गिल्गमेशया काव्य
गिल्गमेशया काव्य छगु प्राचीन मेसोपोटामियाया महाकाव्य ख। थ्व मानव सभ्यताया आःतक्क लुयावःगु दकले पुलांगु साहित्यिक कृतिइ छगु ख। गिल्गमेशया साहित्यिक इतिहास सुमेरी भाषाय् उरुकया जुजु बिल्गमेश (सुमेरी भाषाय् गिल्गमेश)या नामं न्यापु स्वतन्त्र चिनाखँ नं न्ह्यथनि। लिपा, थुकिया प्यपु चिनाखँ स्वाना अकेदियन भाषाय् मंका काव्य दयेकल। थ्व न्हापांगु "प्राचीन बेबिलोनियन" संस्करणया काव्य करिब १८गु शताब्दी इपूस च्वगु ख व थुकिया नां शुतुर एलि शर्री (Shūtur eli sharrī) ख गुकिया अर्ह्त मेमेपिं जुजुतयेत पुलावनेगु ("Surpassing All Other Kings") ख। थुकिया छुं खण्ड जक्क लुयावःगु दु। लिपा लूगु, १३गु निसें १०गु शताब्दी तक्कया प्रचलित बेबिलोनियन संस्करणया नां शा नक्बा इमुरु (Sha naqba īmuru) वा व सुनां गहिराइ खनं ("He who Saw the Deep") जूगु खनेदु। थ्व ताःहाकःगु काव्यया २/३ति खण्ड १२पा शिलापत्रय् लुयावःगु दु। थुकिया दकले बांलाक्क संरक्षित पत्र असिरियाया जुजु अशुरबनिपाया ७गु शताब्दी इपूया सफूधुकूया भगनावशेसय् लुयावःगु दु।
थ्व काव्यया बाखँ गिल्गमेश व एन्किदु (Enkidu)या मित्रताय् केन्द्रित दु। एन्किदु छम्ह जंगली मनु ख सुयात काव्य कथं द्यःतयेसं गिल्गमेश बराबर दयेकल। एन्किदुं विचलित जुम्ह गिल्मलेशं उरुकया मनुतयेत शोषण याये मखन। नापं, निम्ह सेदार च्वकाय् वना अनया राक्षसी रक्षक हुम्बाबा(Humbaba)यात बुकल। गिल्मलेशं देवी इश्तार (Ishtar)या व प्रति आकर्षण अस्वीकार यागुलिं देवीं वयात दण्ड बीत छ्वया हःगु स्वर्गया द्वं (Bull of Heaven)यात लिपा इमिसं स्याइ। थ्व ज्याया दण्डया रुपय् द्यःतयेसं इन्किदुयात स्याइ।
काव्यया लिपाया खण्ड गिल्गमेश एन्किदु मदया जूगु वियोग व वया अमरत्त्वया मालेज्याय् केन्द्रित दु। अमरत्त्वया रहस्य सीकेत गिल्गमेशं ताःहाकगु व ग्यान्पुगु यात्रा याइ। वं सीकि कि "छं मालाच्वंगु जीवन छं गब्लें नं लुइकिमखु। द्यःतयेसं मनु दयेकूगु बिलय् इमिसं मनुयात मृत्युया भागय् तल व जीवन थःगु भागय् लाकल" ("The life that you are seeking you will never find. When the gods created man they allotted to him death, but life they retained in their own keeping.")। थ्व धापू न्हापा प्राचीन बेबिलोनियन संस्करणय् सिदुरी (Siduri)या ख धका नालाकाःगु दु [१], व लिपा अक्केदियन संस्करणय् थ्व धापूइत खुसिबाहाया अमर नायः उत्नापिश्तिम (Utnapishtim)या धका नालातःगु दु। न्ह्यागु हे जुसां गिल्मलेशया तःधंगु निर्माण ज्या व उत्नापिश्तिमं वयात खुसिबाहा वबिलय्या ब्युगु विवरणय् आधारित गिल्गमेशया खँया कारणं वया नां व मदयेधुंका नं म्वानाच्वन। थ्व बाखँ यक्व भाषाय् भाय्हिला जुइ धुंकल व गिल्गमेश यक्व नांजाःगु बाखँय् थीथी कथं प्रस्तुत नं जूगु दु।
लिधंसा
[सम्पादन]- ↑ James Thrower "The Alternative Tradition: A Study of Unbelief in the Ancient World" 1980, Mouton Publishers, The Hague, The Netherlands
 |
विकिमिडिया मंका य् थ्व विषय नाप स्वापु दुगु मिडिया दु: Gilgamesh |