Leonid Pasečnik
|
Quest articol chì l'è scrivud in lombard, con la Noeuva Ortografia Lombarda |
El Leonid Pasečnik (Lugansk, 15 de marz 1970) a l'è un politegh e militar ucrain de etnia russa, capo de la Republega Popolar de Lugansk, Stat a recognossiment limitad sostegnud e poeu annetud de la Russia, del 21 de november 2017, dopo di dimission de l'Igor Plotnitskyj, del che l'era minister per la sigurezza del Stat.
Ricercad de l'Ucraina per vari riat, l'è member del partid local Pas per Lugansk e de Russia Unida.
Biografia
[Modifega | modifica 'l sorgent]Fioeul de 'n agent de la OBKhSS, o ben la polizzia fiscal sovietega, el nass a Lugansk, che a l'epoca la se ciamava Voroshilovgrad, in del 1975 la familia la fa San Martin in l'Orient de la Russia, a Magadan, indova che 'l so paa el controllava una minera d'or.
Tornad in Ucraina, el se diploma al collegi politegh-militar de Donec'k e 'l taca a lavorà per el Servizzi de Sigurezza de l'Ucraina in l'Oblast de Luhansk, a capo de 'n unità de lota al sfrod, oltra che del destacament de Stakhanov.
El deventa famos in del 2006, quand che el descovriss un gran caregh de sfros de squasi 2 milion de dollar a la frontera de Izvaryne-Donetsk, e de havé refudad una bustarella in del midem moment.
Per quella reson chi, in del 2007, el ciapa del president de l'Ucraina la medaja «per el servizzi militar a l'Ucraina» per el sò professionalism e la soa integrità in su la linia del dové.
In la guerra del Donbass del 2014 el se s'cera coi separatista e 'l 9 de otover del midem ann l'è proclamad minister de la sigurezza del Stat de la Republega de Lugansk.
El 21 de november del 2017 di omen armad se s'ceren in del center de la cità in quella che la par una lota per el poder in tra el president Plotnitskyj e 'l minister di interni Igor Kornet, trii dì dopo i separatista nonzien i dimission del president, per di reson de salut. El Pasečnik a l'è nomnad leader ad interim fina ai elezzion e 'l nonzia de volé rispetà i acord de Minsk.
In del 2018 el deciara che l'esperienza de Lugansk la podarà dà un esempi a tucc i Oblast de l'Ucraina in su comè ciapà la libertà, inscì de fà su 'n Ucraina indova che i representant di varie nazzionalità poden viver liber, e che se Lugansk el tornarà in Ucraina el sarà de Stat in del Stat.
El 6 de dicember 2021 el deventa ofizzialment member de Russia Unida, cont el president Dmitrij Medvedev che gh'ha dad la tessera in del congress del partid.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Leonid Pasečnik