Forza Italia

Forza Italia è nu movimiento politeco taliano ca è stato funnato 'o 18 'e jennaro 1994. Presiriente e leader d''o partito è, sin d''a funnazzione soja, Silvio Berlusconi.

Forza Italia è stato 'o movimiento aggregatore d' 'a cualizzione 'e centro-destra nummenata Casa delle Libertà.'O suojo coordinatore nazziunale è Denìs Verdini. A livello cuntinentale aderisce ô Partito Popolare Europeo, 'e ca rappresenta 'o principale membro taliano.

Ll'ideologgia d' 'o partito cagna d'ô liberismo a ll'ecunumia sociale 'e marcato 'e spirazzione cristiano-democratica; 'o partito aspira a esse 'o partito d' 'o rinnovamento e d' 'a mudernizzazzione.'O culore d' 'o suojo ufficiale è l'azzurro.

Storia

'A nasceta e 'e primme coordinamiente

Sede nazziunale 'e Forza Italia a Romma (abbrile 2007).

'Forza Italia! Associazione per il buon governo' vene custituita 'ind'o studio d' 'o nutajo Roveda a Milano, 'o 29 'e giugno 1993 â cierte note professioniste, alcune 'nzerite 'int'a ll'azienne cuntrullate d' 'a Fininvest,cierte ate comunque vicine ô funnatore e proprietario d' 'o ca Silvio Berlusconi, 'nfra chiste s'hanna allicurdà Marcello Dell'Utri, Antonio Martino, Gianfrànco Ciaurro, Mario Valducci, Antonio Tajani, Cesare Previti e Giuliano Urbani.'O nommme venette pigliato d' 'o slogàn 'Forza Italia', ausato 'int'a campagna elettorale d' 'a Democrazia Cristiana d' 'o 1987, curata 'a Marco Mignani.

Berlusconi avvia a parlà 'e pulitica già 'a mese. 'O 19 'e màrzo 1993 lassa 'ntennere 'e esse preoccupato p' 'a situazzione puliteca'Berlusconi preoccupato p' 'e politice emergente', Corriere della Sera, 20 màrzo 1993, pag. 2..'O 10 'e maggio presiede 'o convegno 'Cambiare per rinascere: nuove idee, nuovi uomini', arò emerge 'o prufilo d' 'o partito ca vulesse 'o funnatore d' 'a Fininvest.

Inizialmente Berlusconi preferesce a ffà 'e cose cu' calma, ma ll'indiscrezzione aesciono, comme chella ca vô Giuliano Urbani ideologo d' 'o movimento berlusconiano.

'O 13 'e settembre Berlusconi se sbilancia cu' nu: "Vulesse fà nu partito"

'O 16 'e ottovre 'o settimanale d' 'a Mondadori, 'Epoca', mostra 'ngopp'a cupertina 'o logo d' 'e "Clùb Forza Italia". A 'indo ce stà na longa 'ntervista a Silvio Berlusconi ca nega 'e essere na sezzione 'e nu futuro partito politeco.

'O 22 'e ottovre 'o quotidiano 'La Repubblica' pubbleca cierte documente redatte â Urbani ca circoleno 'nfra 'e dirigiente 'e Berlusconi 'e argomento puliteco. Berlusconi però nega ll'appartenenza 'e 'ste documente e nega 'e esse 'o leadèr 'e nu partito puliteco.'Int'e juorne sicuente nega ll'organizzazzione soja diretta d' 'e clùb Forza Italia e accusa 'o gruppo Repubblica-l'Espresso 'e esse contro 'o gruppo suojo .

'O 23 'e novembre, Silvio Berlusconi, a Casalecchio di Reno (Bo), duranne l'inaugurazzione 'e nu ipermercato, dichiara ê giurnaliste ca "si 'o centro muderato s'organizzasse, nun putesse nun ffà niente direttamente, cuntanno 'ngopp'a fiducia ca sento 'e avè d' 'a gran parte d' 'a nostra gente". Pe'tramente dice, 'ngopp'a ll'elezzione cumunale 'e Romma, ca, si putesse vutà, 'o facesse ppe' Gianfranco Fini: maje n' imprennitore accussì 'mpurtante s'era dichiarato 'e 'sta manera p' 'o Movimento Sociale Italiano.

