Saltar ao contido

FC Dinamo București

Na Galipedia, a Wikipedia en galego.
FC Dinamo București
NomeFotbal Club Dinamo București
Alcume(s)Câinii roșii (Os Cans Vermellos)
Alb-roșii (Albivermellos)
Fundación14 de maio de 1948 (76 anos)
EstadioDinamo,
Bucarest, Romanía
Inauguración1951
Capacidade15.032
PropietarioRomanía Dorin Șerdean
PresidenteRomanía Constantin Eftimescu
Adestradorvacante
LigaLiga II
2021–2214º
Na rede
https://dinamo1948.ro
Facebook: DinamoBucurestiOfficial Instagram: dinamobucurestiofficial Youtube: UCBgXWmC7Lpa1bF9RV6cgF9w Editar o valor en Wikidata
Titular
Alternativo

O Fotbal Club Dinamo București, coñecido habitualmente como Dinamo București (en galego Dinamo de Bucarest) ou simplemente Dinamo, é un club de fútbol romanés con sede en Bucarest.

Fundado en 1948, militou durante case toda a súa historia na máxima categoría do fútbol romanés, a Liga I. No plano nacional, o Dinamo București é un dos dous equipos máis laureados do país, xa que gañou 18 veces a Liga I, 13 veces a Copa de Romanía, dúas veces a Supercopa de Romanía e unha vez a Cupa Ligii. Na tempada 1983/84 converteuse no primeiro club romanés en chegar ás semifinais da Copa de Europa.[1]

As cores tradicionais do Dinamo son o branco e o vermello, mentres que o escudo actual é unha versión modificada do adoptado en 1998. A súa sede é o Stadionul Dinamo, aínda que tamén xoga algúns partidos importantes no Arena Națională. O seu acérrimo rival é o FC Steaua București da mesma cidade, e os partidos entre ambos son coñecidos como "o Derbi Eterno".

Historia

[editar | editar a fonte]

O Dinamo București foi fundado o 14 de maio de 1948, cando o Unirea Tricolor MAI, que viña de integrarse en xaneiro baixo o paraugas do Ministerio do Interior do goberno comunista, fusionouse con Ciocanul București. As principais persoas que contribuíron á fundación do club foron o ministro de Asuntos Internos, Teohari Georgescu e os irmáns Alexandru e Turi Vogl.[2][3][4][5] O nome "Dinamo" utilizouse por primeira vez o 1 de maio de 1948. Con todo, o verdadeiro debut do Dinamo foi na Divizia A de 1947/48, na que rematou oitavo, cun equipo no que xogaban futbolistas como Ambru, Angelo Niculescu, Teodorescu, Șiclovan, Bartha ou Sârbu. En 1955, o Dinamo logrou o seu primeiro campionato de liga. Con Angelo Niculescu como adestrador, o equipo despregou unha forte defensa e un ataque formado por Ene I, Neagu e Suru. A defensa, con xogadores como Băcuț I, Băcuț II, Szökő, Călinoiu, foi a mellor do campionato, con só 19 goles encaixados.[6]

No outono de 1956, o equipo debutou na Copa de Europa, que celebraba a súa segunda edición. A súa estrea produciuse o 26 de agosto de 1956, con 32.000 espectadores no estadio 23 de Agosto, onde o Dinamo derrotou ao Galatasaray por 3–1. No partido de volta, perdeu en Istambul por 1–2, pero conseguiu o pase á seguinte rolda, onde finalmente caeu ante o CDNA Sofia.

En 1959 o club gañou a súa primeira Copa, mentres que nas décadas de 1960 e 1970, sumou catro ligas en cada unha delas. En 1973, na primeira rolda da Copa de Europa, derrotou no Stadionul Dinamo ao Crusaders de Belfast por 11-0, na que foi unha das maiores goleada na historia da competición.[7]

Na tempada 1983/84 o equipo rexistrou a súa mellor participación na Copa de Europa. Comezou eliminando o Kuusysi Lahti finés, ao que derrotou por 1–0 e 3–0. Na segunda rolda o seu rival foi o vixente campión, o Hamburgo de Ernst Happel. En Bucarest, Augustin, Mulțescu e Orac deixaron o marcador en 3-0,[8] mentres que o emocionante partido de volta rematou 3–2, con goles de Țălnar e Mulțescu. Para acceder ás semifinais, o Dinamo tivo que derrotar a outro destacado equipo: o Dinamo de Minsk soviético . O partido de ida acabou con empate a un gol, grazas ao gol anotado por Rednic no minuto 87, e no partido de volta venceu o equipo romanés por 1-0 con gol de Augustin. Deste xeito, o Dinamo converteuse no primeiro equipo romanés en chegar ás semifinais da competición,[9] onde se enfrontou ao Liverpool. O Dinamo caeu finalmente eliminado ao perder 1-0 en Anfield e 1-2 en Bucarest.[10]

Equipo Dinamo București en 1953.

