Коми-пермяцкӧй кыв
коми-пермяцкӧй кыв
| |
|---|---|
| Ас ним: | Коми кыв |
| Муэз: | Рочму |
| Веськӧтлан статус: | Перем ладорись Коми кытш |
| Баитіссезлӧн лыдыс: | 63106 (2010' во) |
| Рейтинг: | |
| Кыв увтыррез: | Урал кыввез |
| Классификация: | Урал котыр
|
| Гижан системаыс: | кирилл анбур (коми анбур) |
Кыв коддэз
| |
| ISO 639-1 | koi |
| ISO 639-2 | kom |
Википедияын
| |
| Кыв юкӧт: | [1] |
| Юкӧтлӧн ним: | Википедия, Мезмыт энциклопедия |
Коми-пермяцкӧй кыв — коми отир кывлӧн ӧт регионісь стандарт, кӧдӧ видзӧны Перем ладорись Коми кытшын. Коми кывлӧн мӧд регионісь стандарт – зыряналӧн коми кыв – зорамӧ Коми Республикаын.
Перем коми кыв вылын баитӧны 63,1 сюрс морт (2010' во).
Перем комиэзлӧн кылыс, коми кыв да, пырӧ урал кыввезлӧн чудь-йӧгра увтырӧ, перым чукӧрас [1]. Торья кыввезын содтассэз агглютинасьӧны, сёрникузялӧн унажыксӧ номинатив тэчас.
Ассиныс лыддьӧтан кыв перем комиэз зорӧтӧны XVIII вексянь. Кыв вӧлі нормируйтӧм Коми кытшын 1921'–1938' воэз сьӧрна. Ӧння нормаэз кодифицируйтӧмӧсь 1938' годӧ.
Перем коми кыв лыддиссьӧ кыв стандартӧн Перем ладорись Коми кытшын, кытӧн коми отирыс (перем комиэз нето коми пермяккез) баитӧны коми кывлӧн кык сёрнитан вылын. Этӧ лоӧны ойвыв перем да лунвыв перем сёрнитаннэз.
Перем коми кыв лӧсьӧтікӧ поднас бӧрйӧмась лунвыв сёрнитансис вылісь иньва диалект, кӧда перем диалекттэз коласын баитіссез лыд сьӧрті лоӧ медыджыт. Сэтчӧ пыртӧмась л шы, медбы лыддьӧтан кыв лӧсяліс и лунвыв перем, и ойвыв перем сёрнитана коми отирлӧ.
Кыв отир оланын
[вильмӧтны | Вильмӧтны код]Баитіссез
[вильмӧтны | Вильмӧтны код]2002' вося гижӧтӧм сьӧрті Роч муын перем комиӧн баитӧмась 94,3 сюрс морт, ны коласын 6657 морт – мӧдік вужжезісь отир[2].
Коми кытшын баитӧны комиӧн 67 сюрс морт, ны коласісь 2051 озӧ пӧ кужӧ рочӧн.
Быдӧс перем комиэзісь мам кыв тӧдӧны 72,6%. Этія лыдпас вежсьӧ сы сьӧрті, кытӧн коми мортыс олӧ. Шуам, Коми кытшын чужан кыв вылын баитӧны 83,1% комиэз коласісь; Перем ладорын (кытш визиррез сайын) - 60,7%; Перем ладорсянь ылын олісь перем комиэз коласын чужан кыв тӧдӧны токӧ 46,4%.
Статус
[вильмӧтны | Вильмӧтны код]
Перем ладорлӧн Устав сьӧрті Перм ладорын канму (государство) нимсянь веськӧтлан органнэзлӧ колӧ лӧсьӧтны уджнысӧ сідз, медбы перем коми отирлӧн зорамис кыв, лов культура да этнослӧ аскодя мӧдік берся.
Перем ладорись Коми кытшын веськӧтлан кылӧн лоӧ роч кыв. Сыкӧт ӧтлаын веськӧтлан керкуэзын позьӧ баитны и перем коми кыв вылын.
Юӧртан везӧт
[вильмӧтны | Вильмӧтны код]Кыкись тӧлісьӧ коми кыв вылын петӧ тодиль газета «Кама кытшын» (сійӧ лӧсьӧтӧны Кудымкар районісь «Иньвенскӧй край» газета редакцияын).
Коми кытшись «Парма» нима газетаын перем коми кыв вылын петӧ быд неделься листбок «Коми говк».
Шочыника лэдзӧны челядь понда «Силькан» нимаӧ журнал, кытӧн сетӧны гижӧттэз и комиӧн, и рочӧн.
Телевизорӧт перем коми кыв вылын баитӧны «Всероссийскӧй» телерадиокомпания бердын «Перем» филиалыслӧн юкӧт пырья: лун вылас джын час висьтасьӧны берся юӧррез.
Радиӧт сія жӧ юкӧтсянь баитӧны комиӧн 10 минут мымда быд уджалан лун. Лыддьӧтӧны токӧ бӧрья юӧррез.
Ӧті-ӧті программаэз перем коми кыв вылын лӧсьӧтӧ и аспондасис уджалан радио «Округ FM».
Велӧтан везӧт
[вильмӧтны | Вильмӧтны код]
Коми кытшись школаэзын челядьсӧ велӧтӧны унажыксӧ роч кыв вылын. Перем коми кыв босьтӧны отсӧт туйӧ сэк, кӧр колӧ, медбы челядь буржыка вежӧртісӧ материал. Велӧтан кывнас перем коми кыв лоӧ токӧ мам кыв да перем коми литература уроккез коста. Энія предметтэз сьӧрті и лэдзӧны комиӧн велӧтан небӧггез.
Лыддьӧтан кывнысӧ да перем коми литература 2008'/09' воын Коми кытшас велӧтӧмась дзир 20,5% коми челядь коласісь (2931 морт); а садиккезӧ, кытӧн челядёкыскӧт баитӧны коми кыв вылын, ай-маммез сетӧмась сія жӧ годӧ токӧ 848 кага (этія лоӧ 14,3% быдӧс дошкольниккез коласісь)[3].
2009'/09' годӧ перем коми кыв да литература сьӧрті уроккез сетӧмась Коми кытшись 48 школаын 69 велӧтісь (омӧн кытш пасьта школаэз 126-я).
