Basilica
Una basilica (d'o latín basilica, derivau d'o griego antigo βασιλική, basiliké, con o significau de reyal, elipsi de (basiliké oikía u casa reyal) yera en a Grecia antiga y dimpués en a Roma antiga un edificio de caracter publico d'aspecto sumptuoso y que teneba como función la d'estar un tribunal. En l'antiga Roma ixe edificio se trobaba en un lugar preferent en a trama urbana, en o mesmo foro d'a ciudat.
Cuan o cristianismo s'estendilló a traviés de l'Imperio Romano y se convertió en a relichión oficial de l'imperio, s'emplegó la planta d'istos edificios, a planta basilical, ta construyir as primeras ilesias, y a sobén lo mesmo edificio d'a basilica romana s'aproveitaba ta adedicar-lo a lo nuevo culto relichioso.
A basilica romana
[editar | modificar o codigo]En Roma, la basilica yera un gran espacio rectangular con una u mas naus (que siempre yeran en numero impar); si poseyeba mas d'una nau, a nau central yera mas ampla y de mayor altaria que las naus laterals y deseparada d'ellas por columnas, que amás teneban a función de soportar o peso. S'aproveitaba la diferencia d'altaria ta ubrir en l'alto d'os dos cantos d'a nau central uns vuedos ta ventilación y iluminación de l'interior de l'edificio. D'atra man, en a cabecera de l'edificio se i debantaba una exedra u un abside que teneba como función la d'instalar-ie la presidencia de l'acto que se i celebrase; la dentrada a l'edificio se feba por o piet d'o mesmo, frent a la presidencia, estando cubierta ixa dentrada por un portico.
Encara que la función prencipal d'as basilicas romanas yera la de l'administración de Chusticia a traviés de tribunals, tamién se i celebraban atros tipos d'actos u actividaz: comercio, culto relichioso, u tamién simplas reunions de ciudadans con cualsiquier finalidat.
Basilicas en o Foro Romano
[editar | modificar o codigo]O Foro Romano yera lo centro d'as actividaz en l'Antiga Roma y en l'Imperio Romano y se i debantoron succesivament cuantas basilicas:
- Basilica Porcia: debantada a iniciativa de Marco Porcio Catón en 184 aC.
- Basilica Emilia: debantada en 179 aC por Marco Emilio Lepido.
- Basilica Opimia: construyida en 169 aC por o cónsul Opimio.
- Basilica Sempronia: edificada por o cónsul Tiberio Sempronio Graco.
- Basilica Chulia: la mandó construyir en 54 aC Augusto sobre l'antiga basilica Sempronia.
- Basilica de Maxencio: debantada a iniciativa d'o emperador Maxencio en primerías d'os anyos 300 y rematada por Constantín I dimpués de 313.
Vinclos externos
[editar | modificar o codigo]
Se veigan as imáchens de Commons sobre as basilicas.- Se veigan as imáchens de Commons sobre as basilicas.
- Se veigan as imáchens de Commons sobre as basilicas griegas y romanas.
- Se veigan as imáchens de Commons sobre as basilicas cristianas.