No verán de 1990, e con Mircea Lucescu como adestrador, o Dinamo conquistou un novo título de liga, o seu décimo terceiro, e gañou tamén a final da Copa por 6–4, ante o Steaua. A continuación gañou o título de liga nos anos 1992, 2000, 2002, 2004 e 2007, pero non logrou alcanzar as fases finais das competicións europeas durante eses anos.

En 2013, o equipo cambiou de propietario, cando o empresario Ionuț Negoiță comprou o club.[11] Pouco despois a entidade foi declarada insolvente e comezou un período de malos resultados. Mesmo despois de que o club saíse da insolvencia, os resultados non melloraron e durante catro anos o Dinamo non logrou clasificarse para o play-off da Liga I. En agosto de 2020, Negoiță vendeu o club a unha empresa española, Benel International SA, representada por Pablo Cortacero.

O 26 de xuño de 2021, o club declarouse insolvente por segunda vez na súa historia. O 29 de maio de 2022, o Dinamo descendeu por primeira vez nos seus 74 anos de historia á Liga II, tras perder no play-off de descenso contra o Universitatea Cluj cun resultado global de 3-1.[12]

Escudo e cores

[editar | editar a fonte]

As cores do Dinamo son o vermello e o branco. O escudo actual inclúe o perfil de dous cans vermellos e tamén unha estrela dourada encima deles, que representan o décimo título de liga do club.

Estadio

[editar | editar a fonte]
Estadio Dinamo

O Dinamo xoga os seus partidos como local no Stadionul Dinamo. O estadio foi construído en 1951 e inaugurado oficialmente cun encontro fronte ao Locomotiva Timișoara. A súa capacidade inicial era de 16.000 espectadores, pero coa instalación de asentos reduciuse a 15.032. O estadio forma parte dun complexo máis grande que contén un estadio máis pequeno, o Stadionul Florea Dumitrache, onde o segundo equipo, o Dinamo II, xogou os seus partidos. Actualmente é usado polo equipo de rugby CS Dinamo București. Tamén conta cun pavillón polideportivo e unha piscina.

O estadio é coñecido como "Groapa" (O Pozo), xa que foi cavado en lugar de levantar bancadas.

O Dinamo xoga os partidos máis importantes, como o derbi contra o FCSB, no Arena Națională.

Afección

[editar | editar a fonte]

Estímase que o 13% dos afeccionados ao fútbol de Romanía son seareiros do Dinamo, o que o converte no segundo club romanés máis popular, só por detrás do FCSB. A maior concentración de afeccionados atópase en Bucarest, principalmente no nordeste e no centro da cidade.

Rivalidades

[editar | editar a fonte]

A maior rivalidade do Dinamo é co FCSB, e os partidos entre eles reciben o nome de derbi eterno. Son os dous clubs máis populares de Romanía e non son raros os enfrontamentos entre ambas afeccións, tanto dentro como fóra dos estadios. En 1997, os afeccionados do Dinamo incendiaron un sector do Stadionul Ghencea.[13]

A segunda rivalidade máis importante do club é contra o Rapid București. Na década de 1990, houbo unha dura competencia entre ambos para gañar o título de liga.

Palmarés

[editar | editar a fonte]
  • Liga I (18): 1955, 1961/62, 1962/63, 1963/64, 1964/65, 1970/71, 1972/73, 1974/75, 1976/77, 1976/77, 1976/77, 1964/65, 1970/71, 1972/73, 1974/75, 1976/77, 1976/77, 1976/1964, 1989/90, 1991/92, 1999/2000, 2001/02, 2003/04, 2006/07.
  • Copa României (13): 1958/59, 1963/64, 1967/68, 1981/82, 1983/84, 1985/86, 1989/90, 1999/2000, 2000/02, 02/02 , 02/04 /05, 2011/12.
  • Cupa Ligii (1): 2016/17.
  • Supercopa României (2): 2005, 2012.

