Guerra Junqueiro

	Ls outros porjetos Wikimedia tamien ténen material subre este tema:
	Citaçones ne l Wikiquote
	Testos oureginales ne l Wikisource

Abílio Manuel Guerra Junqueiro
Nacimiento	17 de setembre de 1850; Freixo de Spada a Cinta
Muorte	7 de júlio de 1923 (72 anhos); Lisboua
Nacionalidade	Pertual Pertués

Státua na Casa-Museu Guerra Junqueiro, ne l Porto.

Abílio Manuel Guerra Junqueiro (Freixo de Spada a Cinta, 17 de Setembre de 1850 — Lisboua, 7 de Júlio de 1923) fui bacharel formado an dreito pula Ounibersidade de Coimbra, alto funcionairo admenistratibo, político, deputado, jornalista, scritor i poeta. Fui l poeta mais popular de la sue época i l mais típico repersentante de la chamada "Scuola Nuoba". Poeta panfletairo, la sue poesie ajudou criar l'ambiente rebolucionairo que cunduziu a l'amplantaçon de la República.

Biografie

Naciu an Frezno de Spada a la Cinta la 17 de Setembre de 1850, filho de l negociante i lhabrador abastado José António Junqueiro i de sue mulhier D. Ana Guerra. La mai morriu quando Guerra Junqueiro cuntaba solo 3 anhos d'eidade.

Studou ls purparatórios an Bergáncia, matriculando-se an 1866 ne l curso de Teologie de la Ounibersidade de Coimbra. Cumprendendo que nun tenie bocaçon pa la bida relegiosa, dous anhos depuis trasferiu-se pa l curso de Dreito. Treminou l curso an 1873.

Antrando ne l funcionalismo público de la época, fui secretairo-giral de l Gobernador Cebil de ls çtritos de Angra de l Heiroísmo i de Biana de l Castielho.

An 1878, fui eileito deputado pul círclo de Macedo de Cabalheiros.

Morriu an Lisboua la 7 de Júlio de 1923.

Obra lhiterária

Guerra Junqueiro ampeçou la sue carreira lhiterária de modo pormissor an Coimbra ne l jornal lhiterairo "La fuolha", deregido pul poeta João Peinha, de l qual mais tarde fui redator. Eiqui cria relaçones d'amisade cun alguns de ls melhores scritores i poetas de l sou tiempo, grupo giralmente coincido por Geraçon de 70.

Guerra Junqueiro zde mui nuobo ampeçou a manifestar notable talento poético, i yá an 1868 l sou nome era ancluído antre ls de ls mais sperançosos de la nuoba geraçon de poetas pertueses. Ne l mesmo anho, ne l'oupusclo chamado "L Aristarco pertués", apreciando-se l lhibro "Bozes sin retombo", publicado an Coimbra an 1867 por Guerra Junqueiro, yá se prognostica un feturo ouspecioso al sou outor.

Ne l Porto, na mesma data, aparecie outra obra, "Batismo d'amor", acumpanhada dun preámbulo scrito por Camilo Castelo Branco; an Coimbra publicara Guerra Junqueiro la "Lhira de ls catorze anhos", belume de poesies; i an 1867 l poemeto "Mysticae nutiae"; ne l Porto la casa Chardron eiditara-le an 1870 la "Bitória de la Fráncia", que depuis reiditou an Coimbra an 1873.

An 1873, sendo proclamada la República an Spanha, screbiu inda nesse anho l bemente poemeto "A la Spanha lhibre".

An 1874 apareciu l poema "La muorte de D. João", eidiçon feita pula casa Moré, de l Porto, obra qu'alcançou grande sucesso. Camilo Castelo Branco cunsagrou-le un artigo nas Nuites d'ansónia, i Oliveira Martins, na rebista "Artes i Lhetras".

Ando residir para Lisboua fui colaborador an prosa i an berso, de jornales políticos i artísticos, cumo la "Lhanterna Mágica", cula colaboraçon de zeinhos de Rafael Bordalo Pinheiro. An 1875 screbiu l "Crime", poemeto a perpósito de l'assassínio de l'alferes Palma de Brito; la poesie "Als Beteranos de la Lhibardade"; i l belume de "Cuontas pa l'anfáncia". Ne l "Diário de Amboras" tamien publicou l poemeto Fiel i la cuonta Na Feira de la Lhadra. An 1878 publicou an Lisboua l poemeto Tragédia anfantil.

