Irina Rodnina

Irina Rodnina
Ammatti:	poliitiekku, фигуристка, figure skating coach, депутатка Государственной думы Российской Федерации
Rodivui:	12. syvyskuudu 1949(1949-09-12) (75 лет)
Roindukohtu:	Moskovu, Nevvostoliitto
kanzalližus:	Ven'a  Nevvostoliitto
Ukko / akku:	Aleksandr Zaitsev[d]
Lapset:	Alyona Minkovski[d]
Nimikirjutus:

Irina Konstantinovna Rodnina (12. syvyskuudu 1949) on nevvostolaine luistelii, kolme kerdua oli Olimpiadukižoin voittajannu, kymmene kerdua oli Muailman kilvoin voittajannu. Rodnina ruadau yhteiskunnallizel alal da valdivonvallas, on Valdivon Duuman V-VI kučundukerähmölöin deputuatannu, ezittäy Yhtenäine Ven’a -puolovehtu, on tämän puolovehen Piälimäzen nevvoston jäsen.

Eloskerdu

Rodnina on roinnuhes Moskovah. Lapsennu hänel yksitostu kerdua oli keuhkoloin kylmändy, liäkärit sendäh nevvottih harjaittua sportua da parembi pihal, sendäh vahnembat tuodih tytärdy vuvvennu 1954 luistelikole. Sit kirjutettih händy sportukerhoh. Hänen enzimäzenny harjaittelijannu oli Jakov Smuškin. Vuvvennu 1960 Irina puutui Keskusarmien kluuban luistelijoin sportukerhoh da 15-igässäh luisteli yksinäh. Puaras Oleg Vlasovanke häi piäzi kolmandele sijale Kogo nevvostoliiton nuorižokilvois vuvvennu 1963.

S. A. Žukan johtol

Vuvves 1964 Rodninan harjaittelijakse rodih S. Žuk, kudai pani händy luistelemah Aleksei Ulanovanke. Talvikuul 1966 hyö enzimäzen kerran luisteltih I Kanzoinvälizes Moskovan luistimet -kilvas da jo tulien 1967/68 kavven aigua heijän puaru piäzi Nevvostoliiton parahien joukkoh. Talvikuul hyö voitettih Moskovan luistimet -kilvas da pakkaskuul 1968 piästäh kolmandele sijale Nevvostoliiton kilvois. Sen jälgeh hyö puututtih muan joukkoveheh. Jevroupan kilvois enzimäzen lyhyön programman jälles hyö oldih kolmandet, ga jälles tostu programmua oldih jo vaiku viijendel sijal. Žuk vie vaigiembakse luadi heijän programmat, enzi kerdua luistelijoin puaroin histouries otti sih kaksinazen paralleliakselin da hyppävyksien yhtymän. Moskovan luistimet -kilvas puaru oli sit toizel sijal, Nevvostoliiton kilvois vagavas kilbailus piäzi kolmandele sijale. Jevroupan kilboih vuvvennu1969 Rodnina da Ulanov tuldih harjaittelijattah (Žukale ei annettu lähtie) da yllätytti kaikkii. Kaččomattah sih, ku enzimäzen lyhyön programman jälles heidy enne oldih L’udmila Belousova da Oleg Protopopov, jo toizen programman jälles hyö piästih enzimäzele sijale luajittuloin vaigiembien elementoin da suuren vauhtin hyvyös. Heidy enzimäzele sijale pandih kaheksa arvostelijua yheksäs. Tämän jälles Rodnina sai Nevvostoliiton arvostettu sportumuasteri -arvonimen.