'O 25 'e nuvembre nasce l'Associazzione nazziunale d' 'e clùb 'e Forza Italia, strettamente ligata a ll' azienne ca fanno capa a Fininvest, cu' 'a sede in viale Isonzo a Milano.

'O juorno aroppo Berlusconi accette ll'invito 'e ll'Assuciazzione stampa estera a tenè na cunferenza stampa 'ngopp'e dichiarazzione suoje 'nguoll'a Fini.

'O 9 'e dicembre Berlusconi inaugura 'o primmo clùb Forza Italia e presenta l'inno 'e ll' "azzurri". 'O 15 'e dicembre vene araputa 'a sede centrale 'e Forza Italia 'ind'a nu palazzo in via dell'Umiltà a Romma ca è 'o stisso ca fuje sede d' 'o Partito Popolare Italiano 'e Don Giggino Sturzo. 'O 18 'e jennaro 1994 Berlusconi, Tajani, Luigi Caligaris, Martino, Valducci, danno vita ô "Movimento Politico Forza Italia". Ll'annuncio d' 'a "discesa in campo" vene dato cu' nu messaggio pe' televisione 'o 26 'e jennaro;ll'uso 'e chistu miezzo particulare p' 'a politeca tradizziunale provoca commente ca vanno â ll'ammirazzione p' 'o carisma 'e Berlusconi â preoccupazzione ppe' 'sta presa 'e putere cunziderata â paricchie distorsiva p' 'o buono funzionamento d' 'a democrazzia pe' 'sta cuncentrazzione 'e putere mediateco 'ngopp'a unu sulo cristiano assaje diverzamente rispetto a ll'ate Paise occidentale.

Subbeto 'o partito se presenta comma a na novità assoluta pure 'int'e strutture organizzative: ô posto 'e nu segretario (comme 'ind'a ll'ate partite) ce stà nu presidente (Berlusconi), 'mmece ca na "direzzione nazziunale" ce sta 'o "comitato 'e presidenza", cumpuso â Silvio Berlusconi, Antonio Martino, Giggino Caligaris, Antonio Tajani, Mario Valducci (ammenistratore nazziunale).Nun ce stà nimmanco n'"assemblea nazziunale" ma l'assemblea 'e ll'assuciate (ll'iscrizzione steva cientumila lire, cu' ll'omaggio 'e l'audiocassetta cu' ll'inno). 'O movemento nun tene manco sizzione communale e pruvinciale, ma sulo rappresentanza reggiunale e 'a seda centrale rumana ca però nun è chella ca coordina 'e clùb ca stà a Milano.

Data 'a struttura, ll'origgine e 'a presenza 'e ll'interno, a chesta fase, 'e assaje uommene 'e Fininvèst e Publitalia '80, se parlarrà â subbeto 'nfra 'e nemmice 'e "partito-azienda", 'e "partito 'e plastica", 'e "partito persunale" (p' 'nzignà nu partito cumpretamente novo, diverzo d'â tradizziona libberale, funnata 'ncopp'a lealtà 'nconnizzionata 'int'e confronte d' 'o capo, nun 'int'e confronte 'e n'idea o 'e nu pruggietto).

'A campagna elettorale e 'a vittoria d' 'o 1994

'Ind'o storeco discorzo d' 'o 26 'e jennaro Berlusconi innica Forza Italia comme a nu movimento politeco chiuttuosto ca nu partito vero e propeto e cu' chesto se cannida â guida d' 'o Paese.

'O 6 'e febbraro, ô Palafiera 'e Romma, se tene 'a primma 'conventiòn' 'e Forza Italia e Berlusconi fà 'o primmo discorso â leadèr politeco.

