Kraonkel

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

---

Kraonkel (Nederlands: Krawinkel) is 'n wiek van de veurmalige gemeinte Gelaen, die allewiel op häör beurt saer 2001 biej de gemeinte Zittert-Gelaen in Nederlands Limburg beheuërt.

De wiek is óntsjtaon oet 't veurmalige buurtsjap Kraonkel, die same mèt de anger buurtsjappe Lötterao, Awt-Gelaen, Sjpaans Neerbaek en Danike de gemeinte Gelaen vormde. Saer 1840 maakde Kraonkel deil oet van de kirkparochie Lötterao-Kraonkel.

In de 18e en 19e eëuw waas Kraonkel naeve de landjboew ouch bekènd óm zien klein-indusjtrie, zoa-es laerloajerieje, sjpiekerindustrie, sjmidse enz. die in de meiste gevalle gebruuk maakde van 't water oet de door 't dörp sjtruimende Cötelbaek. In de 1960-er jaore woort dees baek euverkloesd.

Oarsjprónkelik besjtóng de buurtsjap oet tweë deile, jeder aan weerskantje van de sjpaorlien Zittert-Mesjtreech. 't Deil aan de westelikke kantj is verdwene biej de boew van Sjtaatsmien Maurits en later de Chemische bedrieve van de DSM. 't Hujige Kraonkel ligk dan ouch in de directe naobieheid van dees bedrieve.

Bezeenswaardig is de oet 1699 daterende Sint-Janskloes, gelaege aan 't oeteindj van de Daalsjtraot en allewiel deiloetmakend van de wiek Kloes. 'n Boerderie die vreuger in de Kloastersjtraot in Kraonkel sjtóng en moosj verdwiene veur de boew van de Cokesfebriek Maurits, is behawte gebleve en nao herboew te bezichtige in 't Nederlands Openluchtmuseum in Arnhem.

Brón

• Wikipedia NL, Krawinkel