Vag
| |
Romi
|
Axia khonddantlea felidde hea marzar kullantolo soglleant vhodd ani bollixtt pranni. Prixtthounxi vibhagantolo ho pranni stonivrgant moddtta. Tacho gonn karnivora ani kull felidde. Tachem xastri-i namv ponthera ttaigris. Tiger with facial marking: Ranthambore, India.
Vag ho pranni ximvabhoxenuch bollixtt. Punn ximvaporos to khub dhurt, chopoll ani krur. Vag hem ddorkalli foddpi mazor. Punn tachi ddorkalli ximvaporos khub komi. Tacho aspavo nixachor pranneant zata aslo tori vag disacho xitoll suvater visou ghetna khub kodden dixtti poddtta. Choddxa vaganchi kemsall kat tambxi hollduvosar asun ticher kalle potte astat. Gollo, pott ani pamyanchea bhitrolo for dhovo asta. Fokot reva vattharant sampddopi vag dhouso asun tacher topkiri rongache potte astat. Vagache dolle nillxe asun, nek ani pamyanchim tollttam gulabixim astat. Taka ayall nasta. Punn zannttea vagak kansulacher lamb kems asta. Tache kan bhaile votten kalle asun tancher dhove thipke astat. Oxa rongache katik lagun taka ujvaddant ani saullent soimik rakhonn (natural camouflage) melltta. Sadaronnoponnan vagachi lambai kopol te xempddechea pontameren 260 - 290 sem'mi. Itli asta. Tachea sangaddeachi rochnnuk khaxele pod'dotin zal'li asun to fattlea mamsall bhagank uddi marpak ani fuddlea pamyank avumllopak va oddun vhorpak boll puroita.
Sadaronnoponnan vegvegllea vaganchi prodexapromann vibhagonni kelea. Dekhik - siberiyon vag (ponthra ttigris alttaika); chini vag (ponthra ttigris emoyemsis); bongal vag (ponthra ttigris ttigris); kespiyon vag (ponthra ttigris virgetta); sumtra vag (ponthra ttigris sumatre); bali vag (ponthra ttigris balika). Vegvegllea vattharant sampddopi vaganchi prozati thoraupakhatir khub yotn zale. Punn sodea soglle vag ekuch prozatibhitor aspautat hem odhikritoponnan manun ghetlam.
Soglleant poilim vagachem ostitv siberia ani novea siberia zumveancher aslem hem thoim sampddil'lea jivaxmamvoilean kolltta. Uprant lhou lhou dokxinnekodden te molexiyon archiplego prodexant patll'lle. Punn sodea bhartant tanchem promann chodd asun, lagim lagim bhartachea sogllea vattharamni te mellttat. Vag pachveanchar datt ranamni, vosu ranamni toxench jhili - zhopamni raupak xoktat. Vagachi chal nettachi. To ratcho aplem bhokx sodpakhatir moilanche moil pois cholun vota. To vegan khub pois meren dhamvpak xokta. Randukor, mhoxi, gorvam, bokddam ani hornnanchi xikar korun to khata. Hea zonauranchi xikar korpak taka opex ailear to bebo, gar, mangem, rankombo ani her sorpotti pranni marun khata. Sadaronnoponnan ek khepe vag 18 - 20 kilo mams khata. Choddkorun vag apli xikar ekttoch korta. Vagachem nak, kan ani vodor him indriyam tikxnn asun tanchea adaranuch to aplea bhokxameren pauta. Punn ken'na ken'nai vag zoddeamni mellun xikar kortat. Gai sagkil'lem vhodd zonaur to tin dis meren khata. Bhokxak marlea uprant survek to tachem rogot ghott'ta ani uprant aplea dhardar datamni zotthor ani antokddeo kuxik kaddun fokot mams khata. To kuxil'lem mamsuy khata. Bhokxak khal'lea uprant to aplim nakhttam zhaddache salir ghasun nitoll korta.
Vag pirayechea chouthea va panchvea vorsa voyant yetat. Uprant fuddlim 11 te 14 vorsam'meren vaginn dor oddez vorsamni ekdam folltta. Tancho somagom' kall choddkorun pausa uprant suru zata. Follpak yetkoch vaginn ddorkalli foddun vagak sad ghalta. Lagim lagim ek pondros ti ekttham-i rautat. 105 te 115 disancho tancho gorbhaudhi asta. Vaginn eka vellar 2 te 6 chhaveank zolm' dita. Sadaronnoponnan chhaveanchem vozon 1 te 1.5 kigre. Asta. Vag ani vaginn choddkorun somagomachea kallantuch ekttham-i yetat. Dekhun chhaveanchi vadd vaginniche dekhrekhikhal zata. Chhavo ek vorsacho zatkuch vaginn taka aplea bhokxachi xikar korpak xikoita. Don vorsam uprant chhavo svotontroponnan aplea bhokxachi xikar korunk xokta.
Ekunnisavea xenkddeache nimannemeren bhartant vaganchem promann khub aslem. Punn sodea tem khub unnem zal'lem asa. Hachem mukhel karonn mhollear hisbabhair rantodd ani sorrasoponnan zaupi tanchi xikar. Vagachi kat, haddam, dant ani nakhttam hankam antororaxttri-i bazaropetthent chodd khop axil'lean fattlea vorsamni vaganchi chodd promannant xikar zali. Azunuy tanchi lipchoroyam xikar chaluch asa. Vagank yogy ti rakhonn divn tanchem promann vaddoupakhatir 1972 to bharot sorkaran vixrv ranttimonozat nidhichea adaran 'preajektt ttaigor' hi yeuzonn chalik lailea.