Walter Marty Schirra

Walter Marty „Wally“ Schirra, Jr. (* 12. März 1923 in Hackensack, New Jersey, USA; † 3. Mai 2007 in La Jolla, Kalifornien) weer en US-amerikaansch Astronaut. He weer de eenzige, de an jeden vun de eerst dree Ruumfohrtprogramme vun de USA – Mercury, Gemini un Apollo – aktiv as Ruumfohrer bedeeligt weer.

Utbillen bit to Astronautentätigkeit

Schirra studeer Luftfohrttechnik an dat Newark College of Engineering van 1940 bit 1942 un gung denn an de United States Naval Academy, wo he in' Juni 1945 sien Diplom kreeg. In de letzt Weeken vun den Tweeten Weltkrieg deen he an Bord vun de USS Alaska, aber de Krieg weer all to Enn', bevör dat Schipp de Kamprebeeden recken dee.

Af 1948 weerr he Kampfleger bi de US-Marine un hett ok Insatzen in' Koreakrieg flogen. Van 1952 bit 1954 weer he Testpilot in China Lake, Kalifornien, wo he ok an de Entwicklung vun Luft-Luft-Raketen mitwarken dee. Wiedere Statschonen in sien Karriere weern de Floogtüüchdräger USS Lexington un Utbillen in Kalifornien un Maryland.

Mercury

Walter Schirra weer een vun 110 Testpiloten, de in de engere Utwahl för de eerst Astronautengrupp vun dat Mercury-Programm keemen. An' 9. April 1959 wurr he denn vun de NASA as een vun de söben eersten amerikaanschen Astronauten de Apenlichkeit vörstellt. As Spezialrebeet hett he de Levenserhollenssysteme an Bord vun dat Mercury-Ruumschipp un den Ruumanzug övernommen. För den tweeten Insatz vun en Mercury-Ruumschipp in de Eerdumloopbahn Mercury-Atlas 7, weer Schirra as Ersatzpilot indeelt. As den oorsprünglich nomineerten Piloten Deke Slayton de Floogfähigkeit afspraaken wurr, keem aber nich Schirra, sonnern Scott Carpenter to'n Insatz. Schirra bleev Ersatz.

Sien eersten Weltruuminsatz harr Schirra denn mit Mercury-Atlas 8, as he an' 3. Oktober 1962 dat Ruumschipp Sigma 7 sössmal um de Eer stüer. Disse Floog gung as „Ruumfloog ut dat Lehrbook“ in de Historie vun de NASA in. Schirra weer somit de negente Minsch in' Weltruum, dorvan de fievte Amerikaner.

Gemini

Af Januar 1963 övernehm Schirra bi de NASA nee Upgaven in de Koordinatschoon vun Gemini- un Apollo-Aktivitäten.

Af April 1964 hett he sück für den eersten amerikaanschen Twee-MannFloog Gemini 3 vörbereit, för de he as Ersatz-Kommandant indeelt wurr. Nahdem dissen Floog spoodriek an' 23. März 1965 vun Virgil Grissom und John Young dörführt wurr, kreeg he dat Kommando för den nächsten verfügbaren Floog: Gemini 6.

Disse Floog harr de eerste Kopplung vun twee Ruumfloogtüüch in de Eerdumloopbahn wurrn sullt, de Insatzplan muss aber nah en Fehlstart vun de Teelsatelliten ännert wurrn, so dat nu en Rendezvous mit Gemini 7 vörsehn weer.

Walter Schirra bewies iesern Nerven, as he wiels en misslungen Startversöök vun Gemini 6 de Schleudersitt nich utlöösen dee, ofschons de Rakete ungesekert up de Startramp stunn.

De darte Versöök hett Gemini 6 denn mit hüm un Tom Stafford an' 15. Dezember 1965 in de Eerdumloopbahn befördert, wo se, to'n eersten Mal in de Historie vun de Ruumfohrt, stüert Annäherungsmanöver vun twee Ruumscheep dörführn deen.

Apollo

Nah de spoodriek Mission vun Gemini 6 is Schirra to dat Apollo-Programm wesselt, wo he an' 29. September 1966 as Kommandant vun den tweeten bemannten Floog nomineert wurr. He kreeg as wieder Crew-Liddmaaten noch Donn Fulton Eisele un Ronnie Walter Cunningham todeelt. In' November 1966 wurr disse Floog afseggt, un de dree Astronauten wurr de Ersatzmannschap för den eersten bemannten Apollo-Floog, Apollo 1. Bi en Test an' 27. Januar 1967 keemen aber all dree Liddmaaten vun de Hööftmannschap to Dood, un all Mannschapsindeelen weern vöreerst henfällig. An' 9. Mai 1967 wurrn Schirra, Eisele un Cunningham denn as Mannschap för den eersten bemannten Apollo-Floog bekannt geven. De Mission harr nu de Beteken Apollo 7.

Apollo 7 is an' 11. Oktober 1968 start un bleev 11 Daag in de Eerdumloopbahn. Ut technisch Sicht leep disse Mission hervörragend. Dat wurr en Rendezvous mit de bövere Stuuf vun de Saturn 1B-Rakete dörführt un de eerst Feernsehbiller ut en amerikaansch Ruumschipp to de Eer send. De Astronauten hebbt aber ünner en Schnuppen leeden un dat herrsch en temelk reizt Stimmung tüschen de Floogleitzentraal un de Besatten vun dat Ruumschipp. All dree Astronauten kreegen dornah kien Insatzmögelkeiten bi de NASA mehr.

Nah de NASA

Schirra harr aber ok all vörher ankünnigt, dat Apollo 7 sien letzt Raumfloog ween sull un he hett de NASA denn an' 1. Juli 1969 verlaaten. He hett dornah as Vörstand un Geschäftsführer in mehreren Firmen arbeit, bit he 1979 sien eegen Ünnernehmen Schirra Enterprises grünnen dee. Buterdem weer he in' Upsichtsraat vun mehreren Firmen tätig un hett in't Feernsehn Werbung maakt för dat Medikament Actifed maakt, dat Medikament, dat he wiels sien Apollo 7-Mission innommen hett. Walter Schirra weer verheiraadt un harr twee Kinner.

Schirra is in dat Öller vun 84 Jahren an de Folgen vun en Krebserkrankung in dat Scripps Green Hospital in La Jolla (Kalifornien) storven.

De Öllern vun Walter Schirra hebbt Swiezer Wuddels. De Familie stammt oorsprünglich ut dat Tessin (Onsernonedaal).

Besünnerheiten un Rekorde

eerst Minsch mit dree Ruummissionen (u. a. Apollo 7)
eerst Minsch, de dre Ruumscheep stüert hett (Mercury-Programm, Gemini-Programm un Apollo-Programm)
eerst Minsch, de dreemal Kommandant vun en Mission weer
Eerstfleger in dat Apollo-Programm

Weblenken

Walter Schirra. Mehr Biller, Videos oder Audiodateien to’t Thema gifft dat bi Wikimedia Commons.

Homepage von Wally Schirra (engelsch)
NASA-Biografie (engelsch)
Walter Schirra, 1923-2007, Feature NASA (engelsch)
JSC Oral History Project: Niederschrift eines NASA-Interviews von 1998, 55 Seiten, 131 KB in PDF-Format (engelsch)

Artikel-Dossier zu Walter Schirra, New York Times, 4. Mai 2007 (Nahroop)