Miedo
L miedo ye un sentimiento que perporciona un stado d'alerta demunstrado pul receio de fazer algo, giralmente por se sentir amanaçado, tanto fesicamente cumo psicologicamente. Grima ye la énfase de l miedo.
L miedo puode porbocar reaçones físicas cumo çcarga de adrenalina, acelaraçon cardíaca i tremor. Puode porbocar atençon eisagerada a todo qu'acuntecer al redror, depresson, pánico etc.
Miedo ye ua reaçon oubtenida a partir de l cuntato cun algun stímulo físico ó mental (anterpretaçon, eimaginaçon, fé) que gera ua repuosta d'alerta ne l'ourganismo. Esta reaçon enicial çpara ua repuosta fesiológica ne l'ourganismo que lhiberta hormónios de l stresse (adrenalina, cortisol) perparando l'andebíduo para lhuitar ó fugir.
La repuosta anterior al medo ye coincida por ansiadade. Na ansiadade l'andebíduo teme antecipadamente l'ancuontro cula situaçon ó oubjeto que le causa miedo. Sendo assi, ye possible se traçar ua scala de graus de miedo, ne l qual, l mássimo serie l grima i, l mínemo, ua lhebe ansiadade.
L miedo puode se trasformar nua malina (la Fobie) quando passa a cumprometer las relaçones sociales i a causar sofrimiento psíquico. La técnica mais outelizada puls psicólogos para tratar l miedo se chama Dessensibelizaçon Sistemática. Culha se custrui ua scala de miedo, de la lhebe ansiadade até l grima, i, als poucos, l paciente bai sendo ancorajado a anfrentar l miedo. Al fazer esso l paciente passa, als poucos, por un porcesso de restruturaçon cognitiba an qu'acuntece ua re-daprendizaige, ó resseneficaçon, de la reaçon qu'antes geraba la repuosta d'alerta ne l'ourganismo para ua reaçon mais eiquelibrada.
