貓熊

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

貓熊一般號𡅏熊貓，也號𡅏大熊貓或者大貓熊，是蜀種野生其食肉動物。伊共熊、貓蜀樣都是屬食肉目其。雖然講野価科學家將伊分遘熊科下底去，固有儂見覺伊伓是熊其蜀種。

名字

1869年，法國傳教士Armand David頭回著中國其四川發現貓熊以後，將者動物其學名號做「Ursus melanoleucus」，意思是「烏色共白色其熊」。遘尾了法國國家自然歷史博物館其動物學家Alphonse Milne-Edwards研究David帶轉來其骨骨以後，見覺嚽是蜀種共小熊貓野像其動物，就起學名號𡅏「Ailuropoda melanoleuca」，意思是「像小熊貓其動物」。者名字遘今旦固著𡅏使。

外形

貓熊身體會做肥肥式，頭做圓圓式，尾尾做短短式，身體懸頂烏共白兩種顏色分野清楚，身體共尾尾是白其色，耳、目睭、骹手共肩頭都是烏其；腹老有其是棕色，有其是烏其色。

貓熊其身體一般由120遘180釐米許罔懸，尾尾差不多10遘20釐米許罔長，身體大概有60遘150公斤許罔重。一般來講雄性其會比雌性其大頭仂囝。

貓熊本底是生活著烏烏暗暗其竹林裏勢，故此目睭𣍐好使，不過伊著暝晡也共著日中其辰候蜀樣輪活。

分佈

貓熊會中當蜀種動物界其活化石，因為者動物其樣式共幾十萬年以前其無什乇區別。舊底著中國東部、南部遘緬甸都有，遘現在儷生活著四川部份地區了。伊主要著海拔2000遘3000米其竹林或者針箬林裏勢。

習慣共生態地位

熊貓著𡅏食竹

貓熊愛自家住，每蜀頭其貓熊都有自家活動其地方。除去發情其時期，伊都是自家住。野価儂固儷喊熊貓是主要食竹箬其蜀種動物。其實貓熊共其他熊蜀樣是雜食動物，現在其貓熊著食肉動物向食草動物過渡其時期。貓熊會拿竹鼠茲蜀類嫩嫩式動物，也會食動物其死屍，有其辰候固會去拿頭牲來食。貓熊其下頦共牙野有力，故此竹許罔硬其乇伊都咬會定動。但是伊消化植物纖維共養分其能力𣍐好，故此蜀日著食15遘20公斤其竹營養乍有遘。

貓熊其囝是花豹共豺犬其主要食物。

保護現狀

1936年1月，頭隻大貓熊乞儂下遘美國其舊金山去展覽，野価美國儂見覺伊野有味。茲頭貓熊遘尾了乞下去芝加哥，敆1938年著許塊死去。著伊死茲年，Brookfield動物園挈2500美元其代價買遘蜀頭貓熊。1972年美國總統理查·尼克森訪問中國其辰候，毛澤東將2頭貓熊送乞美國。許辰候𩚉蜀頭貓熊蜀年平均著挈260萬美元，儷是再加蜀頭貓熊其囝，就著超過300萬，嚽比其他瀕危其動物固𡅏使錢。

維基共享裡勢有共貓熊有干過其內容。

維基物種裡勢有共貓熊有干過其內容。