Visigodos

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Las migracions d'os visigodos dende Dacia dica Hispania.

Los visigodos estioron un pueblo chermanico. Son la branca occidental d'os godos y ocupaban antes d'a invasión hunna un territorio que correspondeba d'alto u baixo a l'antiga Dacia. En os tiempos d'as primeras invasions de l'Imperio Romano los visigodos emigroron ta Europa Occidental, a on que facioron liga con l'Imperio Romano d'Occident contra atros pueblos chermanicos invasors y contra los hunnos. Los visigodos aduyoron a los romanos a forachitar a los vandalos y alanos d'Hispania y a vencer a Atila en a batalla d'os Campos Catalaunicos. Los visigodos formoron un primer estau en o sud d'a Galia con capital en Tolosa y dimpués en fuoron forachitaus ta Hispania y formoron un estau visigodo con capital en Toledo que duró dica la invasión musulmana. Dimpués d'a invasión musulmana bel visigodo podió conseguir alianzas u pactos con los musulmans y controlar d'esta traza localment los suyos territorios, como estió lo caso d'o conte Casio, lo fundador d'a dinastía Banu Qasi. Con lo tiempo s'asimiloron a la clase dirichent musulmana u emigroron enta la Gallaecia u Cantabria. Los visigodos estioron arrians mes tiempo que atros pueblos chermanicos.

Los visigodos en Dacia

Los godos yeran orichinarios d'o sud d'Escandinavia, tierra que encara se diz Gotland. Dende lo suyo puesto d'orichen emigroron ta Europa centro-oriental arribando en as costas d'a Mar Negra, ocupabando una ampla zona que d'antes estió d'os sarmatas y dacos. En ixos amplos territorios los godos y los pueblos sozmesos desembolicoron lo que los arqueologos denominan la Cultura de Czerniachow, una cultura que teneba contacto con l'Imperio Romano. Los godos presionaban a los romanos en a Dacia romana, y encara que l'emperador Aurelián derrotó a los godos en l'anyo 271, prenió a decisión d'abandonar esta provincia, feito que se fació entre los anyos 271 y 272. Los godos podioron ocupar ya tota Dacia. Encara ye polemico si a mayoría d'os daco-romanos fuoron evacuaus u a mayoría se i quedoron.

D'esta traza en o extenso territorio gobernau por los godos s'encomenzó a parlar de godos de l'este (ostrogodos) y godos de l'ueste (visigodos), d'alto u baixo con o río Dniéster como deseparación. Entre los restos arqueolochicos atribuitos a los visigodos en o periodo que vivioron a lo norte d'o Danubio en Dacia tenemos o "Trasoro de Pietroasele", trobau en Pietroasele (Buzău) en l'anyo 1837 y atribuito a lo rei Athanarico. N'este periodo los visigodos se convirtioron a lo cristianismo en a suya modalidat arriana. Lo bispe Ulfilas tradució la Biblia a lo idioma gotico.

La presión goda en Dacia empentó ta Panonia a los carpos (dacos que feban parte d'os dacos libres que podrían haber orichinau sieglos dimpués a los albaneses).

Los ostrogodos y visigodos fuoron derrotaus por los hunnos. Mientres que la mayor part d'os ostrogodos prenioron a decisión de sozmeter-sen a los hunnos, los visigodos y part d'os ostrogodos prefirioron travesar lo Danubio y emigrar ta l'Imperio Romano d'Orient.

Penetración d'os visigodos en l'Imperio Romano

Los visigodos permaneixioron en Dacia dica l'anyo 376, cuan Fritigern demandó a l'emperador Valent que permitise a los visigodos d'asentar-sen en a ribera sud d'o Danubio. Los visigodos s'asentoron en a diocesi de Tracia, principalment en Moesia. Manimenos las condicions no yeran las que los visigodos esperaban y se rebeloron. Los romanos fuoron derrotaus en l'anyo 378 en a batalla d'Andrianoplin, a on o mesmo emperador Valent murió.