Xogadores

[editar | editar a fonte]

 

Nº Pos Nome
1 PO Romanía Ștefan Fara
15 CC Romanía Claudiu Stan
17 DF Romanía David Țone
20 CC Romanía Antonio Bordușanu
24 DF Romanía Deniz Giafer
28 CC Romanía Valentin Borcea
29 DI Romanía Cătălin Măgureanu
31 CC Romanía Cristian Ionescu
Nº Pos Nome
38 CC Romanía Andrei Bani
39 CC Romanía Dragoș Penescu
75 DF Romanía Costin Amzar
80 PO Romanía Denis Oncescu
81 DF Romanía Mario Pavel
82 CC Romanía Roberto Diniță
83 DF Romanía Andrei Mitran
98 CC Romanía Andreas Mihaiu

Estatísticas

[editar | editar a fonte]

Estatísticas na liga:

  • Partidos gañados de xeito consecutivo: 17 (12 de xuño de 1988 - 27 de novembro de 1988)
  • Mellor xeira invicto: 47 partidos (26 de maio de 1991 - 20 de setembro de 1992)
  • Xogador con máis partidos: Romanía Cornel Dinu (454)
  • Máximo goleador: Romanía Dudu Georgescu (207 goles)
  • Xogador con máis partidos internacionais: Romanía Claudiu Niculescu (43)
  • Máximo goleador en partidos internacionais: Romanía Claudiu Niculescu (18)

Estatísticas en competición europea:

Notas

[editar | editar a fonte]
  1. ↑ "European Competitions 1983-84". rsssf.com (en inglés). Consultado o 16 de xuño de 2022. 
  2. ↑ "Dinamo, nume blestemat! Decăderea unui brand din Europa de Est: retrogradări, uitare, dezamăgiri!" (en romanés). 13 de maio de 2020. Consultado o 16 de xuño de 2022. 
  3. ↑ "Editorial Cornel Dinu. Tristeți istorice de ziua lui Dinamo. Paralelă dureroasă cu statul Israel, fondat la aceeași dată, 14 mai 1948" (en romanés). 14 de maio de 2021. Consultado o 16 de xuño de 2022. 
  4. ↑ "Zbuciumatul început de an 1990" (en romanés). 24 de febreiro de 2021. Consultado o 16 de xuño de 2022. 
  5. ↑ ""I-am scris o scrisoare lui Florentino Perez!" Cornel Dinu, dezvaluiri despre super-parteneriatul dintre Dinamo si Real Madrid" (en romanés). 15 de abril de 2021. Consultado o 16 de xuño de 2022. 
  6. ↑ "Campionat 1955" (en romanés). 2009. Consultado o 16 de xuño de 2022. 
  7. ↑ "Dinamo 11-0 Crusaders". UEFA (en inglés). Consultado o 10 de xuño de 2022. 
  8. ↑ "16 de xuño de 2022" (en romanés). 3 de marzo de 2008. Arquivado dende o orixinal o 22 de outubro de 2009. Consultado o 16 de xuño de 2022. 
  9. ↑ "Dinamo Bucureşti, prima echipă din România care a ajuns în semifinalele Cupei Campionilor Europeni! Video" (en romanés). 13 de novembro de 2018. Consultado o 16 de xuño de 2022. 
  10. ↑ "Dinamo Bucureşti 1-2 Liverpool". UEFA (en inglés). Consultado o 16 de xuño de 2022. 
  11. ↑ "EXCLUSIV. E OFICIAL! Ionuţ Negoiţă este noul ACŢIONAR MAJORITAR de la DINAMO!" (en romanés). 14 de marzo de 2013. Arquivado dende o orixinal o 5 de xullo de 2013. Consultado o 16 de xuño de 2022. 
  12. ↑ "Dinamo a retrogradat după 74 de ani de istorie extraordinară! Ultimul meci în Liga 1, ultima reprezentație în ”Groapă”." (en romanés). 29 de maio de 2022. Consultado o 16 de xuño de 2022. 
  13. ↑ "Dinamovistii sarbatoresc 12 ani de la incendierea peluzei din Ghencea" (en romanés). 10 de maio de 2009. Consultado o 16 de xuño de 2022. 

Véxase tamén

[editar | editar a fonte]

Ligazóns externas

[editar | editar a fonte]
Traído desde «https://gl.wikipedia.org/w/index.php?title=FC_Dinamo_București&oldid=6195808»