Joseph Estrada

Joseph Estrada

Pamituki-tuki (Pang-pilan)	pang 13ng Pamuntuk ning Filipinas (3ng Pamuntuk ning 5ng Republika)
Panaun ning Pamanibala	Juniu 30, 1998 – Eneru 20, 2001
Kadwang Pamuntuk	Gloria Macapagal-Arroyo
Elilan	Fidel V. Ramos
Katuki	Gloria Macapagal-Arroyo
Mibait	Abril 19, 1937 Tondo, Manila, Philippines
Mete

Y José Marcelo Ejército Estrada, lalung kilala king taguring Erap, a mibait inyang Abril 19, 1937, metung ya karing bantug nang artista keng pelikula ning Pilipinas, at yang meguing pang-labing atlung Pamuntuk na ning Republika ning Filipinas, ibat ketang Juniu 30, 1998 angga ketang Eneru 20, 2001.

Bie Kayanakan

Y Joseph Marcelo Ejercito mibait ya king Tondo, Menila metung karing maunlad nang lugal ning Menila inyang minunang panaun, dapot ngeni, balita ya king kakaluluan. Anak neng Emilio Ejercito, a mangontrata keng gobyernu, at Maria Marcelo, pengaring maratun bale.

Agyang balamu mo meragul ya king kakaluluan, ing tutu meragul ya king manawa-nawang kabilian. Kaibat nang metanggal keng pamag-aral na king Unibersidad ning Ateneo de Manila ulining pamakipate, linub ya king Mapua Institute of Technology para magaral Inyeru, dapot ena murin asundu at yang inarapan na ing pamag-artista keng pelikula.

Ding pengari na ela matula king pamanuknang na king pamagaral, inya binawal deng gamitan ne ing kayang apelido. Ulinita, ginamit ne ing apelidung Estrada, a kalsada keng Kastila, antimong lagyu na keng pamag-artista. Antimong Artista, mipamalayawan yang Erap, ing kabaligtaran ning pare, O kakuyug. Ya ing meguing bida karing maiguit dinalan, at director karing maiguit pitung dalan a pelikula.Ya ing mumunang tinanggap king FAMAS Hall of fame antimong mayap diling Artista na ning banuang 1981, at meguing bilang producer Hall of Fame ning banuang 1983. Menasa, linague yang bida a pekabayani ra ding kalulu inya makanian deng pinuri ding pakakalulu nang memalen ning bansa. Ing bague iti, mekasaup kaya king marangle ning politika.

Agyang ala ya pang sibukan keng politika, tinagal yang Mayor na ning San Juan, Metro Manila inyang 1968. Miproklama ya mung Mayor inyang 1969 kaibat neng simbut ing protesta nang Dr. Braulio Sto, Dominggo tungkul king halalan.

Inyang sampa ya king upaya antimong Pamuntuk Y Corazon Aquino inyang 1986, milako langan king tungkulan ding anggang opisyales pang-lokal, at miyalilan karing mepiling mamuntukan. Metung ya Y Estrada karing milako. King tutuking banua, tinagal at sinambut yang senador lalam na ning sarili nang partido, ing Partido ding Masang Pilipino.

Bise Presidente

Ketang pambansang eleksyon 1992, tagal ya sanang Presidente, dapot migbayu ya isip at mebisa yang tagal antimong bise nang Eduardo Cojuangco ning Nationalist People's Coalition. Sinambut yang bise, at yang meguing bise presidente ning miyalal a Y Fidel Ramos. Kaibat ning pamipasumpa, Y Estrada yang mitutukan mamuntukan king Presidential Anti-Crime Commission.

Eleksyon

King pambansang eleksyon 1998, linaban ya at sinambut Y Estrada king panga-Presidente na ning bansa. Simbut ne Y Jose de Venecia. Y Gloria Arroya simbut na ne man ing Bise nang Estrada. Pekisiran de ding kalaban nang Estrada at inaus deng babaeru, lassengu, at sugarul, dapot simbut nala mu rin. Sinumpa ya ketang Juniu 30, 1998.

Pinintas neng Estrada ing maleparan a pahayagan ning Pilipinas, The Philippine Daily Inquirer , a sasaryan nang mamikatsang kalaraman salang kaya--bague pepa-alian ning pahayagan. Inyang 1999, deng comersyanti at prodyuser keng pelikula leko rong myaganan deng adbertisu da king pahayagan Inquirer inya linto king kabaluan nang Estrada ing bague iti, at mepintas ya king meto yatung pamamahayag.

Bintang a kapanakawanan at pangalako king upaya Ing pamanungkulan nang Estrada mengtamu yang bintang king kapanakawanan, at mismung talapayul nang Y Aprodicio Laguian yang sasabing maralas yang maka-inum at e manayun a panugali. Inyang Oktubri 2000, Y Luis Singson, Gobernador ning Ilocos Sur, bantug-lagyu keng pamangurakut keng sugal pamatutuanan na king ya mismu binie nala ding halagang 400 million a pesus kang Estrada bilang bayad king penakitan na ning labag keng batas a pamagpasugal. Mika-kalingasngasan king kabilugan a bansa bunga ning sasabian nang Singson, minangga king lalako ne king upaya ning Kongreso na ning Pilipinas inyang Nobiembri 2000. Ya ing mumunang diling meguing Pamuntuk ning Pilipinas a darayu da king upaya. Kabud ing Artikulu na ning pangalako king upaya miras ya king gamat na ning Senado, ing Korte ning Pamilako king upaya mibubu ya at pemuntukanan ne ning Pun-Hukum Hilario Davide.

