Kubilai Khan
Kubilai Khan (23 de setembre de 1215 - 18 de febrier de 1294, Cambaluc) es un khan mongòl qu'aguèt un ròtle centrau dins l'istòria de l'Empèri Mongòl e de China. Felen de Genghis Khan, foguèt elegit Grand Khan de l'Empèri Mongòl après la mòrt de son fraire Mongke (1251-1260). Aquela eleccion foguèt contestada per son fraire Ariq Boqa qu'èra sostengut per lei partisans dau mantenement dei tradicions mongòlas. Una guèrra civila, que durèt fins a 1264, li permetèt de véncer aquelei conservators e d'impausar una sinizacion creissenta dau poder mongòl. D'efiech, Kubilai concentrèt la màger part de sei fòrças sus la conquista de la China dei Song. En 1271, se proclamèt emperaire de China e fondèt la dinastia Yuan. Acabèt la conquista dau país en 1279 après la destruccion dei darriereis armadas Song. Pasmens, aquel interès per China permetèt ai khans vassaus dirigissent leis autrei partidas de l'Empèri de venir mai e mai autonòms. Ansin, la mòrt de Kubilai es abitualament considerada coma la data de la fragmentacion definitiva de l'Empèri Mongòl.
Lo rèine de Kubilai correspònd au periòde dau viatge de Marco Polo en China. Emplegat coma emissari imperiau, lo marchand italian visitèt una partida importanta dau país de 1275 a 1290. Son racònte de viatge, Lo Libre dei Meravilhas, acòrda una plaça importanta a la descripcion de la politica chinesa dau periòde e dei vilas visitadas durant sei missions.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) Bernard Brizay, Les trente "empereurs" qui ont fait la Chine, Perrin, 2018.
- (en) Morris Rossabi, Khubilai Khan: His Life and Times, University of California Press, 1989.