Neustadt an der Weinstraße

Neischdadt

Neischdadt (uff deitsch "Neustadt an der Weinstraße") is e kreisfreii Schdadt mit ugfähr 54000 Oiwohner. Neischdadt is eichendlisch die Hauptschdadt vun de Palz - ach wann dess viele net so gärn hären - und hot frier ach de Sitz vun de Bezirksregierung g'hadt.

Geografische Ohgawe

Neischdadt lischd geografisch so zimlisch in de Midt vun de Palz direkt an de Woischdross (im Neischdadter Ortsdel Diedesfeld is de Midlpunkt vun re markierd). Neischdadt lischt am Haardtrand, also am estlische Rand vum Pälzerwald, do wu dann die Roiewene afangt.

Dursch Neischdadt fließt de Speyerbach, där delt sisch dort uff in Speyerbach un Rehbach. Ausserdem is noch de Muschbach zu nenne, där dursch Gimmeldinge, Lobloch u. Muschbach fließt un denooch in de Rehbach noi.

Im Weste g'hert a Stick vum Pälzerwald zu Neischdadt un im Oste an Del vum Ordenswald. Die wischdigschde Bärsche vum neischdadter Del vum Pälzerwald sinn de Nolle, de Känigsbärsch, 's Woibiet u. de Stawebärsch. Zwische de Ortdele sinn iwweral Wingert zu finne, und gesche Oste ach emol e glä bissl Ackerfeld.

Oidelung

Neischdadt beschdet aus de eichendlische Schdadt (die "Inneschdadt"), mehrere Stadtvärdl, die direkt angebaut sin: die Hambacher Heh, 's Afrigavärdl, 's Schändal un Winzinge. Dodezu kummen dann noch mehrere Ortsdele, die erschd 1969 oigemoindet worre sin: Diedesfeld, Duttweiler (erschd 1974), Goise, Gimmeldinge, Haardt, Hambach, Känigsbach, Lache-Speyerdorf und Muschbach.

Verkehr

Neischdadt is de hegschdfrequendierde Eisebahnknodepunkt vun de Palz. Die Hauptschdreck vunn Mannem noch Paris verlaaft in Ost-West-Rischdung dursch Neischdadt. Noch Siede gibts a Streck noch Karlsruh bzw. Strossbursch un noch Norde Rischdung Därkem un Grieschdadt. Neischdadt hot momendan 3 Bahnhäf: Hauptbahnhof, Bewisch un Muschbach.

Neischdadt lischd an de Audobahn A65 und an de Bundesstrosse B38, B39 un B271.

In Speyerdorf is ausserdem en gläne Fluchblatz.

Die wischdigschde iwwerregionale Radwesche dursch Neischdadt sinn:

de Woischdroßeradwesch
de Kraut-un-Riewe-Radwesch
de Radwesch noch Speyer durch de Ordenswald

Außerdem gibt's noch de Radwesch Rund ums Woibiet.

Feschde

In Neischdadt werd's wischdigschde Woifeschdt vun Deitschland g'feiert: 's Deitsche Woifeschdt (uff deitsch "Deutsches Weinlesefest"). Dann gibts in jedem Orstdel jedi Meng Kerwe, Woifeschde etc. iwwers Johr vedält. Außerdem a paar Sportveranstaldunge vun iwweregionaler Bedeidung, wie Triathlon u. Mountainbike-Renne.

Wischdische Glänischkeide

Die Oiwohner vun Neischdadt häßen "Neischdadter" un net "Neischdädter". Genauso häßt 's dann ach Neischdadter Dal.

Webseide

De Seid vun de Stadtverwaldung (in Deitsch)
De Seid vum Fremdeverkehrsamt (in Deitsch)