Ua grande parte de las cumposiçones poéticas de Guerra Junqueiro stá reunida ne l belume que ten por títalo La musa an bacanças, publicado an 1879. Neste anho tamien saliu l poemeto L Mielro, que depuis fui ancluído na Belheç de l Padre Eiterno, eidiçon de 1885. Publicou Idílios i Sátiras, i traduziu i colecionou un belume de cuontas de Hans Christian Andersen i outros.

Passado ua stada an Paris, aparentemente para tratamiento de malina digestiba cuntraída durante la sue stada ne ls Açores, publicou an 1885 ne l Porto La belheç de l Padre Eiterno, obra que porbocou acerbas réplicas por parte de l'oupenion clerical, repersentada na amprensa, antre outros, pul cónego José Joaquim de Sena Freitas.

Quando se dou l cunflito cula Anglaterra subre l "mapa quelor-de-rosa", que culminou cul ultimato británico de 11 de Janeiro de 1891, Guerra Junqueiro antressou-se perfundamente nesta crise nacional, i screbiu l'oupusclo Finis Patriae, i la Cançon de l Rábia, pa la qual Miguel Ángelo Pereira screbiu la música. Apuis publicou l poema Pátria. Estas cumposiçones tubírun ua eimensa repercusson, cuntribuindo poderosamente pa l çcrédito de las anstituiçones monárquicas.

Lhista de Obras

Biaige A la Ruoda De la Parbónia
La Muorte De D. João (1874)
Cuntos pa la Anfáncia (1875) ^(eBook)
La Musa An Bacanças (1879)
La belheç de l padre eiterno (1885) ^(eBook)
Finis Patriae (1890)
Ls Simples (1892) ^(eBook)
Pátria (1915) ^(eBook)
Ouraçon Al Pan (1903)
Ouraçon A la Luç (1904)
Poesies Çpersas (1920)
dues Paginas De ls Quatorze Annos ^(eBook)
L Mielro ^(eBook)

Cronologie

1850: Nace ne l lhugar de Ligares, Freixo de Spada a Cinta;
1864: « dues páiginas de ls quatorze anhos»;
1866: Frequenta l curso de Teologie na Ounibersidade de Coimbra;
1867: «Bozes Sin Retombo»;
1868: «Batismo de Amor». Matricula-se na Faculdade de Dreito de la Ounibersidade de Coimbra;
1873: «Spanha Lhibre». Colaboraçon de Guerra Junqueiro an «La Fuolha» de João Peinha. Ye baxarel an Dreito;
1874: «La Muorte de D. João»;
1875: Purmeiro númaro de «La Lhanterna Mágica» an que colabora;
1878: Ye nomeado Secretairo Giral de l Gobierno Cebil an Angra de l Heiroísmo;
1879: «La Musa an Bacanças» i «L Mielro». Adere al Partido Progressista. Ye trasferido de Angra de l Heiroísmo para Biana de l Castielho i eileito pa la Cámara de ls Deputados;
1880: Casa a 10 de Febreiro cun Filomena Augusta da Silva Neves. A 11 de Nobembre nace la filha Maria Isabel;
1881: Nace la filha Júlia. Anterditada por deméncia ben a ser anternada ne l Porto;
1885: «La Belheç de l Padre Eiterno». Criaçon de l mobimiento «Bida Nuoba» de l qual Guerra Junqueiro ye simpatizante;
1887: Segunda biaige de Guerra Junqueiro la Paris;
1888: Custitui-se l grupo «Bencidos de la Bida». «La Lhegítima»;
1890: «Finis Patriae». Guerra Junqueiro ye eileito deputado pul circlo de Quelimane;
1895: Bende la maior parte de las coleçones artísticas qu'acumulara;
1896: «La Pátria». Parte pa Paris;
1902: «Ouraçon al Pan»;
1903: Mora an Bila de l Conde;
1904: «Ouraçon a la Luç»;
1905: Bejita la Academie Politécnica de l Porto i anstala-se nesta cidade;
1908: Ye candidato de l Partido Republicano pul Porto;
1910: Ye nomiado Ambiado Straordinário i Menistro Plenipotenciário de la República Pertuesa junto de la Cunfederaçon Suíça, an Berna;
1911: Houmenaige a Guerra Junqueiro ne l Porto;
1914: Sonera-se de las funçones de Menistro Plenipotenciário;
1920: «Prosas Çpersas»;
1923: Muorre-se a 7 de Júlio an Lisboua.