John Merryweather
| Pais di nashonalidat | Reino Hulandes  |
|---|---|
| Nòmber den idioma propio | John Merryweather |
| Nòmber di nasementu | John William Merryweather |
| Nòmber di dilanti | John, William |
| Fam | Merryweather |
| Fecha di nasementu | 25 mei 1932 |
| Lugá di nasementu | Aruba |
| Fecha di fayesimentu | 24 sèptèmber 2019 |
| Dominio di idioma | Hulandes |
| Okupashon | politiko |
| Funshon | minister plenipotenciario di Aruba |
| A studia na | Loughborough University |
| Lugá di trabou | Den Haag |
| Partido polítiko | Partido Patriotico Arubano |
| Distinshon | Kabayero den Orden di Oranje-Nassau |
John William Merryweather (☆ 25 di mei 1932 na Aruba - † 24 di september 2019 na Aruba) tabata un politico Arubano y e prome persona nombra como minister plenipotenciario di Aruba na Den Haag. Alaves e tabata e prome representante di Aruba den Conseho di Minister di Reino Hulandes.
Biografia
[editá | editá fuente]John Merryweather, yiu di un tata Britanico y mama Arubiano, a bishita scol secundario na Jamaica y Reino Uni. El a studia na Universidad di Loughborough na Reino Uni y despues na Merca, unda el a specialisa den arkitectura panoramico.[1]
Su carera a cuminsa na 1952 cu un funcion den sector petrolero. For di 1961 te cu 1975 e tabata hefe di plantsoendienst di Dienst Openbare Werken (DOW) na Aruba y Corsou. Na 1974 el a bay traha como coordinador di proyectonan special pa Conseho Ehecutivo di Aruba. For di 1978 el a bira miembro di staff di Oficina di Turismo di Aruba y despues a drenta servicio di gobierno pa bay traha na Antillenhuis na Den Haag.
Na 1983 el a uni su mes na Partido Patriotico Arubano (PPA) y a fungi como secretario-general di e partido for di 1983 pa 1984. Despues di eleccion insular dia 29 di april 1983 el a bira miembro di Conseho Insular pa PPA, pero dia 14 di mei 1984 a tuma retiro. Entrante status aparte di Aruba, prome di januari 1986, Aruba a haya su mesun representacion oficial na Den Haag, aparte di Antillenhuis. Den formacion di e prome Gabinete Henny Eman a nombra Merryweather, den nomber di PPA, den e puesto di minister plenipotenciario. Dia 13 di januari, 1986 el a huramenta dilanti gobernador Felipe Tromp. Apesar cu na januari, 1987 e Gobierno no tabatin confiansa mas den e minister di PPA, Benny Nisbet, John Merryweather a keda den e funcion cu sosten di Partido di Pueblo Arubano (AVP).[2]
Despues cu su periodo como minister plenipotenciario a finalisa na 1989, el a keda nombra como Hefe di “Arubaans Verkeersbureau” na Europa cu su oficina na Arubahuis. Den e eleccion di 1989 el a uni su mes na partido nobo Partido Patriotico Nacional (PPN) como e ultimo candidato riba lista.[3] Despues di algun aña el a bolbe Aruba.
Merryweather tabata socialmente activo y tabata conoci como organisador. Entre 1960 y 1980 el a ocupa varios puesto como dirigente, entre otro como presidente di Oranjevereniging Aruba. Como representante di Aruba den Stichting Nationale Parken Nederlandse Antillen (STINAPA) el a labora pa proteha signonan indjan den cuebanan di Ayo y Fontein y conserva e herencia Arubano na interes di su industria turistico.[4][5] Den mundo di deporte el a fungi como presidente di RCA (1962-1965, 1967-1969, 1980-1981) y di Arubaanse Voetbalbond (1965-1966).[6] Merryweather a trece e clubnan AFC Ajax, Feyenoord y Arsenal Aruba y a aporta pa talentonan local progresa y participa den e seleccion Antiano. Despues di su retiro el a keda nombra miembro honorario di RCA, cual club desde 2013 ta organisa anualmente riba dia di Rey e torneo pa mucha di 4 pa 15 aña dedica na dje, "Copa John Merryweather".
Condecoracion
[editá | editá fuente]
Hulanda: Cabayero (ridder) den Orden di Oranje-Nassau (1983)- Hulanda: Cabayero (ridder) den Orden di Leon Hulandes (1990).
Fuente, nota i/òf referensia
|