Irina Konstantinovna Rodnina

Vuvven 1969 Muailman kilvois Rodnina da Ulanov jätettih jällele kaikkii, voitettih mollembis programmois da suadih kaikis arvostelijois enzimäzet sijat. Hyö suadih voitot joga kilvois, yhtelläh vuvvekse 1972 vagavuu kilbailendu Nevvostoliiton toizen puaranke L. Smirnova – A. Suraikin. Olimpiadukižois vuvvennu 1972 Rodnina da Ulanov ennitettih heidy vai kahten arvostelijan arvosanal. Sit voitos Rodnina oli palkittu Nevvostoliiton Korgeviman nevvoston prezidiuman käskys Ruskien ruadoflavun kunnivomerkil.

Päivy enne vuvven 1972 Muailman kižoi harjaittelun aigah Irina pakui ylänostos da puutui gospitalih aivolointanaituksenke da syväingematoumanke. Lyhyön programman puaru ozitti hyvin, sai kai 6,0 ballat, toizes programmas Irinale rodih paha da loppi programman odva jalloilleh pyzyjen. Nämmien kilvoin jälles Rodnina eroi Ulanovanke. Ulanov, ku oli naizis Smirnovanke, jatkoi luistella hänenke. Rodnina rubei duumaimah sportas iäre lähtendiä. Nevvostoliiton vuvven 1972 kilboi häi kačoi kaččojienlavalpäi.

Sulakuul 1972 Žuk kehitti Rodninua luistelemah piiteriläzen Aleksandr Zaitsevanke. Häi hyvin hypii, terväh opastui kaikkih vaigieloih elementoih. Toine toizen ellendysty da yhtenjyttyzytty ruavos uvves puaras kaikkie myö nägyy oli äijiä enämbi, migu endizes. Se kerras huomattih arvostelijat – Jevroupan kilvas 1973 Kölnas Rodnina da Zaitsev ennitetäh Smirnovua da Ulanovua da suajah voiton kaikis arvostelijois da kaksitostu 6,0 -ballua kaheksastostu mahtonalazes. Vuvven 1973 Muailman kilvois Bratisluavas rodih kummua, kudamua luistelendan histouries vähä konzu rodieu. Rodninan da Zaitsevan toizen programman aigah katkei muuzikku. Jällespäi tiijustettih, ku sen piädykauti luadi čeehieläine ruadai, kudai nenga tahtoi tazata Nevvostoliitole Pragan keviän hävitändäs vuvvennu 1968. Žuk ozutti, ku pidäy jatkua progammua da puaru luisteli loppussah muuzikattah kaččojien käzipläkytyksien myödäh. Vuvvennu 1974 Rodnina loppi Fiskul’tuuran keskusinstituutan.

Tatjana Tarasovan johtol

Vuvvekse 1974 puaran da harjaittelijan välit roittih vaigiembat, sendäh luistelijat ligakuus 1974 ruvetah harjaittelemah nuorel harjaittelijal – Tatjana Tarasoval, kudai opastujienke oli yhtenarvoine, kui partn’ouru, ruavos. Tämän ližäkse Tarasova opii tuvva programmoih enämbän taidoilmekkähytty. Vuvven 1975 Rodnina da Zaitsev voitettih Muailman kilvois.

Vuvvennu 1975 Rodnina rubei kuulumah Nevvostoliiton kommunistoin puoloveheh. Samannu vuon piettih Rodninan da Zaitsevan svuad’bu, kudamas oli äijy rahvastu, kuvuamah sidä tuli Yhtysvalloin TV. Rodnina da Zaitsev voitettih Olimpiadukižois vuvvennu 1976 da 1980, Muailman kilvois 1973-1978, Jevroupan kilvois 1973-1978, 1980.

Suavutukset

Rodnina on kaikis paras puarois luistelijois naizis. Häi kolme kerdua oli Olimpiadukižoin voittajannu, kymmene kerdua Muailman kižoin voittajannu (1969-1978), yksitostu kerdua Jevroupan kilvoin voittajannu (1969-1978, 1980), kuuzi kerdua Nevvostoliiton kilvoin voittajannu (1970-1971, 1973-1975, 1977), vuozinnu 1969-1980 häi voitti joga kilvas, kudamah yhtyi.