En l'anyo 382 Teodosio I lis torna a conceder o dreito d'establir-sen en Tracia y Moesia. Alarico I prene o títol de rei y encomienza unatra migración, esta vegada ta lo Epiro saqueyando territorios d'os Balcans y lo Peloponiso, (Macedonya, Tracia, Focida y Beocia y las ciudaz de Corinto, Esparta, Argos y Megara). A la fin Alarico I ye nombrau Magister Militum d'Iliria, pero dende Iliria los visigodos emigrarán ta Italia, a on que rematarán saqueyando Roma en l'anyo 410.

Dimpués d'o saqueyo de Roma emigran a lo sud d'Italia adrezando-se enta Africa pero lo rei Alarico I muere en Cosenza, y lo suyo sucesor Ataulfo adreza a lo suyo pueblo de nuevo a lo norte d'Italia, pasando a la Provenza y arribando en Barcelona en l'anyo 415. En l'anyo 416 firman un foedus con Roma en o que se compromenten a pacificar Hispania.

Los visigodos como aliaus d'os romanos en Galia (418-476)

Los romanos los ninvían ta Hispania pa reconquerir-la. En Hispania empentan a los sueus enta la Gallaecia, los vandalos son en gran mesura destruitos, y los alanos tamien son vencius. En compensación los romanos lis conceden Aquitania en l'anyo 417, en pagas que lo suyo exercito se comprometa a defender a l'imperio d'atros invasors y que lo rei visigodo gobierne como lugartenient imperial. Lo foedus de l'anyo 418 permite que los visigodos s'estableixcan en rechimen d' hospitalitas en Aquitania II, en a Novempopulania y en Narbonés I, que comprendeba Burdeus, Piteus y Tolosa, que se convertió en la suya capital. Se suposa que en ixos territorios s'establioron bels 100.000 visigodos, numero que creixió en tot o sieglo V dica os 200.000 con a plegada d'atros continchents chermanicos asimilables (como los ostrogodos). En Aquitania los visigodos reciben dos tercios d'a tierra en calidat de biens radices libres d'impuestos (las ditas sortes goticas)

Cuan la invasión hunna de Galia de l'anyo 451 los visigodos contribuyen a la victoria d'o cheneral Aecio en a batalla d'os Campos Catalaunicos. Diz que cuasi estió una batalla entre visigodos de part d'os romanos y ostrogodos de part d'os hunnos. En a "Cronica de los Conquiridors" de Chuan Ferrández d'Heredia fan referencia a los visigodos federaus y establius en Tolosa en o capítol dedicau a Atila.

Et finalment Ecio patricio con los Godos et con las otras ayudas como victoriosos echaron al rey Atilla et a su hermano, asi sobrados et vencidos, delas Gallias, el persiguiendo los fueron forçados de retornar en Germania, et apres poco tiempo Atilla mato a su hermano Blenda. Et seyendo Turismundo mucho alegre porque la batalla era vencida, dixo a Ecio patricio que que le parecie que fiziessen ; et el temiendo que los Godos tornassen contra ellos, consello que se tornassen a lures ciudades et que recrearien alli ; et assin lo fizieron ; et como Theundedo fues muerto en la batalla, fue leuantado rey delos Videgodos el dicho Turismundo fillo suyo, et regno vn anyo; el qual ya sea fuesse muyt fuert et tuviesse muchas gentes et buenas, en todo su tiempo no huuo batalla ; et fusse a Tholosa et fizo soterrar los suyos muertos. Et Yonio, bispe de Agustodiuo, et apres fizo entre los suyos. Et enel anyo segundo que començaua a regnar, por consello de sus hermanos fue muerto a traycion; mas ante que muries, conociendo lur maldat, mato el algunos de aquellos que le auien tractado la muert.