'O 27-28 'e màrzo, cu' 'e risultate 'e ll' elezzione pulitiche, Forza Italia risulta comme 'o primmo partito taliano ch' 'o 21% d' 'e vote e va â guida d' 'o Guvierno 'nzieme a ate partite 'e ll'area 'e centrodestra: ô Nord ll'alleanza è chiammata Polo delle Libertà (Forza Italia, CCD, Lega Nord), ppe'tramente ô Sud Polo del Buon Governo (Forza Italia, Alleanza Nazionale, CCD). Jesceno battute 'a coalizzione 'e sinistra d' 'eProgressisti e 'a coalizzione centrista d' 'o Patto per l'Italia (Partito Popolare Italiano e Patto Segni).

'O succiesso 'e Forza Italia pô essere attribuito a duje fatture (aroppo â forza ecunomica e mediateca d' 'o suojo leadèr): a differenza 'e ate persunagge "nuovi" cumparze 'ncopp'a scena puliteca, comme Mario Segni, Berlusconi s' appellava a interesse suciale cchiù precise e fucalizzate, comme chilli d' 'e lavuratore autonome; e poje Berlusconi cuntava pure 'ngopp'a na granne polarizzazzione tra destra e sinistra, luvanno â miezo ipotese 'e centrismo ca venevano ignorate pe' vija d' 'a radicalizzazzione d' 'o scontro. Ovviamente 'a semplificazzione d' 'e termine d' 'o scontro eletturale, pure p' 'a luntananza soja d'â puliteca "viecchia" fatta 'e cumpromesse, era bbuono pe' na campagna 'e "lancio" d' 'o marchio sviluppato cu' nu succiesse maje visto. Se ponno jognere pure fatture comme l'appello all'efficienza, 'a sfiducia verzo 'a puliteca tradizziunale e 'a costruzzione 'e ll'immaggine d' 'o leadèr comme ommo deciso ma disinteressato, forte ma generoso.

L'aspietto anomalo era rappresentato â ll'alleate: Forza Italia era infatte cualizzata ch' 'a Lega Nord 'int'e reggione settentriunale, addò Alleanza Nazionale s'appresentava isulata, e ch' 'o partito guidato â Gianfranco Fini ô centro-sud: nun na coalizzione, in sostanza, ma ddoje.

'O breve Guvierno Berlusconi I

P' 'o 90% 'e ll'elette 'int'e liste 'e Forza Italia risultaje 'a primma esperienza parlamentare. 'O centro-destra riuscette a se piglià 'a maggioranze d' 'e segge â Camera dei Deputati, ma nun ô Senato. Assaje 'mpurtante p' 'a nasceta d' 'o guvierno fujono accussì 'e vote 'e tre senature a vita (Gianni Agnelli, Francesco Cossiga e Giovanni Leone) e 'e quatto senature aelette 'int'e liste d' 'o Patto per l'Italia (Giulio Tremonti, ca addivintaje menisto d' 'e Finanze, Vittorio Cecchi Gori, Alberto Michelini e Luigi Grillo).

Cu' tutto ca c'era stato 'o granne risultato ottenuto â Forza Italia ê sicuente aelezzione europee d' 'o stisso anno (circa 'o 30%), 'o primmo guvierno Berlusconi duraje poche mise. Na proposta d' 'o Guvierno ppe' rifurmà 'o sistema pensionisteco 'ncuntraje 'a forta opposizzione d' 'e sinnacate, ca pruclamajono 'o sciopero generale. Sagliette accussì 'a crise politeca 'nfra 'a Lega Nord e 'o riesto d' 'a maggioranza. Subbeto aropp'a vittoria elettorale, Bossi heva già manifestato 'o disagio suojo a guvernà 'nzieme â politeca d' 'o Movimento Sociale Italiano ( ca stesso isso definiva "fascista").