Медвылӧдз велӧтаніннэз коласісь перем коми кыв вылын лыддьӧтӧны лекцияэз токӧ Перемын, педагогика сьӧрті университетын. Татісь филфаклӧн коми-роч юкӧт вылӧ одзжык быд во босьтлӧмась 25 мортӧн. Сэсся велӧтчыны локтіссез лоӧны сё етшажык. 2009' годӧ 1-а курс вылӧ босьтӧмась дзир 17 мортӧс. Велӧтчылісӧ 5 воӧн, ӧні пондасӧ етшажыкӧн. Юкӧтсӧ помаліссезлӧ сетӧны диплом «Перем коми кыв да литература сьӧрті велӧтісь, роч кыв сьӧрті велӧтісь». Но уджавны коми кыв велӧтісьӧн томмэс сэсся озӧ вермӧ да мунӧны шедтыны сьӧм мӧділаэзӧ[4].
Пондӧтчан школа понда коми велӧтіссезӧс лӧсьӧтӧны Кудымкарын, педагогика сьӧрті колледжас, но татӧн нельки оз быд во босьтӧ абитурасӧ. Этія и вежӧртана, мыля школаэз Коми кытшын пӧднасьӧны, а коми кыв тӧдісь школьниккез дугдывтӧг чинӧны.
Небӧг лэдзӧм
[вильмӧтны | Вильмӧтны код]Ӧння кадӧ небӧггесӧ перем коми кыв вылын лэдзӧны ӧддьӧн етша, да и тематика нылӧн зэв и зэв дзескыт. Шуам, кӧр 1921'–1937' воэзӧ петӧмась 350 нима быдкодь небӧггез, то сы дыра жӧ кад сьӧрна, 1991'–2007' воэзӧ, дзир 80. Кӧркӧ, лыддьӧтан кыв лӧсьӧтікӧ, лэдзӧмась кыдз велӧтан да мича литература, сідз и политика, наука да берся удж сьӧрті колана небӧггез, ӧні жӧ лыддьӧтісьлӧ вӧзйӧны токӧ перем коми гижиссезлісь мичмӧтӧм гижӧттэз да перем коми кыв да литература сьӧрті велӧтчан небӧггез. Коми книгаыс Коми кытшын петӧ Перем коми этнокультура шӧринісь.
Визирсайся да роч литературасӧ перем коми кыв вылӧ дугдӧмась вуджӧтны 1962' воын. Математика сьӧрті медбӧря велӧтан небӧг лэдзӧмась 1975' годӧ.
2007' воӧ шуисӧ быд коми гижӧт сэсся вуджӧтны роч кыв вылӧ да небӧгсӧ лэдзны кык кыв вылын, медбы паныт вӧлісӧ тэчӧмӧсь тексттэз комиӧн и рочӧн. Бӧра, роч гижӧттэс Коми кытшын петӧны небӧггезӧн коми вылӧ вуджӧттӧг.
Коми кытш визиррез сайын перем комиӧн небӧггез петӧны Финмуын, кытӧн Библия вуджӧтан институт 1993'-2009' воэз сьӧрна лэдзӧма ӧкмыс гижӧт Христос велӧтӧм сьӧрті.
История
[вильмӧтны | Вильмӧтны код]
Коми отирлӧн гижӧт медодз аркмис XIV векӧ, кӧр Перем Степан лӧсьӧтіс медодзза коми анбур (азбука) да вуджӧтіс кынымкӧ вичкося текст перем кыв вылӧ.
Рытвыв Европаын перем кыв вылын медодзза текст вӧлі йӧзӧтӧм (публикуйтӧм) 1705' годӧ. Этӧ вӧлі кеймисян «Миян айӧ», кӧдӧ ми вермам лыддьӧтны Н. Витсен небӧгись «Ойвыв да асыввыв тотаралӧн му».
Перем кывлісь кынымкӧ шуан гижӧма Д. Г. Мессершмидт (1720) да мымдакӧ публикуйтіс Ф. Й. Страленберг небӧгын «Европа и Азиялӧн ойвывся да асыввыв тор» (1730).
Быдӧс эна материаллэз лӧсялӧны и перем коми, и зыряна коми сёрнилӧ.
Первуись перем коми шуаннэсӧ сетӧма торйӧн и ордчӧн зыряна коми кыввезкӧт Г. Ф. Мюллер. Этійӧ сія керис 1756' годӧ, кор сылӧн медодз петіс небӧгыс «Казань губерняись чучкӧй отир йылісь». Перем кыввез босьтӧмӧсь ойвыв сёрнитанісь.
Медодзза коми грамматика да ыджыткодь кывкуд вӧлісӧ лӧсьӧтӧмӧсь 1785' во кежӧ. Уджыс вӧлі керӧм Перемись протоиерей Попов Антоний веськӧтлӧм увтын. Небӧггес ӧнӧдз абу публикуйтӧмӧсь.
Сэсся перем сёрнитаннэзісь лоасӧ ӧктӧмӧсь эшӧ кык ыджыт кывчукӧр – Чечулин Георгийлӧн (1820' воэзӧдз) да Волегов Федотлӧн (1830'-1840' воэзӧ).
1823' воын Йӧг посадісь поп Любимов Феодор первуись вуджӧтӧма перем коми кыв вылӧ ыджыт небӧг: Бур юӧр (Евангеллё) Матфей сьӧрті. Кигижӧтыс вӧлі ыстӧма канкарӧ, но сэтӧн кольччис куйлыны архивын. 1838' год кежӧ сія жӧ Ф. Любимов, Совкарись монастырын олікӧ, лӧсьӧтӧма перем коми кыв сьӧрті мӧдік грамматика. Уджсӧ йӧзӧтӧмась токӧ 2007' воын…
Куимӧт пырся перем коми кыв лад йылісь гижис Рогов Миков. Сылӧн грамматикаыслӧ вӧлись лӧсяліс: небӧг вӧлі печатайтӧма Петракарын 1860' годӧ. Ӧкмыс во бӧрті, 1869' годӧ, сэтчин жӧ петӧ Ӧврам Миколыслӧн жӧ «Коми-роч да роч-коми кывчукӧр».
1866' воын Лондонын петӧ медодзза печатайтӧм небӧг быдсӧн перем комиӧн, «Матфей сьӧрті Бур юӧр», кӧдӧ вуджӧтӧма Роговыслӧн ёрт Попов Ӧврам. Текстыс вӧлі лӧсьӧтӧма латынь шыпассэзӧн. Дыр мыйись сійӧ жӧ небӧгсӧ лэдзасӧ и роч шыпассэзӧн – Петракарын жӧ, 1884' годӧ.