Lo Reino Visigodo de Tolosa (476-507)

Ta más detalles, veyer l'articlo Reino Visigodo de Tolosaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A muerte d'o zaguer emperador romano fa que lo rei Eurico se sienta independient se pueda chustificar como hereu de l'Imperio Romano. Encomienza una expansión territorial, y los visigodos conquieren gran part d'Hispania.

Reconstruccion aproximada y desacherada d'o Reino Visigodo de Tolosa.

Dimpués que los visigodos saqueyasen la Lusitanica, Eurico decidió adhibir a lo suyo reino a provincia Tarraconense y ninvió a lo conte Gauterico, qui dende Burdeus siguió la calzada romana y entró en Hispania por o puerto de Roncesvals. Dimpués prenió Pompaleo y baixó por a val d'Ebro y prenió Caesaraugusta. Dende ixe inte los hispanorromanos d'a val d'Ebro serán dominaus por una clase dirichent guerrera visigoda que durará dica la invasión musulmana.

En l'anyo 507 lo rei franco Clodoveu I se converte a lo catolicismo y con l'aduya d'os galo-romanos y los bretons esclafa a los visigodos y los forachita a lo sud d'os Pirineus (encara que conserven Septimania).

Lo Reino Visigodo de Toledo (507-711)

Ta más detalles, veyer l'articlo Reino Visigodo de Toledoveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A mayor part d'os visigodos s'estableixen en a Meseta. La mayor densidat de visigodos yera en l'actual provincia de Segovia. Toledo ye a capital d'os visigodos dende l'anyo 554. En o futuro los visigodos prebarán d'ocupar tota la peninsula iberica. Los visigodos se converten en una clase dirichent militar que evita mezclar-se con los hispanorromanos. Los visigodos en Hispania se comportan como cristianos integristas y persiguen las manifestacions de relichiosidat popular, que se remontan a la relichión romana y los elementos prerromanos que asimiló. Lo rei se refirma en a Ilesia, convoca concilios y regula a vida relichiosa d'o reino.

En l'anyo 586 sozmeten a los suevos de Gallaecia. A zaguers d'o sieglo VI ya bi ha reis catolicos que obligan a lo resto d'os visigodos a convertir-se a lo catolicismo deixando l'arrianismo.

Se considera que con Suintila (621-631), qui venció a los bizantins y ocupó as ciudaz-estau hispanorromanos d'o sud, s'unificó politicament a peninsula. En o sieglo VII s'introduce un dreito unico pa unificar l'aristocracia guerrera visigoda con l'aristocracia hispanorromana. D'astí enta debant l'idioma gotico encomienza a desapareixer.

Los visigodos dimpués d'a invasión musulmana

Bi habió visigodos que plegoron a alcuerdes con los musulmans como Teodomiro, que gobernó o sudeste (la Cora de Todmir) u en a redolada de Tudela, sud de Navarra y sud de Cinco Villas en Aragón lo conte Casio, qui estió fundador d'os Banu Qasi.

Los visigodos en fuents aragonesas y navarras

Los visigodos representaban pa la visión historica los hispanos d'a Edat Meya una triple lechitimidat: politica (presuntos hereus d'os romanos), relichiosa (los concilios visigodos, la fitación de Wamba, etc...) y territorial (antigos sobirans de tota la peninsula). Manimenos en a Corona d'Aragón y Navarra la clase dirichent no se consideraba heredera d'os visigodos en a mesma mesura que en o reino d'Asturias, reino de Leyón u reino de Castiella, a on que plegaban a imitar las institucions visigodas u tener a lechislación visigoda como bella cosa mes present. En a Corona d'Aragón y Navarra teneban tamién como referents historicos los territorios ultrapirinencos y l'antiguedat clasica (como contrimuestra a figura de Chuan Ferrández d'Heredia).

