Taldearen sorrera 1881eko azaroan kokatzen da Stanley Cricket Club of Byker izenarekin. 1882an Newcastle East End Football Club izena hartu zuen. 1882an bertan Newcastle West End F.C. sortu zen eta talde bien artean lehia gogorra sortu zen. 1889an East End profesionala bihurtu zen. Aldi berean West End taldeak diru arazo larriak zituenez desagertu egin zen eta bertako jokalariak East End-en sartu ziren eta St James' Park zelaia ere East End-en eskutan gelditu zen.
1892an Liga hasi zenean taldea bigarren mailan kokatua izan zen. 1899an igo zen lehen mailara eta berehala iritsi ziren emaitza onak, 1905, 1907 eta 1909ko Ligak irabazi baitzituen. 1905 eta 1906ko Kopatan ere finalera iritsi zen baina ezin izan zuen titulurik lortu. Lehenengo Kopa 1910 urtean irabazi zuen Barnsley FC garaitzean. 1911 urtean berriz ere finalean galtzaile atera ziren.
Titulu berria eskuratzeko hamarkada bat pasa itxaron behar izan zuen. 1924ean bere bosgarren Kopako finala jokatu zuen Aston Villaren aurka eta bigarren Kopa eskuratu zuen. Taldea maila onean zebilen eta 1926-27an laugarren Liga eskuratu zuen, orain arteko azkena. Talde honetako kapitaina eta goleatzaile nagusia Hughie Gallacher zen. Belaunaldi honen azken garaipena 1932ko Kopa izan zen.
Bigarren Mundu Gerraren garaian taldea apal ibili zen, lehen eta bigarren mailen artean. Jackie Milburn, Tommy Walker eta Bobby Cowell jokalariak ekarri zituzten eta 1948an Lehen mailara igo eta loraldi berria ezagutu zuen, hamarkada berrian 3 Kopa irabaziz.
1961 urtean berriz ere bigarren mailara jeitsi zen. Joe Harvey entrenatzailea fitxatu zuten eta honek taldea berriz ere goren mailara igo zuen 1965 urtean. Hurrengo urteetan Ligako goiko postuetan ibili zen eta 1968-69an Ferietako Kopa jokatzera iritsi zen, bai eta irabazi ere Hungariako Újpest taldea garaituz. 70. hamarkadan talde britainiarren artean jokatu izan zen Texaco Cup txapelketa irabazi zuen 1974 eta 1975ean.
Hainbat urte bigarren mailan egin ondoren, 1992an taldeko jokalari ohia zen Kevin Keegan entrenatzaile lanetarako fitxatu zuen Sir John Hall presidente berriak. Lehenengo urtean Premier Leaguera itzuli zen eta 1995-96 eta 1996-97 urteetan Ingalaterrako Ligako bigarren postua eskuratu zuen, bietan Manchester Uniteden atzetik. David Ginola, Les Ferdinand eta Alan Shearer izan ziren taldeko izarrak. Alan Shearer bera hiru aldiz jarraian izan zen Ligako goleatzaile nagusia. Keeganek 1997an taldea utzi eta Kenny Dalglishek ordezkatu zuen. Emaitzak ez ziren esperotakoak izan eta hurrego urteetan entrenatzaile aldaketa ugari izan zituen, baina sailkapenaren erdi ingurutik ez zen igo. 1999an Kopako finala jokatu eta galdu egin zuen.
Bobby Robson iritsi zen 1999-2000 sasoian. Taldeak gora egin zuen eta 2002ko laugarren postuak aukera eman zion Txapeldunen Ligan aritzeko. 2004 urtean Robsonek taldea utzi beharra izan zuen eta ordutik aurrera Newcastlek ez du beharrezko egonkortasuna aurkitu. Honen erakusle 2008-09 denboraldia bigarren mailan egin izana.
2012-13 denboralditik aurrera sailkapenaren behekaldean ibili izan zen eta 2016an maila galdu zuen. Hurrengo urtean ordea 2. mailako txapelketa irabazi eta Premier Leaguera itzuli zen.
2022-23 denboraldia bikaina egin zuen, Ligan laugarren eginez eta Ligako Kopako finala jokatuz.
Lee Charnley
Datuak: Q18716
Multimedia: Newcastle United FC / Q18716
