Markermeer

Het Markermeer (ook wel: Hoornse Poolder of Zudelik Ijsselmeer) is een groot meer van omdebi'j 700 vierkante kilometer. Het meer ligt tussen Noord-Hollaand, Flevolaand en et (Noordelike) Iesselmeer in. Op de meeste plakken het et meer een diepte tussen de twee en vier meter. Et meer is vernuumd naar et schiereiland Marken, dat in et zuidwesten van et meer ligt.

Eerst weren der plannen om et meer in te poolderen in et ruum van de Zuderzeewarken, mar die plannen bin stopzet. Omdat et Iesselmeer en et Markermeer overbliefsels bin van de Zuderzee en de meren eins een gehiel vormen is et Zudelik Iesselmeer een betere naeme veur et meer.

Geschiedenis

Veurdat de zuderzeewarken van start gongen was et Markermeer een onderdiel van de Zuderzee. In de plannen van ir. Cornelis Lely, wodde eerst de Ofsluutdiek anlegd, waordeur et Iesselmeer ontston. Hiernao woddden de poolders van de Noordoostpoolder, Oostelik Flevolaand en Zudelik Flevolaand anlegd. Daornao was et plan om ok et Markermeer in te poolderen. Om dit te doen bin ze in 1976 begonnen mit de anleg van de Houtribdiek, waor ok een weg op bouwd wodde (de N302), waordeur Lelystad en Enkhuzen mit mekeer verbunnen wodden. Sund de anleg van de diek is et Markermeer van et Iesselmeer scheiden.

Et inpoolderen is laeter niet weeromdri'jd om verschillende redenen. Zo speult et meer een belangrieke rolle in et instaandholen van de voegelstaand. Ok was et lastig veur de waeterhuushoolding in Noord-Hollaand. Deur et meer in te poolderen zol et grondwaeter in Noord-Hollaand de poolder instromen waordeur et gronwaeterpeil in de perveensie te leeg zol wodden. Hierdeur kan bi'jgelieks de grond votzakken.

In april 2007 prissenteerde staotssiktaoris Tineke Huizinga en ni'j plan veur de oolde Zuderzee. Et plan is om et gebied in drie patten te verdielen. Et Iesselmeer moet een hogere waeterstaand kriegen waor zeutwaeter in opsleugen kan wodden. Et Markermeer moet een wisselende waeterstaand kriegen veur een grotere ekelogische variaosie. Om et dadde pat, et IJmeer, moet een diek legd wodden waordeur d'r bouwd kan wodden. Veerdere uutwarking moet nog tot staand kommen.

Waeterofvoer

Et waeter in et Markermeer wodt op drie menieren ofvoerd:

Normaol wodt et waeter deur et Iesselmeer ofvoerd.
Zo now en dan gebeurt dit deur de Flevolaanse vaorten. Dan komt et waeter uuteinlik uut in de Veluweraandmeren. Zodoende moet et schonere waeter uut et Markermeer de belasting van nitraot en fosfaot in de raandmeren verminderen.
Bi'j hoog waeter wodt et waeter deur et Noordzeekenaol spuid.

Belangrieke plakken an et meer

Een peer grote plakken die an dit meer liggen:

Uutgaonde verwiezings

Infermaosie over et Markermeer op de webstee van Riekswaeterstaot