Челядьӧс велӧтӧм понда медодзза небӧг, «Лыддьӧм пермяк понда», петӧ 1894' воын, гижис сійӧ Попов Ермов.
XIX век помын – XX век пондӧтчикӧ Казаньын лэдзӧны перем коми кыв вылын букваррез да унакодь вичкося небӧг. Сійӧ уджсӧ артмӧтіс Камасинісь Шестаков Яков (сія вӧлі поп Кудымкарын). Вуджӧтіссез коласын тӧдса Седегов И.В., кӧда кипонісь петіс «Вежа история» (1901' во) да мд.
Быдсӧн 1917' воӧдз перем комиӧн печатайтӧмась 26 мымда небӧг. Роч муын саррезӧс берездӧтӧм бӧрын коми небӧггес пондасӧ петны бура унажык, 1921'-1941' воэзӧ петӧма 533 етш небӧг перем коми кыв вылын, да эшӧ вӧлсіӧ газетаэз и журналлэз…
Важ режим дырни да и мыйкӧ дыра революция бӧрын, 1927' годӧдз, небӧггесӧ лэдзӧмась ойвывся да лунвывся сёрнитаннэз вылын торйӧн. Сэсся шуасӧ лӧсьӧтны ӧтласа перем коми кыв, мый понда и пыртасӧ л/в вежласьӧм.
Кыв пондӧмась буражык нормируйтны. Терминнэз аркмӧтӧм да орфография бурмӧтӧм сьӧрті чулӧтлӧмась ӧксяннэз, медыджытыс вӧлі 1933' годӧ, юль коста. Мӧдігод перем комиэз ветласӧ сэтшӧм жӧ ӧксян вылӧ и Сыктывкарӧ, кытӧн мӧдісӧ унифицируйтны орфографиянысӧ зырянаыскӧт.
ХХ веклӧн 20'-30' воэз сьӧрна перем комиэзлӧ лыддьӧтан кыв лӧсьӧтӧмась Лихачёв Микаль, Питю Ӧньӧ, Онтон Пёдор, Ёгор Пёдор, а томжыккез коласісь Нечаев Григорий, Грибанов Спиридон, Василь Миков, Иву Стёпко.
Сія жӧ кадӧн перем коми кыв вылын вӧлісӧ лэдзӧмӧсь велӧтан небӧггез алгебра, геометрия, физика, химия, география, ботаника да зоология сьӧрті, уна небӧг вуджӧтасӧ роч кыв вылісь.
Эна воэзӧ неӧтпыр вежсьылӧма коми кывлӧн графика (гижӧт): перво вӧлӧма Молодцов анбур (1921-1932), сыбӧрын коми латынь (1932-1937), сэсся татісь комиэсӧ вуджӧтасӧ роч азбука вылӧ, а 1939' годсянь пыртасӧ ӧння коми алфавит.
Перем коми кыв вӧлі вӧлись кодифицируйтӧм 1938' август 7' лунӧ, кӧр РСФСР-ись отирӧс велӧтӧм сьӧрті нарком «утвердитіс русскӧй основа вылын коми-пермяцкӧй алфавит да основнӧй орфографическӧй правилоэз» [5]. Но эшӧ 1936' восянь коми кывсӧ пондӧмась Коми кытшын быднёж дзескӧтны. Перво шупкасӧ коми теминология (Мошегова Анна, Спорова Анна да кд.), сэсся кутчасӧ жагӧник пичкыны коми кывсӧ школаись, веськӧтлан керкуэзісь, газетаись. Медбӧрьяись газета быдсӧн комиӧн петас 1958' годӧ. Историяӧ велӧтан медбӧрья небӧгсӧ печатайтасӧ 1962' воын, математикаӧ (1 кл. понда) - 1975' воын. Быдӧс этіясянь лыддьӧтан коми кыв ӧштас ассис дон, и кольччас коланаӧн токӧ ны понда «кинлӧ этӧ интересно».
Нормаэз коми кыв сьӧрті сэсся вежсисӧ етша. Орфография сьӧрті медодзза кывкуд вӧлі лэдзӧм 1945' годӧ. Сэсся сэтшӧм жӧ кывкуддэс петасӧ 1955', 1965' да 1992' воэзӧ.
Терминология сьӧрті кывкудоккез лэдзӧмась 1940' да 1949' годдэзӧ. Сэсся терминология (унажыксӧ рочись босьтӧм) эз вежсьывлы 2000' воэзӧдз.
Ыджыткодь «Русско-коми-пермяцкӧй словарь» петіс 1946' годӧ (лӧсьӧтіссез – А. М. Спорова да П. С. Кузнецов), а «Коми-пермяцко-русскӧй словарь» – 1985' воын (лӧсьӧтіссез – А.С. Кривощёкова-Гантман да Р.М. Баталова). Кыкнан кывкудын коланася унажык роч шуаннэз, а ӧддьӧн уна коми кыввез сэтчӧ абу пыртӧмӧсь.
Перем коми кыв теория сьӧрті ӧтласа небӧг петӧма токӧ ӧтчид - 1962' годӧ. Небӧгсӧ гижӧмась Илля Вась кипод увтын. Сэсся эттшӧм уджжез перем комиэзлӧн эзӧ ни вӧлӧ.
1990' воэз пондӧтчикӧ коми отирыс мӧдісӧ вились лэбтыны перем коми кывлісь донсӧ: пондісӧ велӧтны коминас челядьнысӧ, коми кылыс бӧра петіс газета листбоккез вылӧ, пондіс кывны радиоӧт да телевиденнё вылын. Но вылӧ кайны коми кылыслӧ Коми кытшын веськӧтліссез эзӧ сетӧ. 1992' годӧ нія эзӧ керӧ сійӧ веськӧтлан кылӧн, а сэсся пондісӧ быднёж дзескӧтны коми кыв вылын уджалан берсясӧ, пӧдналӧны коми кыв велӧтӧм школаэзын.
Ӧння кадӧ Коми кытшын бӧра весӧтӧны бы перем коми терминология. Виль велӧтан небӧггезӧ пыртӧны ни сэтшӧм вунӧтӧм кыввез, кыдз шыпас (буква туйӧ), кывбур (стихотвореннё туйӧ) да мӧдіккез. Комиӧн баитыштӧ радио да телевизор, газетаын петӧ коми листбок. Но глобализируйтчӧм коста вились саймӧтны коми отирыслісь интерес мам кыв дынӧ лоӧ ӧддьӧн сьӧкыт.
