Ketill Hanstveit

Ketill Hanstveit
Statsborgarskap	Noreg
Fødd	2. november 1973 (51 år) Bergen
Idrett	friidrett, tresteg
Tok del i	Sommar-OL 2000
Utmerkingar	Kongepokal, Kongepokal

Ketill Are Hanstveit (fødd 2. november 1973) er ein norsk tidlegare friidrettsutøvar frå Bergen. Han vart noregsmeister i tresteghopp 1992-94, 1997-99 og 2001-02. Under NM i friidrett 1999 på Byrkjelo sette han norsk rekord i øvinga med 17,27 meter, ein prestasjon som gav han kongepokal nummer 2. Også i 1998 vart han tildelt kongepokalen i NM. Hanstveit er medlem i IL Norna-Salhus.

Aktiv

Frå 1991 til 2002 vann Hanstveit årleg ein medalje i tresteghopp i noregsmeisterskapen. Til saman sanka han åtte gullmedaljar, to sølvmedaljar og to bronsemedaljar. Den store framgangen kom i 1993-sesongen då han den 17. juli hoppa 16,71 meter på Bismo. Nokså nøyaktig eitt år seinare forbetra han sitt personbeste til 16,76 m i Tønsberg. På Byrkjelo 13. juli 1997 la han på til 16,86 m og 7. juni 1998 presterte han i Malmö 16,88 m under B-Europacupen for landslag.

Hanstveit hoppa over 17 meter fyrste gongen ved NM i friidrett 1998 på Askøy. I tre sekundmeters medvind landa han på 17,20 m, akkurat nok til at han fekk tildelt kongepokalen for menn. Året etter var det ingen tvil om kongepokalen i noregsmeisterskapen 1999, med eit hopp på 17,27 meter på Byrkjelo den 8. august sette han ein norsk tresteg-rekord som også gjeld i 2022.

Under NM i friidrett 1997 tok Hanstveit med eit hopp på 7,24 meter sølvmedaljen i lengde-øvinga.

Plasseringar i internasjonale meisterskap

• EM 1994 i Helsinki: Utslått i kvalifiseringa (15,84 m=nr 17)
• VM 1997 i Aten: Utslått i kvalifiseringa (16,45 m=nr 22)
• EM 1998 i Budapest: Nr 12 i tresteghopp – 16,58 m
• VM 1999 i Sevilla: Utslått i kvalifiseringa (16,59 m=nr 19)
• OL 2000 i Sydney: Utslått i kvalifiseringa (16,75 m=nr 13)

Kjelder

• Denne artikkelen bygger på «Ketill Hanstveit» frå Wikipedia på bokmål, den 13. september 2021.