Die buddhistischi Ziträchnig

Die thailändischi Version vom buddhistische Lunisolarkaländer

Die Buddhistischi Ziträchnig (au: Buddhist Era / B.E.) wird vor allem in de Länder vom „südlige Buddhismus“ (Sri Lanka, Myanmar, Thailand etc.) verwändet und foot mit em Doodesjoor vom Siddhartha Gautama (544 v. d. Z.) aa.

Die buddhistischi Ziträchnig verwändet e Lunisolarkaländer, wo d Möönet Mondmöönet si, s Joor aber e Sunnejoor. E Joor het im allgemäine zwölf Möönet und wil d Möönet abwäggselnd nüünäzwanzig und drissig Dääg lang si, het s im e normale Mondjoor 354 Dääg. Zum d Mondjoor de Sunnejoor aazbasse, wärde im e Züklus vo 57 Joor elf zuesätzligi Dääg iigschaltet und im e Züklus vo nüünzää Joor siibe zuesätzligi Möönet vo drissig Dääg. Eso häi 57 Joor im buddhistische wie im gregorianische Kaländer 20819 Dääg.

S Joor 2015 vom gregorianische Kaländer isch in dr buddhistische Ziträchnig s Joor 2559, wenn mä 544 v. d. Z. as s Joor 1 B.E. aagluegt wird. In de Publikazione von e baar usserasiatische buddhistische Gmäinschafte (bsundrigs z Australie, Öiropa und de USA) het s doorum hüfig zwäi Jooresaagoobe. D Ziträchnig, wo in Thailand üüblig isch, setzt allerdings s Joor vom Parinirvana vom Buddha as Joor 0, und doorum isch s Joor 2015 in dr alternative buddhistische Ziträchnig (Thailand, Laos) s Joor 2558 B.E.

D Abchürzig B.B.E. (Before Buddhist Era) wird verwändet, zum Joor vor dr Buddhistische Ziträchnig aazgee (z. B. d Geburt vom Siddhartha Gautama 80 B.B.E).

Wil s in buddhistische Länder seer underschidligi Vorstellige über s „Nöijoor“ git, cha e Joor vo dr buddhistische Ziträchnig am 1. Januar, mit em erste Früeligsnöimond (Tet-Fest, Chinesischs Nöijoor), mit em vierte Vollmond vom Mondjoor (Vesakh), oder eme andere Daag aafoo.

Sit de 2500-Joor-Fiire zum Buddha Jayanti Year im Joor 1956 het sich aber uf dr ganze Wälr die buddhistischi Ziträchnig mit eme Jooresaafang am 1. Januar afo duuresetze.

Weblingg

• Ziträchnige z Thailand bzw. Asie
• Notize vom Georg Krauskopf über s Datiere in 'Die Heilslehre des Buddha'.
• Buddhism in Thailand (änglisch)

Fuessnoote

Dä Artikel basiert uff ere fräie Übersetzig vum Artikel „Buddhistische_Zeitrechnung“ vu de dütsche Wikipedia. E Liste vu de Autore un Versione isch do z finde.