Creol
Un creol o lingua creol es un lingua stable con orijinas como un pijin cual ia es adotada como un lingua nativa. La parola "creol" deriva de parolas en la linguas romanica como "créole" en franses, "criollo" en espaniol, e "crioulo" en portuges. Los deriva de la parola portuges "criar" (eleva), de la parola latina "creare" (produi, crea). La parola ia es orijinal aplicada a la persones ci ia nase en la colonias.
Creoles ave gramaticas multe simple, con poca afisas gramatical. Jeneral, los ave la strutur de sujeto-verbo-ojeto. La vocabulo de creoles deriva xef de la lingua de la colonistes o mercatores, con alga parolas de la linguas nativa. La lingua de la colonistes o mercatores es nomida la suprastrato, e la lingua de la nativas orijinal es nomida la sustrato. La sustrato dona tipal la sintatica e alga paroletas de sintatica per la lingua.
Teorias
[edita | edita la fonte]Multe teorias esiste sur la orijina de creoles. La plu acorda ce los ia deriva de pijines, ma la detalias causa nonacorda. Un teoria sujesta ce tota creoles ia deriva de un pijin fundida en portuges. On ave parolas como "picinini" (de portuges pequenino – multe peti) en creoles tra tota la mundo, per esemplo. Ultima, la teoria sujesta, esta pijin ia deriva de la lingua franca de la Mediteraneo (ance nomida sabir).
Un otra teoria sujesta ce la gramatica de la creoles ia deriva de un forma enfantin, e ce esta forma deriva ultima de la strutur de la mente. La gramatica simple pote ance deriva de un prejudi european ce la popla de paises primitiva es plu simil a enfantes.
Un teoria multe popular sujesta ce la creoles ia deriva de la junta de un vocabulo prima european e un gramatica plu como la linguas de la popla orijinal. Per esemplo, la creoles de la paises caribe e sudamerican segue la forma gramatical de linguas de Africa ueste como ioruba, eue, etc. Esta linguas es linguas isolinte con un ordina de parolas SVO (sujeto-verbo-ojeto), la forma la plu comun en la creoles. Ance, alga formas non-european es de esta linguas, como redupli de parolas, negas duple (an truple), cadenas de verbos, e aposadas per indica posese.
Esta teoria funsiona min bon per la creoles de Polinesia, car la linguas polinesian es VSO (verbo prima – vide, per esemplo, la lingua tahiti), ma la creoles es SVO (verbo media). Ma esta creoles ia es prima fundida en engles, cual ave un gramatica simple e cual es SVO. E alga formas de gramatica deriva clar de la linguas nativa, como la particula per marca la verbo e la sufisa per transitivia.
Un teoria multe diferente de la otras es ce la creoles esibi la regulas natural cual es ultima jenetical. Vera, multe creoles ave regulas simple e simil a lunlotra, per esemplo la strutur de SVO. Un otra esemplo es la usa de particulas ante la verbo, en la ordina TMA – tempo-moda-aspeta:
| Forma de verbo | Verbo de move | Verbo de state | ||||
|---|---|---|---|---|---|---|
| Elefen | Creol aitian | Sranan | Elefen | Creol aitian | Sranan | |
| Forma fundal | el pasea | Li Maché | a waka | el ama | li rêmê | a lobi |
| Continuante | el es paseante | l’ap maché | a e waka | |||
| Pasada | el ia pasea | li té maché | a ben waka | el ia ama | li té rêmê | a ben lobi |
| Pasada e continuante | el ia es paseante | li t’ap maché | a ben e waka | |||
| Nonreal | el va pasea | l'av(a) maché | a sa waka | el va ama | l'av(a) rêmê | a sa lobi |
| Nonreal e continuante | el va es paseante | l’av ap maché | a sa e waka | |||
| Pasada e nonreal | el ta pasea | li t'av(a) maché | a ben sa waka | el ta ama | li t'av(a) rêmê | a ben sa lobi |
| Pasada e nonreal e continuante | el ta es paseante | li t’av ap maché | a ben sa e waka | |||
Ma otra teoristes nota ce no tota creoles usa la mesma sintatica.
La teoria la plu lojical es ce tota de la teorias a supra contribui un parte de la esplica per la developa de creoles. Los no es mutua escluinte.
Alga creoles ave orijinas diferente de la plu de creoles. Per esemplo, lingua media ave un vocabulo espaniol con un gramatica cetxua, sin simpli. Un otra esemplo, cisa, es africans: lo es un deriva natural de nederlandes, ma lo es posible ce la simpli de la gramatica es par la influe de la usa per comunica entre poplas con linguas diversa.
Esemplos de creoles es:
Lingua franca nova
[edita | edita la fonte]Lingua franca nova ia nase cuando Boeree comensa un interesa en linguas, spesial linguas creol e artifisial. El ia es inspirada par leje sur lingua franca. On pote vide lo como un lingua creol car segue la prinsipes seguente:
- Un cuantia limitada de fonemes;
- Un spele cual refleta clar la pronunsia;
- Un gramatica simple e coerente;
- Un grupo limitada de afisas produosa;
- Un ordina de parolas bon definida.