Èlpiji

Truk kang lagi momot tabung gas Elpiji ing Singapura

Èlpiji, ing pocapan basa Indonésia akronim saka basa Inggris; LPG (liquified petroleum gas, barès: "gas lenga patra kang dicuwèraké"), ya iku campuran saka unsur hidrokarbon kang saka gas alam. Kang ditambahi tekanan lan dimudhunké suhuné, gas malih dadi cuwèr. Komponèn gas didominasi propana (C₃H₈) lan butana (C₄H₁₀). Èlpiji uga ngadhut hidrokarbon ènthèng liyané kaya ta etana (C₂H₆) lan pentana (C₅H₁₂).

Ing sajeroning kondisi atmosfer, èlpiji dadi gas. Isi èlpiji ing wujud cuwè luwih sithik dibanhingké ing wujud gas kang aboté padha. Amarga iku èlpiji dipasarké ing wujud cuwè ing tabung-tabung logam bertekanan. kanggo nyegah ekspansi panas (thermal expansion) saka cuwèran kang dikadhung, tabung èlpiji ora diisi kebak, mung sakiwa-tengené 80-85% saka kapasitas normal. Rasio antara volume gas nalika nguap iku néka-néka manut isiné, tekanan lan temperatur, nanging racaké sakiwa-tengené 250:1.

Miturut spesifikasi, èlpiji dibagi dadi telung pérangan, ya iku èlpiji campuran, èlpiji propana lan èlpiji butana. Spesifikasi saben-saben èlpiji wis didaftaraké ning kaputusan Direktur Jendral Minyak lan Gas Bumi Nomor: 25K/36/DDJM/1990. Èlpiji kang dipasarké Pertamina iku elpiji campuran.