Psira

Psira vun de oostkretischen NoordKüst ut sehn

Psira (ok Pseira, greeksch Ψείρα) is en lütt greeksch Eiland in’n Noorden vun Kreta.

Psira höört to de Präfektur Lasithi. Dat Eiland liggt vör de oostkretischen Küst in’n Gulf vun Mirambéllou ungefäähr 3 km westlich vun den Küstenoort Móhlos un üm un bi 10 km ööstlich vun de Stadt Ágios Nikólaos. Se kiekt bit to 204 Meter hooch över över’t Water un mitt ruchweg 2.300 m in de Läng un 900 m in de Breed. De Flach is üm un bi 1,4 km².

Psira is vundaag nich bewahnt un wassen deit dor ok kuum wat. Man, op dat Eiland gifft dat Ruinen vun en ehmolige minoische Havenstadt. Dat, wat vun den Haven sülvst noch över is, liggt hüüt aver ünner Water, as ok de sieteren Delen vun de Stadt. Aver an de hüütige Küstenlien un an’n ünneren Hang sünd noch de högeren Ruinen, de ok in’n Rahmen vun Utfohrten bekeken warrn künnt. Op Psira gifft dat butendem ok de Överreste vun en byzantinisch Klooster.