'O scontro diretto venette â vegilia d' 'e vacanze natalizzie, 'nfra 'o 21 e 'o 22 'e dicembre: in diretta pe' televisione Silvio Berlusconi, dichiaraje ch' 'o patto firmato ch' 'a Lega all'inizio 'e ll'anno nun era stato mantenuto e chiedette e 'e nnove elezzione. Bossi, pe' quanto riguarda 'o suojo, avviaje a accusà pure isso, dicenno ca l'accordo 'ncopp'o federalismo era stato assaje trascurato d'ô guvierno.'A Lega facette n'alleanza ch' 'o Partito Popolare, 'nzieme 'o ca appresentaje na mozzione 'e sfiducia. Accussì succedette 'a crise: Berlusconi, p' evità 'e essere sfiduciato, dette 'e dimissioni, chiedenno p' 'e ll'elezzione anticipate e spingenno ll' elettore a na "rivolta morale" contr'o cambio 'e maggioranza ('nzignato ch' 'o cuntrannomme 'e "ribaltone").

'O Presidente d' 'a Repubblica, Oscar Lugi Scalfaro nun pigliaje in considerazzione l'alternativa d' 'e nove elezzione,pecchè se puteva costituì benissimamente n'ata maggioranza.'A Lega decidette aroppo, 'nzieme ê parlamentare pupulare e d' 'a sinistrà,p' 'e nu guvierno tecnico presieduto â Lamberto Dini. Forza Italia e 'o riesto 'e ll'èx maggioranza 'e centro-destra, aroppo a n'inizziale appoggio p' 'a nomina 'e Dini (menisto d' 'o Tesoro 'int'o Guvierno Berlusconi, Dini era stato 'nfra 'e meglie sosteniture d' 'a contestata riforma d' 'e pensione), venetteno meno aropp'a pubblicazzione 'e ll'elenche d' 'e meniste e turnajeno a chiedere ll'elezzione anticipate. 'O Guvierno Dini se pigliaje 'o stesso 'a fiducia.

'O Polo arrefonne ll' elezione

Cunzumata 'a spaccatura ch' 'a Lega, 'int'o 1996, 'o schieramento d' 'o Polo per le Libertà compuso â Forza Italia, Alleanza Nazionale, CCD e CDU, arrefonne ll' elezzione. Se forma 'o guvierno 'e ll'Ulivo, 'a coalizzione avversaria, presieduta â Romano Prodi, ma - 'int'o '98 - pure chistu esecutivo è distinato a essere sfiduciato, accussì 'o guvierno passa 'int'e mmane 'e Massimo D'Alema, assaje avversato â Forza Italia, pure pecché 'o suojo guvierno riceve l'appoggio 'e diverze parlamentare elette cu' 'o Polo. Berlusconi denuncia: "Chistu guvierno nasce ch' 'a rappresentanza 'e nu milione 'e nuoste "elettore".

'E consense, pe'tramente, saglieno 'e nummero: Forza Italia e 'o Polo vinceno ll' Europee d' 'o '99 e 'e Reggiunale d' 'o 2000.

'A vittoria d' 'o 2001 e ll' anne 'e guvierno

Accussì, 'int'o 2000, aroppo ca 'a Lega aveva abbannunato 'e proposite suoje secessioniste, s'arrecocchia nuovamente l'alleanza, ca piglia 'o nomme 'e Casa delle Libertà, araputa pure ê contribbute d' 'e partite e d' 'e movimente cchiù piccerelle .

'A CdL vince ll' elezzione e saglie ô guvierno d' 'o Paese. Duranne 'a campagna eletturale Berlusconi sigla, 'ind'a 'a trasmissiona 'Porta a Porta' prisintata â Bruno Vespa, 'o famoso Cuntratto ch' 'e taliane: n' accordo 'nfra isso e 'e suoje putenziale elettore ch' 'o ca s' 'mpegna, in caso 'e vittoria, a realizzà gruosse sgrave fiscale, 'o dimezzamento d' 'a disoccupazzione, l'avviamento 'e dicine 'e opere pubbleche, l'aumento d' 'e penzione minime e 'a riduzzione d' 'o nummero 'e reate; dicenno pure ca si nun êssa mantenuto almeno quatto 'e 'sti prumesse nun s'êssa cchiù ricandidato ê prossime elezzione.