Кывлад
[вильмӧтны | Вильмӧтны код]Коми кывлад йылісь баитікӧ сьӧрсьӧн-бӧрсьӧн видзӧтӧны кывсӧ куим ладӧрсянь: фонология (сёрни шыэз йылісь велӧтӧм), морфология (кыв формаэз йылісь велӧтӧм) да синтаксис (кыввез йитчӧм йылісь велӧтӧм).
Перем коми кывлад йылісь татӧн гижам унажыксӧ А.С. Кривощёкова-Гантаманлӧн «Дженынт грамматика» сьӧрті [6].
Фонология
[вильмӧтны | Вильмӧтны код]Коми фонология видзӧтӧ, кытшӧм сёрни шыэз эмӧсь коми кылын, кыдз нія вежсьӧны нето асалӧны ӧтамӧднысӧ сёрниын, мыйся шы вынсьӧтан лоӧ аскодяӧн торья коми диалекттэзлӧ нето лыддьӧтан кыввезлӧ.
Шыэз
[вильмӧтны | Вильмӧтны код]Перем коми кылын нія жӧ сёрни шыэз, кыдз и зыряналӧн коми кыланыс. Быдсӧн важ вужья шуаннэзын пантасьӧны 33 торья шы.
Коми кылын сизим тыргора шы:
| пыдына | ||||
|---|---|---|---|---|
| матісь | шӧрись | ылісь | ||
| лэбтӧм | вылына | и | ы | у |
| шӧрӧдз | э | ӧ | о | |
| лажмыта | а | |||
Шума шыэз:
| вылісь тырп | кывйыв | кывшӧр | кывбӧр | ||||||
|---|---|---|---|---|---|---|---|---|---|
| улісь тырп | улісь пиннез | вылісь пиннез | альвеола | палатум одз | палатум бӧр | велум | |||
| чаналан | нумган | м | н | нь | |||||
| орддян | л | ль | |||||||
| зэгалан | р | ||||||||
| тыр шума | поткӧтан | гортӧм | п | т | ть | к | |||
| гора | б | д | дь | г | |||||
| зыртчан | гортӧм | (ф) | с | ш | сь | (х) | |||
| гора | в | з | ж | зь | й | ||||
| гартчан | гортӧм | (ц) | тш | ч | |||||
| гора | дж | дз | |||||||
Пасйӧттэз таблича сьӧрті:
- й, в – джынви тыргора шыэз
- Шыэз ф, х да ц шуӧны дзир рочись босьтӧм кыввезын. Одзжык ны туйӧ шуисӧ п, к, ч/с (перма, калат, чена, сар)
- Эна шыэзся ӧння кад кежӧ перем комиэз кужӧны ни роччезлісь босьтӧм кыввезын шыӧтны быдӧс небыт шума шыэсӧ, коть одзжык небыт шума шыэз туйӧ шуисӧ чорыттэсӧ: монастыр, сем, зяб, степ
Шы вынсьӧтӧм
[вильмӧтны | Вильмӧтны код]Перем коми кылын аскодя шы вынсьӧтӧм, кӧда оз вачкись зырана кылын шы вынсьӧтан вылӧ не мукӧд перем диалекттэзісь шы вынсьӧтан вылӧ.
Лыддьӧтан кылын перем комиэзлӧн сія лоӧ морфологизируйтӧм, м. ш. мукӧд содтассэз пыр вынаӧсь (сідз, небзьӧтан содтас -ок: пызанок, пурток), мукӧдыс бӧра некӧр оз вынсьӧтчӧ (шуам, эманимлӧн места кӧрталан содтас -ын: вӧрын, Перемын), вӧлись куимӧттэз кыскӧны вынсьӧтӧмсӧ ас одзись слогӧ (шуам, ордчӧтан содтас -жык: чочкомжык, пемытжык).
Графика да орфография
[вильмӧтны | Вильмӧтны код]Шыпассэз
[вильмӧтны | Вильмӧтны код]КОМИ АНБУР
| А а | Б б | В в | Г г | Д д | Е е | Ё ё | Ж ж |
| З з | И и | І і | Й й | К к | Л л | М м | Н н |
| О о | Ӧ ӧ | П п | Р р | С с | Т т | У у | Ф ф |
| Х х | Ц ц | Ч ч | Ш ш | Щ щ | Ъ ъ | Ы ы | Ь ь |
| Э э | Ю ю | Я я |
Анбур (алфавит) тэчӧма 35 шыпасісь, ны коласын быдӧс роч шыпассэз да кык асланым - ӧ, і.
Шыпассэз сьӧрсьӧн-бӧрсьӧн мунӧны сідз: а, б, в, г, д, е, ё, ж, з, и, і, к, л, м, н, о, ӧ, п, р, с, т, у, ф, х, ц, ч, ш, щ, ъ, ы, ь, э, ю, я.
Шыпас і видзӧны, мед мыччавны тыргора шы и гозъя чорыт шума шыэз бӧрын (т, д, с, з, н, л): тійӧ, тӧді, сім, зі, ӧні, вӧлі; абу кӧ этія тыргора шы одзын гозъя чорытыс, сійӧ жӧ мыччалӧны и шыпасӧн.: мийӧ, син, йирны, иган).
Шыпас э видзӧны, мед мыччавны небыт шы э кыв пондӧтчикӧ да гозъя чорыт шума шыэз бӧрын (эстӧн, тэнат), мӧд шыэз бӧрын гижӧны е (менам, сетны).
Ассяма гаршыэз (гартчӧм шыэз) мыччалӧны кык шыпасӧн:
- небыт гора — дз: дзор, видза, кыдз;
- чорыт гортӧм — тш: тшак, етша, потш;
- чорыт гора — дж: джодж, вуджны.
Баитчӧм сьӧрті гижаннэз
[вильмӧтны | Вильмӧтны код]Морфология
[вильмӧтны | Вильмӧтны код]Коми морфология велӧтӧ торья кыввезлісь (шуаннэзлісь) тэчсьӧм (кываркмӧм), содтӧт формаэзнысӧ да вежласян кыв парадигамаэсӧ. Быдӧс этійӧ морфология видзӧтӧ сёрни торрез пыр. Перем коми кыв лад сьӧрті велалӧмась адззыны 11 сёрни тор:
- эманим (существительнӧй)
- тӧдчанним (прилагательнӧй)
- тӧдчанкыв (наречиё)
- лыдним (числительнӧй)
- нимвежлас (местоименнё)
- кадакыв (глагол)
- кывбӧр (послелог)
- йитас (союз)
- торок (частица)
- ыкӧстан (междометиё)
- серкыв (изобразительнӧй слово)
Серкывсӧ оз быдыс пукты сёрни тор туйӧ, унажыкыс лыддьӧны сійӧ тӧдчанкылӧн.
