Порт-Морсби
Порт-Морсби – Папуа-Жаңы Гвинея көз каранды эмес мамлекетинин борбору (1975-жылдан). Порт-Морсби борбордук округунун административдик борбору. Жаңы Гвинея аралынын түштүк-чыгышындагы түздүктө (материк катары эсептелет) жайгашкан. Климаты субэкватордук, деңиздик. Жылдык жаан-чачыны 1200 мм. Температурасы дайыма жогору (максимуму 31°С, минимуму 23°С). Калкы 317 миң (2012). Папуа булуңундагы порт. Эл аралык аэропорту бар. Соода борбору.
Шаар 1873-жылы негизделген. 19-кылымдын аягында курулган турак-жайлар, Элла чиркөөсү (1890) сакталган. Университет, музейлер (улуттук, этнографиялык ж. б.) бар. Ботаникалык бак [экзотика бактары (бейиш чымчыктары мекендейт)] уюштурулган. Туризм (Географиялык улуу ачылыш доорундагы жана 2-дүйнөлүк согуш мезгилиндеги сууга чөккөн деңиз түбүндөгү кемелер кызыктырат) өнүккөн.
Колдонулган адабияттар
[түзөтүү | булагын түзөтүү]- “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117-9
| Австралия жана Океания өлкөлөрүнүн борборлору | |
|---|---|
| Эгемендүү мамлекеттердин борборлору | Апиа • Веллингтон • Канберра • Мажуро • Нгерулмуд • Нукуалофа • Паликир • Порт-Вила • Порт-Морсби • Сува • Фунафути • Хониара • Түштүк Тарава • Ярен |
| Көз каранды аймактардын борборлору | Аваруа • Адамстаун • Алофи • Кингстон • Мата-Уту • Нумеа • Паго-Паго • Папеэте • Сайпан • Хагатна |