Forza Italia, pe'tramente, saglie ô guvierno d' 'o Paese, nu guvierno (guidato stesso â Berlusconi) ch'have 'o primato 'e "cchiù luongo" 'int'a storia d' 'a Repubblica. Addura mmerzo 1.422 juorne.

A partì â ll' elezzione reggiunale d' 'o Friuli-Venezia Giulia, 'int'o 2003, e 'int'e sicuente consultazzione eletturale, Forza Italia reggistra na prugressiva scesa 'e consense, pure si addummaneva 'a lista cchiù vutata d' 'a Casa delle Libertà. Aroppo 'a scunfitta 'e Reggiunale d' 'o 2005, 'o centrodestra mantene surtanto duje riggione (Lummardia e Veneto) 'e ll' otto precedentemente guvernate. A chistu proposeto, aroppo na longa 'verifica' avviata mise apprimma, cierte partite d' 'a coalizzione chiedeno nu rilancio d' 'o prugramma e 'e ll'attività 'e guvierno. Accummencianno formalmente 'a crise cu' 'o ritiro d' 'e meniste 'e ll'UDC e d' 'e membre d' 'o guvierno d' 'o Nuovo PSI, 'a tensione 'nfra Berlusconi e 'o segretario UDC Marco Follini è assaje gruossa: indiscrezzione cumparze 'ngopp'e principale quotidiane nazziunale contano 'e minaccie 'e nu "trattamiento speciale" 'ngopp'e rete Mediasèt contro a chisto. Silvio Berlusconi riesce però a cummuglià n'ata vota 'a coalizzione - a ffà cierte concessione a ll' alleate - e a s'piglià accussì 'a fiducia ppe' nu novo esecutivo.

Ll' elezzione d' 'o 2006

'A campagna eletturale pe' ll' elezzione puliteche d' 'o 2006 è una d' 'e cchiù eclatante 'e tuttaquanta 'a storia. Forza Italia e 'a coalizzione 'e centrodestra, guidata â Berlusconi, s' appresentajono a ll'elettore chiedenno nu giudizzio positivo 'ngopp'a ll'esperienza d' 'o guvierno, durato cinche anne. 'O sfidante, Romano Prodi, s'appresentaje cu' na coalizzione 'e centrosinistra rinnuvata, naturalmente cu' nu giudizzio assaje cuntrariato 'ncopp'o guvierno 'e centrodestra.

Berlusconi partecipaje a duje confronte ufficiale pe' televisione ch' 'o sfidante suojo, duranne 'e ca accusaje 'a sinistra 'e essere spartuta 'ngopp'e principale proposte ecunomiche.'O mumento cchiù 'mpurtante d' 'a campagna elettorale 'e Berlusconi fuje però nu clamoroso e inaspettato 'nterviento a n'assemblea d' 'a Confindustria, attaccanno 'e rivale 'ngopp'e temi 'e ll'ecunomia e d' 'a giustizzia. In chiusura d' 'a campagna, 'o Presidente d' 'o Consiglio uscente menaje 'a proposta 'e l'abolizzione 'e l'ICI 'ncopp'a primma casa.

'A Casa delle Libertà riuscette accussì a s'arrepiglià 'a fiducia 'e assaje elettore e Forza Italia reconquistaje 'a leadershìp 'ind'a coalizzione, pigliannose nu risultato assaje positivo rispetto 'e previsione (ma meno 'mpurtante rispetto a ll' elezzione d' 'o 2001), ma ca comunque nun abbastaje pe' evità 'a sconfitta eletturale d' 'o centrodestra. Cammera d' 'e deputate 'o centrosinistra avette, cu' 24.755 vote 'e cchiù, 'o premmio 'e maggioranza prevista d' 'a legge eletturale promulgata 'int'o 2005 e a totale (cuntanno pure 'e vote d' 'o Trentino-Avere Arece, d' 'a Valle 'e Aosta e d' 'a circoscrizzione Estero) mmerzo 130.000 vote 'e cchiù, cu' na percentuale d' 'o 49,73% 'e cunsienze 'e contro 'o 49,40% d' 'a CdL.