Кадакылын торйӧтӧны эшӧ причассёэз да деепричассёэз.
Эманим
[вильмӧтны | Вильмӧтны код]Эманим коми кылын вежласьӧ лыддян (число), асалан да кӧрталан (падеж) сьӧрті.
Унаӧ лыддян (множественнӧй число) перем коми кылын мыччалӧны эз содтасӧн:
- керку - керкуэз
- пон - поннэз
Асалан мыччалӧны тодильнӧй асалан суффикссэзӧн:
| Асалісьлӧн мортін |
Содта | Мыччалан |
|---|---|---|
| Ӧтікӧ лыддян | ||
| 1 | ӧ / -м | киӧ, кинам |
| 2 | ыт / -т- | киыт, кинат |
| 3 | ыс / -с- | киыс, кинас |
| Унаӧ лыддян | ||
| 1 | ным | киным |
| 2 | ныт | киныт |
| 3 | ныс | киныс |
Кӧрталан (падеж) мыччасьӧ кӧрталан суффикссэзӧн. Перем комиэзлӧн лыддьӧтан кылын эм кӧртавтӧм (под) форма да 17 кӧрталан. Мукӧд кӧрталан суффикссэзлӧн эм вына да жеб варианттэз, мӧддэс овлӧны токӧ сора вежласьӧмын.
| Кӧрталан | Содтас | Куш вежласьӧм | Сора вежласьӧм (ӧ. 3' м. ) |
|---|---|---|---|
| под | ― | вӧв ыб |
керкуыс |
| видзан | лӧн | вӧвлӧн ыблӧн |
керкуыслӧн |
| босьтан | лісь | вӧвлісь ыблісь |
керкуыслісь |
| сетан | лӧ | вӧвлӧ ыблӧ |
керкуыслӧ |
| ветлан | ла | вӧвла ыбла |
керкуысла |
| керан | ӧс, - / -ӧ | вӧлӧс ыб |
керкусӧ |
| керӧтан | ӧн / на- | вӧлӧн ыбӧн |
керкунас |
| ӧтувтан | кӧт | вӧвкӧт ыбкӧт |
керкуыскӧт |
| торйӧтан | тӧг | вӧвтӧг ыбтӧг |
керкуыстӧг |
| ордчӧтан | ся | вӧвся ыбся |
керкуысся |
| олан | ын / а- | вӧлын ыбын |
керкуас |
| петан | ись (ісь) / си- | вӧлісь ыбись |
керкусис |
| пыран | ӧ / а- | вӧлӧ ыбӧ |
керкуас |
| сибӧтчан | лань / ланя- | вӧвлань ыблань |
керкуланяс / керкуыслань |
| ылынтчан | сянь / сяня- | вӧвсянь ыбсянь |
керкусяняс / керкуыссянь |
| вуджан | ӧт / ӧття- | вӧлӧт ыбӧт |
керкуӧттяс |
| 1' судзан | ӧдз / ӧдзза- | вӧлӧдз ыбӧдз |
керкуӧдззас |
| 2' судзан | ви | вӧвви ыбви |
керкуысви |
Тӧдчанним
[вильмӧтны | Вильмӧтны код]Коми тӧдчанним вежласьӧ тшупӧттэз сьӧрті
| Тшупӧт | Содтас | Мыччаланнэз |
|---|---|---|
| Под | - | ыджыт, том |
| Компаратив | -жык | ыджытжык, томжык |
| Суперлатив | мед- | медыджыт, медтом |
| Сатив | -кодь | ыджыткодь, томкодь |
| Эксцессив | -ӧв | ыджытӧв, томӧв |
| Диминутив | -ыник / -ик | ыджытик, томыник |
Лыдним
[вильмӧтны | Вильмӧтны код]| Лыддьӧс | Кодя лыдним | Сьӧрся-бӧрся лыдним |
|---|---|---|
| 1 | ӧтік | медодзза |
| 2 | кык | мӧдік |
| 3 | куим | куимӧт |
| 4 | нёль | нёльӧт |
| 5 | вит | витӧт |
| 6 | квать | кватьӧт |
| 7 | сизим | сизимӧт |
| 8 | кыкьямыс | кыкьямысӧт |
| 9 | ӧкмыс | ӧкмысӧт |
| 10 | дас | дасӧт |
| 11 | дасӧтік | дасӧтікӧт |
| 12 | даскык | даскыкӧт |
| 13 | даскуим | даскуимӧт |
| 14 | даснёль | даснёльӧт |
| 15 | дасвит | дасвитӧт |
| 16 | дасквать | даскватьӧт |
| 17 | дассизим | дассизимӧт |
| 18 | даскыкьямыс | даскыкьямысӧт |
| 19 | дасӧкмыс | дасӧкмысӧт |
| 20 | кыкдас | кыкдасӧт |
| 21 | кыкдас ӧтік | кыкдас ӧтікӧт |
| 30 | куимдас | куимдасӧт |
| 40 | нёльдас | нёльдасӧт |
| 50 | витдас | витдасӧт |
| 60 | кватьдас | кватьдасӧт |
| 70 | сизимдас | сизимдасӧт |
| 80 | кыкьямысдас | кыкьямысдасӧт |
| 90 | ӧкмысдас | ӧкмысдасӧт |
| 100 | сё | сёӧт |
| 1000 | сюрс | сюрсӧт |
| 1985 | сюрс ӧкмыссё кыкьямысдас вит | сюрс ӧкмыссё кыкьямысдас витӧт |
Нимвежлас
[вильмӧтны | Вильмӧтны код]Кодя нимвежлассэс:
| ӧтікӧ лыддян | унаӧ лыддян | |
|---|---|---|
| 1' мортін | ме | мийӧ, ми |
| 2' мортін | тэ | тійӧ, ті |
| 3' мортін | сія | нія |
Кадакыв
[вильмӧтны | Вильмӧтны код]Кадакыв вежласьӧ кад, мортін да лыддян сьӧрті. Сылӧн эм нёль модус: индикатив, императив, конъюнктив, оптатив.
