Alianza Democrática (Suráfrica)

Alianza Democrática
Dirixentes e organización
Líder	Athol Trollip
Filiación internacional	Internacional Liberal Rede Liberal de África
Historia
Fundación	24 de xuño de 2000
Precedido por	Partido Demócrata
Posicións políticas
Ideoloxía	Liberalismo, Liberalismo económico
Posición política	Centro, con tendencias de centrodereita e centroesquerda
Representación
Consello Nacional das Provincias	20 / 90
Asemblea Nacional	84 / 400
Lexislaturas Provinciais	91 / 430
Parlamento Panafricano	1 / 5
Outros datos
Sede	2.° piso, Theba Hosken House, c/o Breda e Mill Street, Cidade do Cabo, Cabo Occidental
Na rede
https://da.org.za

A Alianza Democrática (DA en inglés, de Democratic Alliance, en afrikaans Demokratiese Alliansie) é un partido político surafricano e o principal partido da oposición, enfrontado ao partido gobernante Congreso Nacional Africano (ANC). De ideoloxía liberal fundado en 2000 a partir do Partido Demócrata, por entón o principal partido de oposición. Defínese simplemente como "liberal" e aínda que habitualmente se relaciona coa centrodereita, tamén ten inclinacións cara ao centro e á centroesquerda.

O partido foi creado no ano 2000 trala unión do Partido Democrático (DP), do Nuwe Nasionale Party (NNP) e da pequena Alianza Federal (FA). A unión aguantou até finais do ano 2001, cando o NNP e a FA deixaron o partido, gardando o DP o novo nome. O primeiro líder do partido foi Tony Leon, que foi substituído en maio de 2007 por Helen Zille, a alcaldesa de Cidade do Cabo e dende o 2009 a Xefe de Goberno da provincia do Cabo Occidental. No ano 2015 decidiu non volver a presentarse á reelección de líder do partido e foi substituída por Mmusi Maimane, a primeira vez que o partido foi dirixido por un líder negro.

É o principal partido da oposición no país, obtendo nas eleccións de 2014 un 22,23% dos votos (59,4% na Provincia do Cabo Occidental), tendo crecido un 5,57% fronte ás eleccións anteriores (16,7%). Alianza Democrática obtivo a maioría absoluta na Provincia Occidental do Cabo, sendo a única provincia gobernada pola oposición (desde 2009), así como é o partido máis votado e o partido gobernante na Cidade do Cabo desde 2006 (con resultados de máis do 60% dos votos tanto nas eleccións locais de 2016 como nas nacionais e provinciais de 2014).

Nas eleccións municipais de 2016, a DA obyivo o 27% dos votos (16% en 2006), gañando o goberno de 39 municipalidades, 17 con maioría absoluta (entre elas Cidade do Cabo onde obtivo o 61% dos votos e 154 dos 231 postos do Consello). Na Provincia do Cabo Occidental a DA obtivo máis do 60% do voto e gañou en 23 das 26 municipalidades (gobernando en 25 das 26), as outras 6 municipalidades gañounas nas provincias do Cabo Oriental (a grande metrópole de Port Elizabeth e o municipio de Kouga-Jeffreys Bay), en Gauteng (as metrópoles de Pretoria-Tshwane, Xohanesburgo e Erkurhuleni e os municipios de Midvaal-Meyerton e Mogale-Krugersdorp), no Estado Libre (Metsimaholo-Sasolburg), en Limpopo (Modimolle/Mookgopong e Thabazimbi) e en Cabo Norte (Hantam-Calvinia, Nama Khoi, Kgatelopele-Daniëlskuil e Ubuntu-Victoria West).

O partido incrementou os seus resultados electorais até as eleccións xerais de 2019 cando perdeu votos por primeira vez ficando nunha porcentaxe de votos do 20,7%. Na provincia do Cabo Occidental conseguiu o DA a maioría absoluta no 2009, sendo esta a única provincia de Suráfrica na que o ANC non goberna.

O seu actual líder é John Steenhuisen, quen exerce en calidade de interino desde outubro de 2019 tras a renuncia de Mmusi Maimane. Maimane fora o primeiro líder do partido de raza negra. Esta renovación interna permitiulle á Alianza Democrática obter triunfos electorais na elección municipal do 2016, no cal o partido obtivo os municipios de Xohanesburgo, Tshwane, que inclúe a capital, Pretoria, e Municipio Metropolitano de Nelson Mandela Bay, que inclúe Porto Elizabeth, ademais de reter o municipio de Cidade do Cabo onde ampliou a súa maioría absoluta.