John Bunyan
John Bunyan (* 30. November 1628 in Harrowden; † 31. August 1688 in London) weer en engelschen Prediger vun de Baptisten un Schriever.
Bunyan weer de Söhn vun den Ketelflicker Thomas Bunyan un den sien Fro Margaret. He güng blot kort na School un hett denn sien Vadder sien Beroop lehrt. 1644 weer he Suldot bi de Parlamentsarmee in’n engelschen Börgerkrieg un weer in disse tweeunhalf Johr de mehrste Tiet in Newport Pagnell statschoneert. Dor hett he denn woll toeerst Kuntakt to puritaansche Predigers hatt. Nadem he 1647 nahuus trüchkamen weer un wedder as Ketelflicker arbeiden dee, harr he en depe geistliche Kries, wo he later vun in sien Wark Grace Abounding schreven hett.
1648 hett he heiradt un mit de Tiet twee Döchter (Mary un Elizabeth) un twee Söhn (John un Thomas) kregen. De Naam vun siene Fro is nich seker bekannt, se hett wohrschienlich aver mit Vörnaam Mary heten.
Üm 1653 hett Bunyan sik in’n Stroom Ouse wedderdöpen laten un hett sik de Baptistengemeend in Bedford anslaten. He weer nu ok bald sülvs Prediger.
Wohrschienlich 1655 is siene eerste Fro doodbleven un Bunyan hett 1659 Elisabeth heiraadt, vun de he noch twee Kinner kregen hett, Sarah un Joseph.
Vun wegen dat Bunyan mit de anglikaansche Staatskark nix to doon hebben wull, is he 1660 bi Harlington bi en Goddsdeenst fastnahmen worrn un seet twölf Johr in’t Gefängnis. Dor hett he, dat siene Familie en beten Geld harr, Strump- un Schohbänner weevt un blangen dat welk Böker schreven.
De Bischop vun Lincoln, William Fuller, hett em 1672 freelaten, doch 1675 müss Bunyan noch wedder för söss Maand in Haft. He harr sik nich an sien Predigtverbaad hollen. In disse Tiet hett he denn wohrschienlich en groten Deel vun sien Hööftwark The pilgrim’s progress schreven, ene Allegorie op den christlichen Glövensweg, de to en wichtig Wark vun de Weltliteratur worrn is un in bannig vele Spraken översett worrn is.
1688 is Bunyan doodbleven un hett sien Graff op de Bunhill Fields funnen.
Warken
[ännern | Bornkood ännern]- The Doctrine of the Law and Grace Unfolded. 1659
- Grace abounding to the Chief of Sinners. 1666
- The pilgrim’s progress from this world to that which is to come. 1678/84
- Life and Death of Mr. Badman. 1680
- The Holy War. 1682