Lutz Fischer
De Lutz Fischer-Lamprecht (* 1. Novämber 1967 z Karlsrueh, heimatberechtigt z Wettige) isch en reformierte Schwiizer Pfarrer, Politiker (EVP) und Mundart-Autor. Er isch Mitglid vom Grosse Rot vom Kanton Aargau, Präsident vo de reformierte Synode und betriibd sit em September 2015 zämme mit em Fabian Schmid es Mundartnochrichteportal für Wettige. Er isch ghürate un het 5 Chind. De Axel Fischer isch sin ältere Brüeder.
Biografii
Usbildig
De Lutz Fischer isch 1967 z Karlsrueh uf d Wält cho u z Schdudesee ufgwachse. Dert het er au d Schuel bsuecht un 1987 mit em Abitur am Thomas-Mann-Gymnasium abgschlosse. Sin Wehrdienscht het er z Philippsburg bim Raketeartelleriibatalion 122 abgleischtet. Theologii het er z Neuendettelsau, z Marburg un z Münche studiirt. I de Johr 1995 bis 1997 het er sis Vikariat z Sandhuuse i de Nöchi vo Heidelbärg absolviert. Im Aaschluss do dra het er im Ussedienscht gschaffet, wo er Versicherige verchauft het un gliichzitig en Usbildig zum Versicherigsfachmaa abgschlosse het. Zudem het er betribswirtschaftlichi Usbildig (CAS für Nichtbetriebwirtschaftler vo de FHNW).
Pfarramt
Im Johr 1998 isch er mit sinere Familie i d Schwiiz cho, wo er sini erschti Pfarrstell z Rächthaute im Kanton Fryburg gha het. D Fryburger Chile het ihn im Juli 2000 z Murte ordiniirt. Vom Kanton Fryburg isch er im Auguscht 2002 i de Aargau cho. Bis im März 2008 isch er z Birmischtorf Pfarrer gsi, wo zu de Chilegmeind Birmischtorf-Gäbischtorf-Turgi ghört. Sit em April 2008 isch er reformierte Pfarrer in de Chilegmeind Wettige-Noiehof.
Landeschile
Vo Mai 2007 bis Endi Juni 2013 isch de Lutz Fischer-Lamprecht zämme mim Dominique Baumann und ab Oktober 2012 zämme mit em Ruedi Gebhard Co-Präsident vom Aargauische Pfarrkapitel gsi. Im Auguscht 2009 isch er Präsident vo de neugründete Synodefraktion vo de Fraktionslose worde[1] und isch in de Amtsperiode 2015–2018 Vizepräsident vo de Fraktion gsi. Vom Novämber 2011 bis zum Dezember 2018 isch er Mitgliid vo de Gschäftsprüefigskommission (GPK) vo de Synode gsi, sit em Jänner 2015 zudem Vizepräsident vo de GPK.[2] In de Amtsperiode 2019–22 isch er Vizepräsident vo de Synode gsi[3] und in de Amtsperiode 2023-2026 isch er de Präsident von de Synode[4]
Politik und Mandat
In sinere Wohn– und Heimatgmeind Wettige isch de Lutz Fischer-Lamprecht vom Januar 2014 bis Endi März 2016 in de Iibürgerigskommission gsi und isch sit em 17. März 2016 Mitgliid vom Iiwohnerrot. Dete isch er au vom Januar 2018 bis Januar 2020 Präsident vo de Gschäftsprüefigskommission gsi, 2020/21 Vizepräsident[5] und 2022/23 het er s Amt vom Iiwohnerrotpräsident inne.[6] Zudem isch er in zwei Wettiger Stiftigsröt und zwar in de Joseph und Franz Probst– und in de Familie Fluck–Bernhard Stiftig.[7] Es dritts Mandat het er im Stiftigsrot vo de Pensionskasse vo de Reformierte Landeschille Aargau gha, wo er vom 2017 bis zum Mai 2020 Präsident isch gsi.