Eliezer Ben-Yehuda
Eliezer Ben‑Yehuda (אליעזר בן־יהודה; eli'ʕezeʁ ben jehu'da; naseda como Eliezer Yitzhak Perlman; 7 janero 1858 – 16 desembre 1922) ia es un lexicografiste lietuvisce iudi e editor de jornal. El ia es la forsa gidante en la revive de ivri en la eda moderna.
Biografia
[edita | edita la fonte]Eliezer Ben-Yehuda ia nase como Eliezer Yitzhak Perlman (ides אליעזר יצחק פערלמאן, en Luzhki bielarusce Лужкі (Lužki), polsce Łużki), Governoria de Vilna de la Impero Rusce (oji Vitebsk Oblast, Bielarus). De la eda de tre anios, el ia vade a la heder do el ia studia ivri e la Biblia, como ia es costumal entre la iudis de Europa este. Con 12 anios, el ia leje partes grande de la Tora, la Mixna e la Talmud. Sua madre e tio ia espera ce el va deveni rabi, e ia envia el a un seminario iudi. Ala el ia es esposada a la ivri de la Hascala cual ia inclui alga scrivedas nonrelijiosa. A pos, el ia aprende franses, deutx e rusce e ia es enviada a Dünaburg per plu educas. Lejente la jornal ivri HaShahar, el ia conose la promove sioniste temprana e ia conclui ce la revive de la ivri en Israel ta pote uni tota la iudis.
Pos gradua, el ia vade a Paris per studia en la Universia Sorbona. Entre la temas cual el ia studia ia es la istoria e politica de Asia sude-ueste. En Paris, el ia conose un iudi de Ieruxalim, con ci el ia parla ivri. Lo ia es esta usa de ivri como lingua parlada cual ia convinse el ce revive la ivri como lingua parlada ta es posible. Ben-Yehuda ia resta en Paris tra cuatro anios.
En 1881 Ben-Yehuda ia migra a Filastin, alora governada par la Impero Osmanian, e ia abita en Ieruxalim. El ia trova un labora como ensenior en un scola de la Alliance Israelite Universelle. Motivada par la ambiente de ideales de renovi e refusa de la diaspora, Ben-Yehuda ia deside developa un lingua nova cual ta pote sustitui per ides e otra dialetos rejional como media de comunica dial entre la iudis ci ia fa aliyah de rejiones diversa de la mundo. Ben-Yehuda ia vide ivri e sionisme como simbiosica: "La lingua ivri pote vive sola si nos revive la nasion e fa ce lo reveni a la propre pais," el ia scrive.
Per reali esta taxe, Ben-Yehuda ia insiste con la Comite de la Lingua Ivri ce, sitante la rejistras de la comite: "Per completi la mancas de la lingua ivri, la Comite crea parolas seguente de la regulas de la gramatica e la analojia lingual de radises semita: arami e spesial de radises arabi" (Joshua Blau, paje 33).
Ben-Yehuda ia es sposida a du veses, con du sores. Sua sposa prima, Devora, ia mori de 1891 de tuberculose, lasante el con sinco fios peti. Sua desira ultima ia es ce Eliezer ta sposi sua sore peti, Paula Beila. Pos la mori de sua sposa Devora, tre de sua fios ia mori de difteria en des dias. A ses menses plu tarda, el ia sposi Paula, ci ia prende la nom ivri "Hemda". Hemda Ben-Yehuda ia deveni un jornaliste capas, garantiante la completi de la disionario ivri en la desenios pos la mori de Eliezer, como ance corajinte recolies de reservas e coordinante comites de eruditas en Filastin e estra la pais.
Ben-Yehuda ia eleva sua fio Ben-Zion Ben-Yehuda intera en ivri. El ia refusa lasa ce sua fio ta es esposada a otra linguas en sua enfantia. A un ves, el ia cria an a sua sposa pos descovre ce el fa un canta de cuna rusce a sua fio. Sua fio Ben-Zion ia es la parlor nativa prima de ivri moderna como propre lingua.
En desembre 1922, Ben-Yehuda ia mori de tuberculose con 64 anios. El ia es enterada sur la Monte de la Olivos en Ieruxalim. 30 000 persones ia es presente a sua funera.