Psikolinguistik

Psikolinguistik adolah ilimu multidisipliner barupo panggabuangan antaro ilimu psikologi jo ilimu linguistik. Psikolinguistik mampalajari faktor-faktor psikologis jo neurobiologis nan mamungkinkan manusia mamparoleh, manggunoan, jo mamahami bahaso. Kajiannyo samulo labiah banyak basifaik filosofis karano masih saketeknyonya pamahaman tentang proses utak manusia bafungsi. Mako dek karano itu, psikolinguistik sangaik erat kaitannyo jo psikologi kognitif. Panalitian modern manggunoan biologi, neurologi, ilmu kognitif, jo teori informasi untuak mampalajari caro utak mamproses bahaso.

Psikolinguistik maliputi proses kognitif na dapek manghasiaan kalimat nan mampunyoi arti jo tapek sacaro tata bahaso dari pabendaharoan kato jo struktur tata bahaso, tamasuak pulo proses nan mambuek ungkapan, kato, tulisan, dan sabagainyo manjadi dapek dipahami. Psikolinguistik pakambangan mampalajari kamampuan bayi jo anak-anak dalam mampalajari bahaso, biasonyo jo metode eksperimental dan kuantitatif (babeda pulo jo pangamatan naturalistik sarupo nan dilakuan dek Jean Piaget dalam panalitiannyo tentang pakambangan anak).

Dengan kato lain, psikolinguistik mamaparkan hakikat struktur bahaso, sarato jo bagaimano struktur iko didapek, digunoan pado wakatu batutu, dan pado wakatu mamahami kalimat-kalimat dalam patutuaran tasabuik.

Psikologi, Linguistik, jo Psikolinguistik

Psikologi

Psikologi marupoan ilimu nan mangkaji tingkah laku manusia sarato hubuangan-hubuangan antar sasamo manusia. Mako dek karano abstraknyo jiwa manusia, mako objek material psikologi adolah takaik jo aktivitas-aktivitas jiwa nan taramati malalui tingkah laku manusia. Urang nan mampalajari tingkah laku itu disabuik sabagai psikolog.

Linguistik

Linguistik (IPA: [liŋuistik]) atau ilimu bahaso marupoan ilimu nan mampalajari tentang bahaso sacaro ilmiah. Linguistik mampalajari fenomena kabahasoan dengan baragam caro dan dari babagai suduik pandang.

Psikolinguistik

Psikolinguistik marupoan disiplin ilimu nan mampasoalkan sarato jo mandeskripsikan proses psikologis nan manjadian manusia dapek mamahami jo mangguoan bahaso. Bidang psikolinguistik mangandalkan pulo ilimu neurologi, tarutamo bagi pakar psikolinguistik nan mampalajari pulo pabedaan jinih kalamin, afasia, bahaso sasudah cedera bawaan atau didapek pado utak nan alum matang, sarato gangguan pakambangan bahaso (disfasia).

Topik

Sacaro rinci, psikolinguistik mampalajari ampek topik utamo:

• Komprehensi marupoan proses-proses mental nan dilalui dek manusia sahinggo dapek manangkok pakatoan urang lain sarato mamahami mukasuiknyo.
• Produksi marupoan proses-proses mental pado manusia sahinggo dapek barujar sarupo nan diujarkan.
• Landasan biologis jo neurologis sahinggo manusia dapek babahaso.
• Pamarolehan bahaso marupoan proses anak mandapekan bahasa.

Subdisiplin

Psikolinguistik mangalami pakambangan pesat sahinggo malahiakan babarapo subdisiplin psikolinguistik:

• Psikolinguistik Teoretis
• Psikolinguistik Perkembangan
• Psikolinguistik Sosial
• Psikolinguistik Pendidikan
• Psikolinguistik-Neurologi (Neuropsikolinguistik)
• Psikolinguistik Eksperimen
• Psikolinguistik Terapan

Area studi

Psikolinguistik basifaik interdisipliner dan dipalajari dek ahli dalam babagai bidang, sarupo psikologi, ilimu kognitif, jo linguistik. Psikolinguistik adolah perilaku babahaso nan disababkan dek interaksinyo jo caro bapikia manusia. Ilimu iko manaliti tentang pamarolehan, produksi, jo pamahaman manusia tahadok bahaso. Ada beberapa subdivisi dalam psikolinguistik yang didasarkan pada komponen-komponen yang membentuk bahasa pada manusia:

