Rasmus S. Aarflot
Rasmus Sivertsson Aarflot (fødd 1792, død 1845) var ein norsk lensmann, gardbrukar, redaktør og stortingsmann.
Rasmus S. Aarflot var son av folkeopplysaren Sivert Aarflot, og bror av forfattaren Berte Kanutte Aarflot. Han var fyrst postopnar, og frå 1816 lensmann i Volda. Rasmus S. Aarflot overtok både garden Ekset i Volda og boktrykkeriet. Han gav ut ulike tidsskrift for å fremje folkeopplysninga (Landboavisen); han representerte Romsdals amt på Stortinga 1824, 1827–1828, 1833 og 1839, og var vald 1845, men han døydde før tingsamlinga. I boksamlinga på Ekset-garden fekk den unge Ivar Aasen stimulert noko av kunnskapslysta si.
Rasmus S. Aarflot var far til Mauritz Aarflot.
Denne artikkelen har innhald frå den opphavsrettsfrie førsteutgåva av Illustreret norsk konversationsleksikon, 1907–1913.