Wilhelm Röntgen

Ch't' articl'ye fut c'menchie en Jèrriais

Wilhelm Röntgen en 1901.

Wilhelm Conrad Röntgen (27 Mar 1845 – 10 Févri 1923) 'tait un scientiste allemand tchi dêcouvrit l'x-raiethie. I' r'chut l'preunmié Prix Nobel pouor la phŷsique en 1901.

Au mais d'Novembre 1895, Röntgen 'tait à faithe des expéthînments atout des tubes en vèrre à seule fîn d'êtudier les dêchèrges d'êlectricité. Ouaithe qu'la tube fûsse couvèrte dé carton, i' lî sembliait qu'les dêchèrges faîthaient lithe un êcran peint d'barium platinocyanide. I' s'posit qu'i' y'avait des rayons înconnus (qu'i' bâptîsit "X" viyant qu'i' 'taient înconnus) tchi lithaient l'travèrs du carton. I' dêcouvrit qu'les rayons pâssaient l'travèrs d'la chai mais l's os et l'méta faîthaient d's ombres. Et ches ombres pouvaient êt' èrcordées sus des pliaques photographiques. Lé 22 d'Dézembre Röntgen fit l'preunmié radiographe (photographe à X-rays) d'la main à sa bouonnefemme Anna Bertha.

Pouor la fîn du mais d'Dézembre 1895 Röntgen publyit un rapport entouor ses expéthînments et d'aut's scientistes quémenchîtent à copier et dêv'lopper chein qu'il avait fait.