzaidische Uffstiech zu sichre. Doch die erschd Mechlichkääd dezu im Hämspiel gee Hansa Rostock konnt die Mannschafd jedoch ned nutze un had 0:1 veloor. Zwää Daa speder sin die Roode Daiwel in Abwesenhaid dann doch noch ufgestie, wail de Tabelledridde FC Augsburg baim FSV Frankfurt ned iwwer e 1:1 rauskumm is. Erwähnenswerd debai is, dass hunnerde Lautrer Fans baim Spiel vum FSV Frankfurt midgeraisd waan, um die Frankfurter am Bornheimer Hang ze unnerstidze. Am ledschde Spieldaa gee de FC Augsburg, wurd zudääm vor 50.300 Zuschauer im Fritz-Walter-Stadion die Zwäddlichamäschderschafd fer de Betze klaa gemach.

Wirra in de Bunneslicha

No'm Uffstiech had de Betze die ausgeliehne Spiela Laischdungsträha wie de Sidney Sam un de Georges Mandjeck misse ziehe losse. Doorjäha Erik Jendrisek had de Veroi äwefalls veloss. Die Abgäng konnde waidesgehend ärsedzd werre, sodass de FCK mid 21 Punkde un em 12. Tabellepladz in die Winnapaus gång iss. E Zwischedief mid nor em Punkd aus siwwe Spiele iss iwwerwunn worr un posidiv had e 2:0 Erfolch gee Bayern Minche un e 5:0 gee de FC Schalke. Zum Beginn vun de Riggrunn iss mer dånn in e klänni Kries kumm (8 Spiele uhne Siech), wodorch die roode Daiwel uff e Abstiechspladz abgerutschd sinn. Aus de ledschde neu Säsongspiele had de Betze awwa noch 21 Punkde gehol un åm voaledschde Spieldaa de Klasseärhalld perfekd gemach had. Un åm End iss mer soga noch uff de siebde Platz kumm.

Die zwädd Säsong no'm Wirreruffstiech waa gepräjd dorch Brobläme in de Offensive. Känna vun de Stiermer Itay Shechter, Dorge Kouemaha, Richard Sukuta-Pasu un de ab'm Winna veplichd Sandro Wagner konnde die Ärwaddunge erfille un de no Wolfsburch gewechselde Srdjan Lakic ärsedze. Nodemm im Säsongvelaaf 16 Spieldaa åm Stigg kä Siech mäh gefaiad werre konnd un die Månnschafd uff de ledschde Tabellepladz abgerutschd waa, had de FCK die Trennung vum Chefträner Marco Kurz un Co-Träner Günther Gorenzel bekånnd gebb. Åm 22. März 2012 had mer de naie Träner Krassimir Balakov veplichd. Die Õzahl vun siechlose Spiele had sisch dånn bis uff 21 waida erheed un åm End had de Betze als erschda Abstaija vun de Säsong 2011/2012 feschdgestånn. Åm 18. Mai iss de Träner Balakov endloss worr, wall mer in de 2. Bunneslicha e Naistadd begeh wolld. Beraids no 5 Daa iss de Franco Foda as naia Träner voagestelld worr.

Erfolche

Daitsche Mäschder (4) : 1951, 1953, 1991, 1998
Daitsche Vizemäschder (4) : 1948, 1954, 1955, 1994
Zwäddlichamäschder (2) : 1997, 2010
Daitsche Bokalsiecher (2) : 1990, 1996
Daitsche Vizebokalsiecher (6) : 1961, 1972, 1976, 1981, 2003, 2024
Daitsche Subberkappsiecher (1) : 1991
Daitsche Hallepokalsiecher (1) : 1997
Siedweštdaitsche Mäschder (12) : 1947, 1948, 1949, 1950, 1951, 1952, 1953, 1954, 1955, 1956, 1957, 1963
Weschtkrääsmäschder (1) : 1909
Weschtmarkmäschder (1) : 1942
Monnschafd vum Johr (2): 1991, 1998

Links

FCK.de
De Betze brennt: E Kommunidie-Soit iwwer de Betze