King oras ning pamaglitis, ding tagasakdal pribadu la ampon diputadu a mengi-apag king ebidensya ampon saksi king Korte dikil king pamakiabe nang Estrada keng makabawal a sugal a meyaus Jueteng, at ing pamaningat na king metung lihim a libreta keng banku. Makanian man, ding maglualu kang Estrada a pawang masibukan keng batas penikuanan deng palaraman ing sasandali ding mangisakdal kapamilatan ning matindi rang pamangutang. Mengapilitan neng lakuan Estrada ing Palsyo ning Malakanyang ketang Eneru 20, 2001.

Kaduang EDSA

Inyang Eneru 16, 2001, ing Korteng katitipunanan da ding taung malapit kang Estrada, pisanmetung da king eya dapat mibuklat ing sobring makilaman ebidensyang laban king Presidente. Ding king panig ding tagapaglitis migprotesta la king anti kanitang kayatulan. Keta murin benging ita, ding contra-Estrada milikum la king dalan ning EDSA king sadyang lugal nung nuya misapwak ing pamag-alsa laban kang Marcos. Ing magbabo king alingongo king dapat yang tipa king tungkulan na Y Estrada. King tutuki pang aldo, lalu lang merakal ding magprotesta laban kang Estrada.

Ketang Eneru 19, 2001, ing Armada na ning Pilipinas, inurung na ing pamanantabe na kang Estrada at binie na ing katapatan na kang Gloria Arroyo. Ngening ala nang Armada king panig na, at selisian ning pamanguldas da king tungkulan ding kabinete na, makanian yang mibagsak Y Estrada.

Inyang Eneru 20, 2001, dineklara na ning Korte Suprema king alang makalukluk a Presidente, inya ing Pun-Hukum pepasumpa ne Y Gloria Arroyo ban lukluk pamuntuk na ning bansa maka-agpang king Pun-batas. Makanian lang marapal meko ding Estrada king Malakanyang.

Kaibat nang kinuldas king upaya

Minuli ya Y Estrada king sadya nang tuknangan king San Juan. Sasabian na king ena kusang meko king tungkulan, ngana wari, ing panga-pamuntuk nang Arroyo e maka-agpang keng batas, bistaman ding malda kikilalanan da neng bayung Pamuntuk ning bansa.

Ing gobyerno nang Arroyo simpa re ing dalum kapanakawanan salang kang Estrada inya makanian deng dekap inyang bulan ning Abril. Ding talatuki nang Estrada, lalu na ding kalulu migmartsa la king EDSA mamaus king kalayan nang Estrada. Misan a abak ning Mayo, ding mag-protesta tinaglus la king Malakanyang. Mikakaguluan ulinita. Inya ing gobterno dineklara ne ing estado ning rebelyon. Mengarakap la ding talatuki nang Estrada at kabilang la ding mapilan a polotiku. Mekialam la ding militar inya agad dang apatda ing pamag-alsa.

Mesukul ya Y Estrada, muna king Veteran's Memorial Medical Center king Menila, kaibat milipat ya king Facilidad Militar king Tanay, Rizal, kaibat milipat ne naman malapit king bale na, antimong makasukul king sarili nang tuknangan. Makanian man, makasampa ya pa murin ing dalum laban kaya. Agpang king batas ning Plipinas, ing kapanakawanan a makanian mipaparusan yang kamatayan.

Ing halalan pang-presidensyal 2004, yang antimong babie patutu king tune nang panga-pamuntuk Gloria Arroyo. Binie na ing kasaupan nang Estrada king kaluguran nang Y Fernando Poe Jr. a meguing mahigpit nang kalaban Arroyo. Makanian man, simbut neng Arroyo Y Fernando Poe Jr king masipit a labanan.

Ketang Abril 21, 2005, ing United Opposition Movement, binie ne keng Estrada ing taguring Chairman Emeritus. Ing biglang kamatayan nang Fernando Poe Jr. minie kapigaganakan karing laban king partidu ning salukuyan a manungkulan at era balu nung nanu tang masanting a paralan ing gawan da. Ngening Y Estrada makadalum ya pa, migaganaka la ding mapilan a nung nu mo kaya anti ing maguing saup na ning taguring miabie kaya ban ibubu ya ing partidung makatalad laban king salukuyan a Pamuntuk at king keang partidung Lakas-CMD.RBA/05

Suglung Palwal

• The Philippine Presidency Project
• Joseph Estrada Blog
• Joseph Estrada at the Internet Movie Database

Minuna kaya {{{before}}}	{{{title}}} 1992–1998	Menalili kaya {{{after}}}
Minuna kaya {{{before}}}	{{{title}}} 1998–2001	Menalili kaya {{{after}}}