Remuíño de sombras

Remuíño de sombras é unha novela de Xosé Neira Vilas, publicada en 1973 na Colección Pombal de Edicións Castrelos, cun prólogo de Basilio Losada ("Presentación innecesaria de Neira Vilas"). En 1991 foi reeditado pola Editorial Galaxia.

Remuíño de sombras
Autor/a	Xosé Neira Vilas
Orixe	Galicia
Lingua	galego
Xénero(s)	Narrativa
Editorial	Edicións Castrelos
Data de pub.	1973
[ editar datos en Wikidata ]

Trama

A acción discorre en Buenos Aires en 1960, no 150 aniversario da independencia da Arxentina. O libro ten unha estrutura fragmentaria, con múltiples personaxes, pero hai unha serie de fíos recorrentes: un rapaz que lle escribe cartas á familia contándolle a súa experiencia, un amigo que lle fala a outro da vida na rúa, pois está eivado e non pode saír, Dorinda, que traballa como criada cunha familia galega con cartos.

Faise referencia ao Centro Gallego de Buenos Aires é á Federación de Centros Galegos.

Narración

O título fai referencia á vida caótica das persoas na capital Arxentina. O remuíño (imaxe constante na obra do autor) é a aglomeración humana, que aparece como un enxame. É unha novela polifónica, que alterna a primeira persoa a segunda persoa e o narrador omnisciente. Inclúe tamén o xénero epistolar. Esta multiplicidade forma parte dun proceso de aprendizaxe como autor, buscando en cada caso a fórmula narrativa máis axeitada para cada caso.

O autor emigrou a Buenos Aires en 1949 para evitar o servizo militar. Alí entrou en contacto cos movementos sociais e culturais e coa comunidade galega. A relación entre Galicia e Buenos Aires é un dos eixos temáticos na literatura de Neira Vilas, xunto coa relación entre a infancia e o mundo dos adultos. Outras obras sobre o mundo da emigración desde o punto de vista adulto son Camiño bretemoso (1967) e Historias de emigrantes (1968).

Traducións

• Ao castelán por Nora Longhini Moreira co título de Remolino de sombras publicado en 1999.

Véxase tamén

Bibliografía

• Gómez, A.; Queixas, M. (2001). Historia xeral da literatura galega. A Nosa Terra. pp. 298–303. ISBN 84-95350-79-3. Arquivado dende o orixinal o 02/07/2017. Consultado o 16/12/2017. 

Ligazóns externas

• Ficha na páxina web de Editorial Galaxia.