Se fa mención d'os visigodos en o "Liber Regum", en a "Cronica de Sant Chuan d'a Penya" y en a obra de Chuan Ferrández d'Heredia, por eixemplo en a "Cronica de los Conquiridors"

En o "Liber Regum" lis dicen simplament godos:

Estos godos foron de lignage de Gog e Magog e foron paganos. E mouieronse doltras flum de Danubium e passoron mar e uinieron gastando por tierra de Roma. Et era apostoli en Roma el Papa Aldebrando. Et uinieron estos godos en España & estidieron hi CCC.LXXX.III annos, e muitos dellos tornoronse a la fe de Xps.

Al tiempo que los godos passoron mar estonz se mouie Mahomath de Meca e fo predicant en Arabia e conuertie grant gent en so lei. Era dc.LX.II.

Del dia que Xps priso passion tro al dia que Mahomat se mouie de Meca ouo DC menos VIII annos. E Mahomath auia a la ora XL.ª annos.

Quando foron los godos entrados en España leuantaron rei de lor lignage, et est rei ouo nomne el rei Cindus, e fo xiano, e quando murie el rei Cindus non lexo fillo nenguno e rremaso la tierra sines rei, e non s acordoron las hientes de la tierra por auer rei e guerrioron se todos unos con otros grandes tiempos, e pues accordoronse e fizieron rei por elección al rei Bamba, e fo muit buen rei. Era DCC.X.

Est rei Bamba establie los arcebispados e los bispados de España dond ad ond fossen. Regno el rei Bamba XII annos, e pues empozonolo Eurigius, el nieto del rei Cindus, qui era godo, e murie assi e soterroronlo en Bragana.

[Fol. 32 V.] Quando fo muerto el rei Bamba regno Egica, so fillo de Eurigius, daquest qui auia empozonado al rei Bamba, et no regno mas de dos annos.

Murie Egica, e rregno el rei Vatizanus, qui fo del lignage de los godos.

Murie Vatizanus, e rregno el rei Rodrigo en toda España, e fo buen rei e conquirie muito. E pues, por el consello de los fillos de Vatizanus e de so nieto del rei Rodrigo el comte don Iulian, entroron los moros en España. Era DCC.LII.

A la sazón que regnaua el rei Rodrigo en Espanna uinieron d Affrica el rei Aboali & Abogubra. Et era rei en Marruecos el rei Amiramozlemin, & estonz uino Taric en España & arribo a Gibaltaric. Est rei Abocubra & Aboali & Amiramozlemin, con otros Reies muitos e con grandes poderes de moros uinieron al rei Rodrigo a la batalla & lidioron con el en el campo de Sagnera. En la primera fazienda foron mal treitos los moros. Mas pues cobroron & foron rancados los xianos. En aquella batalla fo perdido el rei Rodrigo, e no lo troboron ni muerto ni biuo. Mas pues, a luengos tiempos, en Uiseu, en Portogal, troboron un sepulcre que dizian las letras qui desuso eran escritas que alli iazia el rei Rodrigo, el qui fo perdido en la batalla en el tiempo de los godos.

En a "Cronica de Sant Chuan d'a Penya" parlan en cheneral de godos en o capítol III sin especificar, de fueras d'a primera linia, a on que enumeran cualques pueblos chermanicos distinguindo entre visigodos y ostrogodos:

En aquesta isla de Estancia habitaban aquestas naciones; godos, vesegodos, estargodos, dauirugis, arcas et tanib. De las quales naciones nos callaremos, sino tan solamente de los godos, porque aquestos fueron los que tollieron Espanya a los romanos, que senoryaron los griegos et a la nacion que Ercules y auia lexado.

