De Karosseer

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

De Karosseer is de nuie naom vaan 't veurmaolig woenwagelekamp Vinkeslaag, of 't Kamp wie 't in Mestreech geneump woort. 't Woort in 1975 opgeriech. Gaw greujde 't kamp boedoor d'r väöl mie woenwagele kaome te stoon es oets bedoeld waor. Op 't terrein waore ouch in ierste instantie sloopbedrieve gevesteg. Later koum dao d'n handel in twiedehands oto's bij: 't woort de belaankriekste plaots in twiedehandsotohandel in Europa. 't Terrein woort evels steeds voller en vervojlder. Daorum begós de gemeinte Mestreech in 2002 mèt 'n herstructurering. De naom woort in 2007 gewijzeg in De Karosseer um 'ne nuie start te make. Op dit momint (de sanering begós in 2004) zien alle bewoeners die niks mèt otohandel te make höbbe verhuis nao aander kempkes verspreid euver de stad.

In 't verleie is 't kamp versjèllende kiere in opspraak gewees. Bij groete invalle in 2003 en 2004 woorte versjèllende hennepplantages aongetroffe. Ouch zouwe de bewoeners väöl minder inkomstebelasting ('t verliegde tarief) betaole. Later bleek dit evels neet hielemaol woer, 't betrof mer e deil vaan de bewoeners en bij aandere waor de reie tot ze neet genóg aoftrèkposte hadde.

't Huieg bedrieveterrein heet 'n oppervlak vaan 95.000 m² mèt plaots veur 60 otobedrieve.