Ô Senato, 'a situazzione era arrevutata: 'a CdL avette a totale mmerzo 147.000 vote 'e cchiù ('o 49,57% 'e contro 'o 49,16%), ma p' 'o sistema d' 'e sbarramente reggiunale privisto d' 'a legge eletturale, promulgata d' 'o Guvierno Berlusconi III, e cu' l'apporto d' 'o voto d' 'a circoscrizzione Estero, Ll'Unione riuscette 'o stesso a s'piglià ddoje segge 'e cchiù.

Forza Italia, cu' tutto ca c'era stato nu forte calo rispetto 'e politiche d' 'o 2001 (- 6% â Cammera), risulta â Cammera comme 'a siconna forza puliteca taliana cu' 9 miliune 'e vote (23,7%) areto 'a lista L'Ulivo (ca è ll'aunione 'e duje partite, 'e Democratici di Sinistra e La Margherita) ca mmece ha avuto 11,9 miliune 'e vote e ô Senato (addò 'e Democratici di Sinistra e La Margherita se songo apprisintate spartute) comme 'a primma forza puliteca d' 'o paese cu' 8,2 miliune 'e vote (24,0%). Aelegge (cumprese ll'elette 'int'a circoscrizzione Estero) 140 deputate e 79 senature.'A presidenza d' 'o gruppo â Camera dei Deputati vene assunta â Elio Vito,ppe'tramente ô Senato a cumannà 'o gruppo è Renato Schifani, tutte e ddoje già â guida d' 'e rispettive gruppe parlamentare 'int'a legislatura 'e primma.

'A Trasuta 'int'o PdL

'O 18 'e nuvembre 2007 int'â chiazza San Babila a Milano Berlusconi annuncia 'a supressa 'e Forza Italia e 'a nasceta 'e na nova formazzione puliteca, Il Popolo della Libertà (PdL), aroppo a n' iniziativa 'e arrecocchio 'e firme ppe' favurì ll'elezzione anticipate.

Forza Italia addiventa accussì formazzione prumutrice d' 'o novo suggietto unitario, voluto aropp'a caduta d' 'o Guvierno Prodi, e pe' chesto s'è appresentato 'nzieme a Alleanza Nazionale e a ate muvimiente e partite pulitice 'e ll'ex-coalizzione 'int''e lliste d' 'o PdL, aspetanno 'a difinitiva nasceta d' 'o PdL comme partito privisto aprimma ppe' l'autunno 2008 e, aroppo, annunciato p' 'o 27 'e màrzo 2009. Ll' elezzione vedetteno 'a vittoria d' 'a coalizzione cumpusa â PdL, Lega Nord e Movimento per l'Autonomia e 'o rituorno ô guvierno d' 'o centro-destra.

Valure

Stà scritto 'int'a "Carta d' 'e Valure" d' 'o partito:

« Forza Italia nun nasce â na precedente organizzazzione puliteca o â nu custituito sistema dottrinale. Nasce â ll’appello 'e n' ommo, Silvio Berlusconi, addirettamente rivolto a nu cuorpo eletturale 'int'o ca rischiava 'e s'arapì na grossa ammaccatura storico-puliteca 'e rappresentanza. Forza Italia se costituesce comme risposta â crise d' 'e partite d' 'a Primma Repubblica; comme reazzione a na possibbile deriva illibberale d' 'o sistema puliteco; comme offerta 'e rappresentanza a ll’area d' 'e muderate 'int'o quadro 'e na nova democrazzia 'e ll’alternanza; comme pruposta 'e guvierno ppe' realizzà na sicònna mudernizzazzione taliana. »

'O statuto d' 'o partito dice ca Forza Italia è na assuciazzione 'e cittadine ca s'arrecanoscono 'ind'a ll'ideale proprie d' 'e tradizzioni democratiche libberale, cattolilche libberale, laiche rifurmiste europeeStatuto di Forza Italia, art. 1. Silvio Berlusconi, 'int'o 1998, ha definito 'o muvimiento comme:

• nu partito libberale ma nun elitario, anze nu partito liberaldemocratico pupulare;
• nu partito cattolico ma nun cunfessionale;
• nu partito laico ma nun intollerante o laicista;
• nu partito nazziunale ma nun centralista.