Et depues de aquesti Valient; et en tiempo de aquesti los godos tenyan lur senorya mayor en Tolosa. Et aquesti rey prendió las tierras de Bética et de Galicia, las quales tenían los vándalos et los alanos; et depues de aquesti Goodorenus; et depues su filio Turison; et depues su hermano Trodoricho. Et depues de aquesti regnó su hermano Euricho. Et aquesti prese en España la prouincia de Tarragona, et depues de aquesti regnó su fillo Alarico; et depues de aquesti regnó su nieto Teodio; et depues de aquesti Teodiselo; et depues de la muert de aquesti, regnó Agila, et depues Athanagildo; et depues de aquesti Luynba; et depues su hermano Leouegildo; et aquesti exampló et crexió su reyno en Spanya; et aqueste fué el primero rey que se posó a taula todo solo, et se vistió de vestiduras reales, porque enantes todos los reyes se posauan en lur taula con caualleros et hauían ansi vestidos como caualleros. Et depues de la muert de aquesti, regnó su fillo Ragaredo el qual fué católico rey et gitó toda la error arriana de su Regno, et fizo cabo de su tierra la ciudat de Toledo. Et depues regnó su fillo Liuba; et depues de la muert de aquesti, regnó Gondemarus; et depues de aquesti Sisabuch. Et aquesti rey fiço vaciar por fuerça los judios. Et en tiempo de aquesti començó a predicar Mahomat la suya maluada secta en la tierra de Mecha, et en otras tierras de allende el mar, que agora son de moros. Et depues de aquesti regnó su fillo Recaredo et murió moço de muy poca edat. Et depues de la muerte de aquesti regnó Suincilla, fillo del rey Recaredo primero.

Et aquesti tollió las tierras todas et ciudades, et lugares que los romanos senyoriauan en Espanya. Et aquesti fué senyor de toda Espanya sin ningun: (sic). Et depues de la muert de aquesti regnó su fillo Raximiro. Et depues Sisenando su hermano; et depues de la muert de aquesti regnó Ensencilla; et depues Engulga; et depues de la muert de aquesti regnó Sinda Zundo, et depues de aquesti Recesundo; et depues de la muert de aquesti regnó el rey Bamba, el qual fué muy cathólico rey et virtuoso et batallero mui marauilloso, é exampló é creció muyto el su Regno. Et depues de aquesti, regnó el rey Eruigio, et depues de aquesti regnó Flauio Egica; et depues regnó Euzica, el qual fué rey muy cruel; et aquesti rey mandó que todos los clérigos et vispos de su tierra prendiessen et tuuiesen drudas, et aquesti fiso enderrocar todas las fuerças de las ciudades et lugares de su Regno por tal que las sus gentes no pudiessen rebellar contra éll. Et depues de aquesti, regnó Rodrigo el qual perdió su tierra en la forma siguient: Es a saber, como el compte Julian, sosmeso del dito rey Rodrigo, fues ydo por mesagería al rey Aboali, moro, por afferes del dito Rey, et el dito Rey huuo affer con la muller, segunt algunos dizen, ó, con la filla del dito Compte, et estando en seruicio del dito Rey; porque el dito Compte tornado de la mesagería et sabiendo la maleztat que su senyor le hauía feita, tractó que su senyor perdiesse su Regno. Et ansi se fizo; que en el año de nuestro Senyor DCC.XIII. XI dias de noviembre, en el tercero año del regimiento del dito rey Rodrigo, por tratamiento del dito compte Julian vino en Espanya el rey Abohali, ensemble con los reyes de Aboçubra, de Marruecos, de Ezarich et con otros reyes de moros por numero XXV; et las oras fué vencido el dito rey Rodrigo por los moros, et toda Espanya prendida entro Azlet de Prouença, dentro XIIII. meses; segunt que las coronicas dizen mas largament, las de Castiella, en otro volupne de liuro et la batalla y mete.

Bibliografía

• (es) José-Ramón Julià et al.: Alas de historia universal. Tomo I De los orígenes a las crisis del siglo XVII. Editorial Planeta.
• (es) Hermann Kinder y Werner Hilgemann: Atlas histórico mundial. Ediciones Itsmo.
• (es) Francisco Beltrán Lloris: Los germanos. Historias del Viejo Mundo, num. 15. Historia 16.
• (es) María Victoria Escribano Paño: Los godos en Aragón. CAI 100.

• Datos: Q23693
• Multimedia: Visigoths / Q23693