• Fonetik jo fonologi mampalajari bunyi ucapan. Di dalam psikolinguistik, panalitian tafokus pado proses otak mamproduksi jo mamahami bunyi-bunyi iko.
• Morfologi mampalajari struktur kalimat, tarutamo hubungan antaro kato nan bahubuangan dan pambantuakan kato-kato badasarkan pado aturan-aturan.
• Sintaksis mampalajari pola-pola nan manantuan bagaimano kato-kato dikombinasikan basamo mambantuak kalimat
• Semantik bahubuangan jo makna dari kato atau kalimat. Bilo sintaks bahubuangan jo struktur formal dari kalimat, semantik bahubuangan jo makna aktual dari kalimat.
• Pragmatik bahubuangan jo peran konteks dalam penginterpretasian makna.
• Studi tentang caro manganali jo mambaco kato manaliti proses nan tacakup dalam pamarolehan informasi ortografik, morfologis, fonologis, jo semantik dari pola-pola dalam tulisan.

Pamarolehan bahaso

Tadapek babarapo teori nan bakaitan jo pamarolehan bahaso pado bayi jo balita nan basumber pado pakambangan psikologi nan basifat natur jo nurtur. Natur adolah aliran nan mayakini bahwasanyo kamampuan babahaso pado manusia adolah bawaan samanjak lahia. Mako dek karano itu, manusia alah dilengkapi sacara biologis dek alam (natur) untuak mamproduksi bahaso malalui alaik-alaik bicaro (lidah, bibir, gigi, rongga tenggorokan, dibantu dek alaik pandangaran) maupun untuak mamahami arti dari bahasa tasabuik (malalui skema pado kognisi).

Noam Chomsky adolah tokoh nan mampicayoi peran natur sacaro radikal dalam pamarolehan bahaso. Pihak nan mampicayoi kakuatan nurtur dalam pamarolehan bahaso baargumen bahwasanyo bayi jo balita mamparoleh bahaso karano tabiaso pado bahaso ibu. Hal iko tabukti pado pambantuakan kamampuan fonem nan tagantuang pado bahaso ibu, misalnyao pado bayi Jepang baumua di bawah anam bulan masih dapek mambedaan fonem [ra] jo [la] dengan jaleh, tatapi pado usia sa tahun mereka kasulitan untuak mambedaan fonem [ra] jo [la].

Michael Tomasello mangkritik Chomsky bahwasanyo bahaso indak akan muncua baaitu sajo. Inyo mayakini bahwasanyo bahaso didapek karano bayi belajar manggunoan bahaso sabagai simbol talabiah dahulu dengan kamampuan bayi untuak malakuan atensi basamo (join attention) pado katiko sabalum bayi mampu mamproduksi bahaso. Namun, pado dasarnyo, natur jo nurtur mampunyoi kontribusi tahadok pamarolehan bahaso pado bayi.

Mekanisme pamarolehan bahasa

• Imitasi

Imitasi dalam pamarolehan bahaso tajadi katiko anak maniruan pola bahaso maupun kosakata dari urang-urang nan signifikan bagi mereka, biasonyo urang tuo atau pangasuah. Imitasi nan dilakuan dek anak, indak hanyo maniruan sacaro persis (mimikri) hal nan dilakuan urang lain, tetapi anak memiliah hal-hal nan dianggap dek anak menarik untuak ditiruan.

• Pengondisian

Mekanisme parolehan bahaso malalui pangondisian diajukan dek B.F. Skinner. Mekanisme pangondisian atau pambiasoan tahadok ucapan nan didanga anak jo diasosiasikan jo objek atau peristiwa nan tajadi. Mako dek karano itu, kosakato awa nan dipunyoi dek anak umumnyo adolah kato benda.

• Kognisi sosial

Anak mamparoleh pamahaman tahadok kato (semantik) karano, sacaro kognisi, inyo mamahami tujuan sasaurang mamproduksi suatu fonem malalui mekanisme atensi basamo. Adopun produksi bahaso diaerolehnyo malalui mekanisme imitasi.