Под форма - тшӧктан модуслӧн (императив) ӧтікӧ лыддян мӧдӧдз мортін: мун, кер, пукты.
Инфинитив аркмӧ под сьӧрас суффикс -ны содтӧмӧн: мун-ны, кер-ны, пуктыны.
Вежласикӧ аффирмативын вежам суффикссэз, негативын – префикссэз да суффикс:
- мун-а-н – о-н-мун
- кер-а-с-ӧ – о-з-ӧ-кер-ӧ
- пукт-а-с – о-з-пукты
Суффиксісь тыргора шы одзын под помсис -ы ӧшӧ: пукты - пукт-а-с.
Кывладісь быд вежӧртас мыччалӧны торья аффикссэз (содтассэз), кӧдна ӧтлаасьӧны кывйыввезӧ.
Мыччалам, кыдз вежласьӧ керны кадакыв.
| Мортін | Ӧння кад | Лоан кад | Чулалӧм кад | |||||||||
|---|---|---|---|---|---|---|---|---|---|---|---|---|
| Аффирматив | Негатив | Аффирматив | Негатив | Аффирматив | Негатив | |||||||
| Ӧтікӧ лыддян | ||||||||||||
| 1' | кера | ог кер | кера | ог кер | кери | эг кер | ||||||
| 2' | керан | он кер | керан | он кер | керин | эн кер | ||||||
| 3' | керӧ | оз кер | керас | оз кер | керис | эз кер | ||||||
| Унаӧ лыддян | ||||||||||||
| 1' | керам(ӧ) | ог(ӧ) керӧ | керам(ӧ) | ог(ӧ) керӧ | керим(ӧ) | эг(ӧ) керӧ | ||||||
| 2' | керат(ӧ) | од(ӧ) керӧ | керат(ӧ) | од(ӧ) керӧ | керит(ӧ) | эд(ӧ) керӧ | ||||||
| 3' | керӧны | оз(ӧ) керӧ | керасӧ | оз(ӧ) керӧ | керисӧ | эз(ӧ) керӧ | ||||||
Пасйӧттэз.
- ӧння кадас да лоан кадас кывйыввез неӧткодьӧсь токӧ куимӧт мортін аффирматив дырни (ӧ/ӧны да ас/асӧ).
- Лоан кад да чулалӧм кад формаэз неӧткодьӧсь токӧ кад мыччаланӧн (-а/о- нето -и/э-).
- Ӧння кадас куимӧт мортін мыччалӧ флексия -ӧ, кӧда ӧткоста мыччалӧ и кадсӧ.
Императивын вежласьӧм:
| Императив кывйыввез | ||||
|---|---|---|---|---|
| Мортін | Тшӧктікӧ | Ӧлікӧ | ||
| Ӧтікӧ лыддян | ||||
| 1' | ||||
| 2' | кер | эн кер | ||
| 3' | ась керӧ | ась оз кер | ||
| Унаӧ лыддян | ||||
| 1' | керам(те) | ог(ӧ) -керӧ | ||
| 2' | -керӧ(те) | эд(ӧ) керӧ | ||
| 3' | ась керӧны, ась керасӧ | ась оз(ӧ) керӧ | ||
Кадакывлӧн инфинит формаэз
[вильмӧтны | Вильмӧтны код]Инфинитив
- -ны: керны, пуктыны
Партициппез
- -ись: керись, пуктісь
- -ан: керан, пуктан
- -ӧм: керӧм, пуктӧм
- -тӧм: кертӧм, пуктытӧм
Герунддэз
- -икӧ: керикӧ, пуктікӧ
- -тӧн: кертӧн, пуктытӧн
- -тӧдз: кертӧдз, пуктытӧдз
- -тӧг: кертӧг, пуктытӧг
- -ӧмӧн: керӧмӧн, пуктӧмӧн
Кывбӧррез
[вильмӧтны | Вильмӧтны код]Кываркмӧм сьӧрті кывбӧррез коласын янсӧтчӧны кык чукӧр:
- кодя кывбӧррез, кӧдналӧн кӧрталан содтассэз абуӧсь ни кодь: понда, дырна, дырья, сьӧрті. Этшшӧм кывбӧррез асьныс кӧрталан содтассэз туйӧ петӧны, кӧрталӧны ӧтмӧдныскӧт торья кыввесӧ. Кӧрталланнэзӧн жӧ нійӧ озӧ лыддьӧ сійӧн, мыля слоггезныс ӧтікся унажык. Кодя кывбӧррез коласын сэсся янсӧтӧны: ин кӧрталан, кад кӧрталан, ортчӧтан, лӧсялӧм мыччалан, помка-мог кӧрталан да с.о.
- Нима кывбӧррез, кӧдналӧн эм вуж да ин кӧрталан содтассэз.
Ин сьӧрті быдкодь йитӧттэсӧ (отношеннёэз) мыччалӧны нима кывбӧррез. Нія вужнаныс шуӧны ин, кӧда куйлӧ кытшӧмакӧ эмторыс сьӧрті (сы одзын, дорын, весьтын, сайын да мд.): керӧс увтын, керку сайын; ю дорын, школа одзын.
Нима кывбӧррез да мукӧдыс кодя кывбӧррезісь вермӧны кышавны асалан содтассэз, шуам пызаныт увтын туйӧ позьӧ висьтавны пызан увтат; пызаныт увтісь туйӧ - пызан увтсит.
Йитассэз
[вильмӧтны | Вильмӧтны код]Йитассэз янсӧтчӧны кык ыджытжык чукӧрӧ: ёрталанаӧсь да увтыртанаӧсь.
1. Ёрталан йитассэз
а) ӧтлаӧтӧмӧн: и, да, сідзжӧ, тожӧ, не — не, шуам: Кушамӧ ыб, и му шуралӧ; Быд лун сылӧ вовлісӧ телеграммаэз да письмоэз; Зоночка любитіс лыддьӧтны, сія сідзжӧ занимайтчис спортӧн.
