Patz armada
L'expression « patz armada » designa un concèpte politic que considèra l'existéncia de fòrças militaras importantas e en estat d'intrar rapidament en guèrra coma una condicion de mantenement de la patz. D'efiech, segon aquela doctrina, un belligerant eventuau es pauc ò pas susceptible d'intrar en guèrra còntra un Estat ben armat. Es una idèa anciana, exprimida tre l'Antiquitat per l'emperaire August (27 avC - 14 apC) e formalizada dins l'adagi Si vis pacem, para bellum. Dins lo corrent de l'istòria, divèrsei periòdes i correspòndon, especialament la Guèrra Freja en Euròpa onte lei dos blòts mantenguèron de fòrças considerablas per se neutralizar mutualament. Lo concèpte de destruccion mutuala assegurada es de còps considerat coma una varianta de patz armada.
Aquela doctrina es l'objècte de criticas. Per lei pacifistas, es una justificacion erronèa dei budgets militars. Dins lo corrent de l'istòria, lei periòdes de patz armada pòdon tanben agravar de tensions diplomaticas e evolucionar vèrs de situacions pus conflictualas coma una corsa ais armaments. Un exemple d'epòca d'aqueu tipe son lei decennis avans la Premiera Guèrra Mondiala amb una patz armada que se transformèt en corsa ais armaments generala entre Estats europèus e, finalament, en conflicte dubèrt.