Eric Singer

C'l artìcul chè 'l è scrit in Miranduléś

Eric Doyle Mensinger, cgnusû méj c'n al nóm 'd art 'd Eric Singer (Cleveland, 12 ad Maǵ dal 1958) 'l è 'n baterìsta hard rock e heavy metal americàṅ. In dla sò caréra 'l à sunâ in 75 e pasa àlbum e in 11 EP.

Eric 'l à tacâ a sunàr in dla banda dla Lita Ford in dal 1984 par pò pasàr a i Black Sabbath, tulénd al pòst ad Bill Ward, e a i Badlands. In di an Nuànta 'l à laurâ cun Alice Cooper e c'n i Kiss dòp la mòrt 'd Eric Carr e 'l licensiamènt ad Peter Criss. Cun cal grup chè 'l à anc cantâ in dū pès, All for the Glory e in All for the Love of Rock & Roll.

Eric 'l à anc sunâ in di disc Calling the Wild dla Doro Pesch e Asshole ad Gene Simmons ólt'r a tōr part a 'l tour da par lò ad Paul Stanley dal 1989. Insém a 'l chitarìsta Bruce Kulick (èx di Kiss) e a 'l cantànt John Corabi (èx mémbar di Mötley Crüe) in dal 1998 'l à mis in pē un grup a sò nóm, i ESP (Eric Singer Project).