Jupiter-Familie
As Jupiter-Familie warrt en Koppel vun ruchweg 70 kortperioodsche Kometen betekent, de wegen gemeensome Sünnerheiten vun jemehr Ümloopbahn to en Kometenfamilie tosamenfaat warrt.
Tyypsch för de Jupiter-Familie is, dat de Kometen jemehrn gröttsten Afstand vun de Sünn (Aphel) in de Neeg vun de Jupiterbahn hebbt. De middlere Aphelafstand liggt bi üm un bi 5,5 AE. De Jupiterbahn hett to’n Vergliek en Aphelafstand vun 5,45 AE. De Ümlooptieten vun de Kometen leegt twüschen fief un ölven Johren. De bekanntsten Liddmaten vun disse Kometenfamilie sünd 3D/Biela, 21P/Giacobini-Zinner, 17P/Holmes un 7P/Pons-Winnecke.
Dat sik disse Kometenfamilie rutbillt hett, liggt an Bahnstören dör de Gravitatschoon vun den Jupiter. Gravitative Stören dör Planeten künnt de Ümloopbahnen vun Kometen mitünner düchtig ännern. En systemaatsche Klassifikatschoon vun Kometen warrt dorüm tomeist na den Tisserandparameter in Betog op den Jupiter vörnahmen. Dorna warrt en Komet to de Jupiter-Familie tellt, wenn sien Tisserandparameter twüschen twee un dree liggt.
Lieke Koppels vun Kometen gifft dat ok dör de Gravitatschoonswirken vun annere Plaenten mit grote Masse, vun de aver veel weniger Liddmaten bekannt sünd. Bekannt sünd Kometenfamilien vun’n Saturn (5 Kometen), Uranus (3 Kometen), Neptun (9 Kometen) as ok vun’n Dwargplanet (134340) Pluto (5 Kometen).
Die Jupiter-Familie dröff nich mit de Jupiter-Grupp dör’nanner bröcht warrn. Disse Grupp is beter ünner den Naam „Trojaner“ bekannt un stellt en Koppel vun Asteroiden dor, de sik vör un achter den Jupiter ruchweg op de sülven Ümloopbahn as de Planet bewegt.