Kaskay (vahoaka)
Ny Kaskay dia vondrom-poko ao Iràna izay manam-piaviana torkika ny ankabeazany. Heverina koa fa tafiditra ao ny olona manam-piaviana lôry na lora sy kiorda ary arabo. Mampiasa fiteny torkika andrefana (ôgoza), fantatra amin' ny anarana hoe fiteny kaskay, ny ankamaroan' izy ireo, fiteny izay antsoin' izy ireo hoe turki. Miteny persana (fitenim-pirenen' i Iràna) koa izy ireo. Atao hoe قشقایی izy ireo amin' ny teny persana.
Ao amin' ireto faritany ireto no tena ahitana ny Kaskay: Fars, Khuzestan, Kohgiluyeh-Buyer-Ahmad, Chaharmahal-Bakhtiari, Bushehr ary Isfahan Atsimo, indrindra manodidina ny tanànan' i Shiraz sy Firuzabad ao Fars. Mpiandry andiam-biby fiompy mpifindrafindra monina tany am-boalohany ny ankamaroan' ny Kaskay ary mbola misy amin' izao fotoana izao ny manohy izany fomba fiainana izany. Ny Kaskay mpifindrafindra monina mbola nitana ny nentin-drazana dia nandeha indroa isan-taona miaraka amin' ny andiam-bibiny eo anelanelan' ny kijana an-tany avo amin' ny fahavaratra any avaratr' i Shiraz (tokony ho 480 km any atsimo) sy ny kijana ririnina any amin' ny tany iva (sy mafana kokoa) akaikin' ny Hoala Persika, any atsimo-andrefan' i Shiraz.
Lasa mpiorim-ponenana amin' ny ampahany na tanteraka anefa ny ankamaroan' ny Kaskay. Nitombo be ny firehan' ny Kaskay hanorim-ponenana nanomboka tamin' ny taompolo 1960, teo ambanin' ny fanerena sy famporisihan' ny governemanta izay nanorina trano ho an' izay vonona hipetraka, nanomboka tamin' ny fiandohan' ny taonjato faha-20, nandritra ny fitondran' ny tarana-mpanjaka Pahlavi na Pahlevi. Na izany aza, ho an' ireo izay manohy ny fifindrafindrà-monina, dia mitazona sy manara-maso ny lalanan' ny Kaskay sy ny foko hafa mpifindra monina tahaka azy ireo ny governemanta iraniana.
Mizara ho foko dimy lehibe ny Kaskay, dia ny Amale (amin' ny fiteny kaskay) na Amaleh (amin' ny fiteny persana), ny Dere-Shorlu na Darreh-Shuri, ny Kashkollu na Kashkuli, ny Shishbeyli na Sheshboluki ary ny Eymur na Farsimadan. Misy koa ny foko kely kokoa izay ahitana ny Qaracha na Qarache'i, ny Rahimli na Rahimi ary ny Safi-Khanli na Safi-Khani.