Mehdi Mustafayev

Mehdi Mustafayev
Azərbaycan SSR Dövlət Meşə Təsərrüfatı Komitəsinin sədri
23 iyun 1966 – 5 oktyabr 1979
Azərbaycan SSR kənd təsərrüfatı nazirinin müavini
may 1953 – dekabr 1959
Nazir	İlyas Abdullayev Həsən Seyidov Möhsün Poladov
Azərbaycan SSR meşə təsərrüfatı naziri
25 oktyabr 1948 – 26 mart 1953
Əvvəlki	Soltan Mirzəyev
Sonrakı	vəzifə ləğv edilib
Azərbaycan Kommunist Partiyası Tovuz Rayon Partiya Komitəsinin birinci katibi
1947 – 1948
Şəxsi məlumatlar
Doğum tarixi	15 sentyabr 1914(1914-09-15)
Doğum yeri	Tatlı, Qazax qəzası, Yelizavetpol quberniyası, Rusiya imperiyası
Vəfat tarixi	5 oktyabr 1979(1979-10-05) (65 yaşında)
Vəfat yeri	Bakı, Azərbaycan SSR, SSRİ
Dəfn yeri	II Fəxri Xiyaban
Partiya	Sovet İttifaqı Kommunist Partiyası (1940–1979)
Təhsili	Azərbaycan Kənd Təsərrüfatı İnstitutu (1931–1935)
Fəaliyyəti	aqronom
Uşağı	Məleykə Abbaszadə
Təltifləri

Mehdi Həsən oğlu Mustafayev (15 sentyabr 1914, Tatlı, Qazax qəzası – 5 oktyabr 1979, Bakı) — Azərbaycanda meşə mühafizəsi işinin təşkilatçısı və dövlət xadimi, Sosialist Əməyi Qəhrəmanı (1948).

Həyatı

Mehdi Həsən oğlu Mustafayev 1914-cü il sentyabr ayının 15-də Qazax (indiki Ağstafa) rayonunun Tatlı kəndində II Həsən ağanın ailəsində dünyaya gəlmişdir. Mehdi müəllimin tərcümeyi-halına nəzər salanda məlum olur ki, onun ulu babası Həsən bəy, babası isə Kərbəlayı Mustafa ağa olmuşdur. Valideynlərini erkən itirdiyindən hələ gənc yaşlarından zəhmətə qatlaşmalı olur. O, Tatlı kənd orta məktəbinin birinci pilləsini bitirdikdən sonra 1929-cu ildə Gəncə şəhərinə gəlmiş və Azərbaycan Kənd Təsərrüfatı İnstitutunun nəzdində hazırlıq kursunda təhsil alır.

1931-ci ildə yenicə Bakıdan Gəncəyə köçürülmüş Azərbaycan Kənd Təsərrüfatı İnstitutunda Bitkiçilik fakültəsinin üzümçülük-şərabçılıq şöbəsinə qəbul olunur. Universitetin arxivində saxlanılan şəxsi işində Mehdi Mustafayevə məxsus diplomun surəti və institut direktorunun tədris hissəsi üzrə müavini İmran Kaşıyevin imzaladığı 20 fevral 1936-cı il tarixli 508 nömrəli arayışda göstərilir ki, Mustafayev Mehdi Həsən oğlu 1935-ci il noyabrın 21-də Azərbaycan Kənd Təsərrüfatı İnstitutunun üzümçülük və şərabçılıq şöbəsini tam bitirmiş, "Vakuum aparatlarında üzüm şirəsinin qatılaşdırılması" mövzusunda diplom işini müdafiə etmiş, Dövlət Kvalifikasiya Komissiyasının qərarına əsasən AKTİ-nin 9 dekabr 1935-ci il tarixli 265 nömrəli əmrilə ona aqronom-üzümçü-şərabçı ixtisası verilmişdir.

Mehdi Mustafayev institutu bitirdikdən sonra 1936–1942-ci illərdə gənc mütəxəssis kimi Şamaxı rayonunun torpaq şöbəsində aqronom, şöbə müdiri vəzifələrində çalışır. Sonralar Samux rayonundakı (keçmiş Səfərəliyev) 2 nömrəli sovxoza direktor təyin olunur.

Böyük Vətən müharibəsi başlananda Mehdi müəllim dövlət tərəfindən İrana göndərilir. Oradan qayıdandan sonra Azərbaycan Kommunist Partiyasının Mərkəzi Komitəsində bir sıra məsul işlərdə, xeyli müddət kənd təsərrüfatı şöbəsi müdirinin müavini vəzifəsində çalışır.

Mehdi Mustafayev sonralar Tovuz Rayon Partiya Komitəsinin birinci katibi seçilmişdir. 1953–1959-cu illərdə o, Azərbaycan SSR kənd təsərrüfatı nazirinin müavini, 1959-cu ildən ömrünün sonunadək (1979-cu il) Nazirlər Sovetinin Dövlət Meşə Təsərrüfatı Komitəsinin sədri vəzifələrində işləmişdir.

"Lenin", "Qırmızı əmək bayrağı", 2 dəfə "Şərəf nişanı" ordenləri və bir çox medallarla təltif edilmiş, 1948-ci ildə SSRİ Ali Soveti Rəyasət Heyətinin fərmanı ilə Sosialist Əməyi Qəhrəmanı fəxri adına layiq görülmüş, bir neçə çağırış respublika Ali Sovetinin deputatı olmuşdur. 1964 və 1974-cü illərdə Azərbaycan SSR Ali Soveti Rəyasət Heyətinin fəxri fərmanları ilə təltif olunmuşdur.

Xatirəsi

Ağstafa şəhərində Mehdi Mustafayevin adını daşıyan parkda dövlət xadiminin büstü vardır.

Mənbə

• Əsrarəngiz yaşıllıqlar vurğunu İbrahim CƏFƏROV, ADAU-nun rektoru, professor
• Zülqədər eli (kitab) Ənvər Çingizoğlu, Nərminə Məmmədova
• Mehdi Mustafayev-100 Arxivləşdirilib 2016-03-05 at the Wayback Machine Əlləz Vəliyev (Ormeşənli)
• Mehdi Mustafayevin 100 illik yubileyi qeyd olundu