б) янсӧтӧмӧн нето оча пуктӧмӧн: а, но, да, или, али, то — то, то ли, шуам: Керкуным бур, да юыс матын абу; Небоын югьяліс шонді, а руыс вӧлі кӧдзыт
2. Увтыртан йиттассэз
а) висьталантор: что, чтобы, медбы, бытьтӧ, кыдз бытьтӧ, шуам: Бур, что лымыс одз сыліс; Петялӧ кажитчис, бытьтӧ ойся вӧрын кинкӧ ветлӧтӧ; Быдыс тӧдіс, что чожа войнаыс кончитчас
б) кад: кӧр, кыдз, только, кытчӧдз, шуам: Кӧр мужиккез саймисӧ, Ипатов керкуас эз ни вӧв; Только пондіс югдыны, вӧраліссез вӧлісӧ кок йылын ни
в) гӧгӧртас: кӧ, кӧбы, если, ежели, коли, раз, шуам: Гортсянь кӧ лэдзасӧ, сэк мунам татісь; Ежели бы кӧч ветлӧтіс эсті, сійӧ адззисӧ бы след сьӧрті; Если колӧ сёрнитны мекӧт, кай татчӧ
г) помка: мыля, сідз кыдз, сійӧн что, сысянь что, сійӧн мыля; шуам: Библиотека оз уджав, сідз кыдз мунӧ ремонт; Юннаттэз киськалісӧ пуоккез, сійӧн мыля гожумыс ӧддьӧн жар. Огӧ ни кайӧ вӧрас, лӧсьӧтчӧ зэрны да.
д) мог: мед, медбы, сы понда, медбы, шуам: Варяыс муніс мӧдӧрӧ, медбы сыкӧт не пантасьны; Деддэзным пессисӧ сы понда, медбы мийӧ бура олім.
Тороккез
[вильмӧтны | Вильмӧтны код]Тороккесӧ янсӧтӧны сэтшӧм чукӧррезӧ:
а) таксьӧтан: нельки, нӧ, инӧ: нельки кылыс ӧшис; кытчӧ инӧ мунан?
б) чинтан: только: только татӧн эм быдӧс
в) мыччалан: вон, вон тай, то : то кытӧн вӧлӧма тшакыс!
г) юасян: я, разь, неужели, ли мый ли: абу я татӧн ваок?
д) соссян: абу; не: не, не сія; меным абу охота
е) сетчан: мыйнӧ: мыйнӧ, сідз и вӧлі быдӧс
ж) кад йитан: на, ни, эшӧ: ме эг на вӧв татӧн; ӧвсьы ни
з) пыртан: тай, эд, кӧть, некӧ, мыся, пӧ: мунам, пӧ, клубӧ; мыся, ог мун
и) мӧдан: бы, давай, ась, мед, нӧ, -ко: висьтав-ко; ме бы ветлі; ме бы ветла жӧ
к) ордчӧтан: топ, дзик: сія топ айыс
Ыкӧстаннэз
[вильмӧтны | Вильмӧтны код]Серкыввез
[вильмӧтны | Вильмӧтны код]Коми кылын, кыдз и урал-алтай вужа мӧдік йӧз сёрниын серкыввес тыр. Серкыввезӧн мийӧ нимтамӧ кыввез, кӧдна вачкисьӧны быдкодь оланшыэз вылӧ нето серпасалӧмӧн мыччалӧны вешшӧммез, асвидзӧммез (состояннёэз), коддьӧммез (качествоэз) да мд.
Шы мыччалан серкывез. Шуам: кар-р, кар-р — рака карзӧм вылӧ вачкисьӧ, крив-крув, крив-крув — туриэз кривзӧны, кук-ку, кук-ку — кӧкӧкӧк, ур-р, ур-р — ургӧ дудіыс, чив-чив — чивзӧ рудкайыс, герс-герс — герсканыслӧн шыыс, чав-чав — чавкан горӧтӧ, чирк-чирк — кӧбывкаэз чирскӧны да с.о.
Унакодь и адззӧмсӧ мыччалан серкыввез: дзар: дзар керны ‘чожа видзӧтны’; жӧв: жӧв керсьыны ‘чӧв усьны’; сяр: сяр сулавны ‘арттӧг сулавны’ (уна йылісь); чывк: чывк керны ‘чожа бергӧтчыны’ (морт йылісь); кваркыш: кваркыш керны ‘куньыштлыны син’; питькыр-питькыр: питькыр-питькыр мунны ‘мунны каджжезӧн питькырасьтӧн’; лег-лег: лег-лег керны чуньӧн ‘повзьӧтны чуньнас’.
Синтаксис
[вильмӧтны | Вильмӧтны код]Лексика да терминология
[вильмӧтны | Вильмӧтны код]Перем коми кыв туяліссез да велӧтіссез
[вильмӧтны | Вильмӧтны код]Перем комиэз коласісь ассиныс кывнысӧ наука ладӧрсянь туялісӧ кӧркӧ нето ӧні туялӧны 15 морт:
- Аксёнова Ольга Петровна, Кудымкар (топонимика).
- Баталова Раиса Михайловна, Мӧсква (диалектология).
- Ботева Елена Васильевна †
- Кривощёкова-Гантман Антонина Семёновна †
- Лобанова Алевтина Степановна, Перем (диалектология, лексикология).
- Майшев Иван Иванович †
- Меркушева Татьяна Николаевна, Кудымкар (лексикология).
- Нечаев Геннадий Андреевич †
- Ӧньӧ Лав, Турку (лыддьӧтан кыв история, лексикография).
- Пономарёва Лариса Геннадьевна, Кудымкар (диалектология, фонетика, морфология).
- Попова Ольга Анатольевна, Кӧч посад (фразеология, кыв сьӧрті велӧтан методика).
- Попова Римма Павловна, Сыктывкар (диалектология, фонетика).
- Ратегова Людмила Петровна, Кудымкар (диалектология).
- Тудвасева Зинаида Константиновна, Мӧсква (кыв сьӧрті велӧтан методика).
- Утева Любовь Валериевна, Перем (лексикология)
- Федосеева Елена Николаевна, Сыктывкар (диалектология, лексикология).