Forza Italia se definsce nu "partito nuovo", senza legame dirette ch' 'a accussidditta Primma Repubblica e, pe'tramente, liggittima erede d' 'e "meglie tradizzioni pulitiche taliane". 'O democristiano Alcide De Gasperi, 'o socialdemocratico Giuseppe Saragat, 'o liberale Luigi Einaudi e 'o repubblicano Ugo La Malfa songo citate 'int'o preambolo d' 'o statuto 'e Forza Italia comme nobbili patri ê ca 'o partito 'ntenne 'e fà riferimento. Mmo Forza Italia s'rifà a n'identità 'e centrodestra, a ffà parte d' 'o Partito Popolare Europeo, ma senza limità ppe' chesto ll'apertura â tradizzione d' 'a sinistra rifurmista (comme se vere 'int'e riferimiente 'e persunalità d' 'a sinistra muderata), cu nu forte richiamo ô penziero d' 'o sucialismo libberale.

Sempe d'â "Carta d' 'e Valure":

« Stammo allora costruenno nu suggietto puliteco maje visto p' 'a storia d’Italia. Nu suggietto ca se propone ll'aunione 'e tre granne aree pulitico-culturale: chella d' 'o cattolicesimo libberale e pupulare, chella 'e ll’umanesimo laico, libberale e repubblicano, chella d' 'o libberal-socialismo. »

« Simmo cchiuttuosto nu novo partito 'e centro, libberal-pupulare e libberal-sucialista; alleato ch' 'a destra muderata e apierto â cultura d' 'a sinistra rifurmista. »

Forza Italia è nu partito essenzialmente cuncintrato 'ncopp'a fiura d' 'o leadèr d' 'o suojo. Ll'orientamiento puliteco 'e Forza Italia è muderato-libberale.'A struttura 'e furmazzione è diretta â don Gianni Baget Bozzo [1] e 'a linea puliteca è 'nfluenzata â Ferdinando Adornato (direttore d' 'o mensile "Liberal") ca ha circato 'e readattà 'o neoconservatorismo d' 'e State Aunite ô cuntiesto puliteco-culturale taliano. Adornato s'è cuncintrato 'ncopp'o pruggietto 'e mettere assieme 'e partite 'e ll'area 'e centrodestra attravierzo 'a criazzione 'e nu novo suggietto puliteco unitario.

Forza Italia sustene 'a parità 'e 'mpurtanza tra scola privata e scola pubbleca; crede ca 'e vincule pubbliche â libbera 'nizziativa 'mprennituriale vanno luvato â miezo o assaje ridotte; se batte pe' nu sistema tribbutario ca nun se mette comme fine â redistribuì 'a ricchezza ma comme orientamiento d' 'e conzume e, quinne, cuncintrato 'ngopp'a ll' imposte 'ndirette e 'ngopp'a chelle reali, chiuttosto ca 'ngopp'a chelle dirette e personale; prupone 'a separazzione d' 'e carriere 'nfra maggistratura giudicante e maggistratura 'nquirente; p' 'a puliteca estera piglia na linea assaje atlantista. Sustene, poje, 'e posizzione 'e libbertà 'e cuscienza pe' tematiche 'ngopp'a bioetica.

Struttura

'A struttura 'e Forza Italia è prevalentemente verticistica: 'e coordinature nazziunale e reggionale songo nummenate direttamente d'ô presidente d' 'o movimento, Silvio Berlusconi.Ll'iscritte,mmece, ponno aeleggere 'e coordinature d' 'e clùb lucale e 'e coordinamente pruvinciale.

Jonte 'a fore

• forza-italia.it
  
• ragionpolitica.it