William Hodges

Dr William Hodges (* 28. Oktober 1744 z London; † 6. Juni 1797 z Brixham, Devon) isch en änglische Mooler gsi.

E Gmäld vom Hodges mit dr *Resolution* und dr *Adventure* in dr Matavai Bucht, Tahiti

Dr Hodges het dr James Cook an Bord vo dr Resolution uf sinere zwäite Südsee-Räis begläitet, u. a. uf Tahiti, d Tonga–Insle, Nöiseeland, dr Osterinsle und in d Antarktis.

Lääbe

Dr Hodges isch dr äinzig Soon vom ene Schmiid gsi. Er het bim William Shipley und spööter bim Richard Wilson moole gleert. Er isch Theatermooler z Derby gsi und isch denn dur sini Landschaftsmoolerei bekannt worde und wäge däm für die zwäiti groossi Expedizion vom James Cook (1772–1775) uuseglääse worde. Er het underwägs vor allem Landschaftsskizze gmacht, aber au e baar Bordret. Er het aber die historischi und ethnischi Gnauikäit in sine Bilder immer wider sinere künstlerische Uffassig gopferet.

Zrugg in Ängland het dr Hodges ghürootet, bald druf si Frau verloore und isch denn 1779 as erste brofessionelle Mooler uf Indie gange und isch dört säggs Joor lang bliibe. Denn isch er uf em öiropäische Kontinänt umegräist. Au si zwäiti Frau isch bald noch dr Hochzit gstorbe, und si dritti Frau, won er 1785 ghürootet het, het si Dood 1797 nume e baar Möönet überläbt. Zwüsche 1786 und 1794 het er as Mitgliid vo dr Royal Academy immer wider sini Bilder usgstellt.

Am Ändi vo de 1790er Joor het er sis ganze Vermööge im Bankrott von ere Bank in Dartmouth verloore. Dr Hodges isch am 6. Merz 1797 gstorbe, mä vermuetet an ere Überdosis vo Laudanum.

Weblingg

Commons: William Hodges – Sammlig vo Multimediadateie

Dä Artikel basiert uff ere fräie Übersetzig vum Artikel „William_Hodges“ vu de dütsche Wikipedia. E Liste vu de Autore un Versione isch do z finde.