Коми кыв сьӧрті велӧтан небӧггесӧ гижисӧ и гижӧны велӧтіссез да методисттэз: [7]
- Батина Анна Николаевна
- Боталова Людмила Фроловна
- Бражкина Нина Егоровна
- Галкина Маргарита Егоровна
- Гусельникова Антонина Николавна
- Зубов Фёдор Егорович
- Истомина Надежда Дмитриевна
- Казанцева Евдокия Алексеевна
- Калина Галина Андреевна
- Караваева Мария Петровна
- Кривощёкова Тамара Захаровна
- Мехоношина Нина Семёновна
- Мошегова Анна Трофимовна
- Надымова Раиса Семёновна
- Немтинова Галина Ильинична
- Нечаева Антонина Ивановна
- Нечаева Галина Андреевна
- Никонова Клавдия Александровна
- Отинова Анфиса Ивановна
- Плотникова Раиса Даниловна
- Подьянова Анна Леонтьевна
- Полуянова Надежда Ильинична
- Порсева Эмма Ивановна
- Распопова Зоя Васильевна
- Селина Галина Петровна
- Спорова Анна Михайловна
- Субботина Лидия Алексеевна
- Тотьмянина Тамара Егоровна
- Тупицына Акилина Петровна
- Тупицына Раиса Ивановна
- Федосеева Валентина Васильевна
- Финк Лидия Ивановна
- Четина Лидия Дмитриевна
- Четина Майя Васильевна
- Яркова Лилия Фёдоровна
Видзӧт сідзжӧ
[вильмӧтны | Вильмӧтны код]Ыстісяннэз
[вильмӧтны | Вильмӧтны код]- ↑ Игушев Е.А. Фин-йӧгра кывъяс туялан подувъяс. Сыктывкар, 2004. Лб. 4
- ↑ Мӧд источниккез сьӧрті сэтшӧм отирыс токӧ 3,5 сюрс
- ↑ Концепция краевой целевой программы «сохранение и развитие коми-пермяцкого языка (2010-2012 годы)»
- ↑ Кафедра общего языкознания, русского и коми-пермяцкого языков и методики преподавания языков
- ↑ Коми-пермяцкӧй кывлӧн орфографическӧй правилоэз. Кудымкар, 1938. С. 2.
- ↑ Труды института языка, истории и традиционной культуры коми-пермяцкого народа. Выпуск 3. Пермь, 2006. С. 111-144.
- ↑ Учебная литература для национальных образовательных учреждений Коми-Пермяцкого округа. Кудымкар, 2008.
Лыддьӧтан
[вильмӧтны | Вильмӧтны код]Кывкуддэз
- Рогов, Н. А. Пермяцко-русский, русско-пермяцкий словарь. СПб., 1869.
- Роча-коми кыввез натодиль канцелярия да суд уджын. Кудымкар, 1932.
- Терминнэз. Кудымкар, 1940.
- Кузнецов, П. С., Спорова, А. М. Русско-коми-пермяцкий словарь. Кудымкар, 1946.
- Грибанов, С. Ф. Коми-пермяцкӧй орфографическӧй словарь. Кудымкар, 1945.
- Терминнэз. Кудымкар, 1948.
- Грибанов, С. Ф. Коми-пермяцкӧй орфографическӧй словарь. 2-к изд. Кудымкар, 1955.
- Коми-пермяцкӧй орфографическӧй словарь. Кудымкар, 1966.
- Баталова, Р. М., Кривощекова-Гантман А. С. Коми-пермяцко-русский словарь. – М.: Русский язык, 1985.
- Баталова, Р. М, Кривощёкова-Гантман А. С. Коми-пермяцкӧй орфографическӧй словарь. 2-к изд. Кудымкар, 1992.
- Немтинова, Г. И., Федосеева, В. В., Яркова, Л. Ф. Коми-пермяцко-русскӧй русско-коми-пермяцкӧй словарь. Кудымкар, 1993.
- Русско-коми-пермяцкий разговорник. Кудымкар, 2008. ISBN 978-5-87901-124-1
- Попова, О. А. Коми-пермяцкий фразеологический словарь. Пермь, 2010. ISBN 978-5-85218-489-4
Грамматикаэз
- Роговъ, Н. Опытъ грамматики пермяцкаго языка. СПб., 1860.
- Зубов, А. Н. Основы грамматики пермяцкого наречия языка коми. М., 1931.
- Майшев, И. И. Грамматика коми-пермяцкого языка. М.-Л., 1940.
- Коми-пермяцкий язык: Введение, фонетика, лексика и морфология / под ред. и при соавт. проф. В. И. Лыткина. Кудымкар: Коми-перм. кн. изд-во, 1962.
Туялӧммез
- Аксёнова, О. П. Коми-пермяцкие географические термины и их функционирование в топонимии Верхнего Прикамья. Кудымкар, 2009. ISBN 978-5-904524-35-7
- Баталова, Р. М. Ареальные исследования по восточным финно-угорским языкам (коми языки). М., 1982.
- Баталова, Р. М. Коми-пермяцкая диалектология. М., 1975.
- Кривощекова-Гантман, А. С. Собрание сочинений в 2 томах. Пермь, 2006. ISBN 5-85218-289-3; ISBN 5-85218-288-5
- Лобанова, А. С., Шляхова, С. С. Коми-пермяцкий язык конца ХХ - начала ХХІ веков: стилистические аспекты. Пермь, 2010. ISBN 978-5-85218-475-7
- Нечаев, Г. А. Отношение окружного коми литературного языка к северным диалектам Коми округа // Сборник комиссии по собиранию словаря и изучению диалектов коми языка. Вып. II. М., 1931.
- Пономарева, Л. Г. Фонетика и морфология мысовско-лупьинского диалекта коми-пермяцкого языка: дис. … канд. филол. наук. Ижевск, 2002.
- Цыпанов, Е. А. Перым-коми гижӧд кыв. Сыктывкар, 1999.
Ыстӧттэз
[вильмӧтны | Вильмӧтны код]- Баталова Р.М. Коми-Пермяцкий язык. (роч)
- Перем коми анбур (роч)
- Дженыт разговорник (роч)
- Роча перем коми кывчукӧр (Башуров-Пыстогов)
- Вильторрез перем коми кыв вылын
 Чудь-йӧгра кыввез
| |||
| Йӧгра увтыр | Мадьяр кыв | Маньси кыв | Ханты кыв | ||
| Перым увтыр | Коми кыв (стандарттэз: зыряна | перем) | Удмурт кыв | ||
| Мари увтыр | Мари кыв (стандарттэз: олык | курык) | ||
| Мордва увтыр | Мокша кыв | Эрзя кыв | ||
| Чудь увтыр | Фин кыв | Эст кыв | Вепс кыв | Водь кыв | Карел кыв | Лив кыв † | Ижора кыв | ||
| Саам увтыр | Саам кыв (стандарттэз: анараш | давви | кильдин | колтта | оарьел | юлев) | ||
| Важын ӧшӧм кыввез | Меря кыв † | Мещера кыв † | Мурома кыв † | ||
| † Ӧшӧм кыввез | |||