[8] Vom April 2014 bis zum November 2018 isch er im Verwaltigsrat vom Alterszentrum St. Bernhard gsi.[9] Er isch Mitgliid vo de EVP und vo August 2016 bis Februar 2022 Präsident vo de Regionalpartei Wettige–Limmattal gsi.[10] Über Wettige usse politisch wahrgnoh worde isch er durch e Petition, wo er lancierd hed un wo vom Bundesrot e Zuesicherig an de Edward Snowden gfordered het, dass er bin ere Ireis i d Schwiz Asyl däd übercho.[11][12][13] Bi de Grossrotswahle am 23. Oktober 2016 isch er uf em zweite Lischteplatz vo de EVP im Bezirk Bade gstande[14] und het en au verteidiged. Er isch nach em Rücktritt vo de Lilian Studer, wo am 20. Oktober 2019 in de Nationalrot gwählt worde isch, am 19. November 2019 in de Grossi Rot nochegrütscht.[15] Bi de Nationalrotswahl am 20. Oktober 2019 het er uf em 10. Lischteplatz vo de Hauptlischte vo de EVP kandidierd.[16] Bi de Aargauer Grossrotswahle vom 18. Oktober 2020 isch er widergwählt worde.
Weblink
Commons: Lutz Fischer – Sammlig vo Multimediadateie- Website vom Lutz Fischer-Lamprecht
- Portrait vom Lutz Fischer-Lamprecht uf de Homepage vo de Aargauer Landeschile
- Lutz Fischer-Lamprecht (Site cha nüme abgrüeft wärde; Suche im Webarchiv) uf de Website vom Iiwohnerrot Wettige
Fuessnoote
- ↑ Reformierte Presse 28. Augschte 2009
- ↑ Bericht von der Synode der Reformierten Landeskirche am 9. November 2011 in Aarau (Site cha nüme abgrüeft wärde; Suche im Webarchiv) Mediemitteilig uf ref-ag.ch vom 9. November 2011
- ↑ Die Aargauer Reformierten haben einen neuen Präsidenten (Memento vom 16. Jänner 2019 im Internet Archive) uf AZ-Online
- ↑ Lutz Fischer-Lamprecht isch de noi Präsident vo de Synode uf ref.ch
- ↑ «Lutz Fischer-Lamprecht und Christian Pauli sind die neuen Chefs» i de Limmatwelle vom 18. Dezember 2019
- ↑ «Ein reformierter Pfarrer ist neu der höchste Wettinger», im Badener Tagblatt vom 28. Januar 2022
- ↑ Kommissionverzeichnis vo de Gmeind Wettige (Memento vom 4. März 2016 im Internet Archive) (Stand Novämber 2011)
- ↑ Pensionskasse der Reformierten Landeskirche Aargau (Site cha nüme abgrüeft wärde; Suche im Webarchiv) Handelsregisteriitrag uf ag.chregister.ch
- ↑ Liste vo de Verwaltigsratsmitglieder (Memento vom 10. Septämber 2015 im Internet Archive) uf de Homepage vom Alterzentrum st-bernhard.ch
- ↑ «Bi de EVP hets geschter de aakünd Präsidiumswächsel geh» (Site cha nüme abgrüeft wärde; Suche im Webarchiv) uf wettiger-nochrichte.net
- ↑ AZ-Online: Aargauer Pfarrer fordert mit Petition Asyl für Whistleblower Snowden (Memento vom 13. Oktober 2015 im Internet Archive) Artikel vom 12. Oktober 2015
- ↑ 20 Minute: Aargauer Pfarrer fordert Asyl für Edward Snowden Artikel vom 13. Oktober 2015
- ↑ Südkurier: Pfarrer will Schweizer Asyl für Edward Snowden (Site cha nüme abgrüeft wärde; Suche im Webarchiv) Artikel vom 13. Oktober 2015
- ↑ S Kandidateportrait vom Lutz Fischer-Lamprecht (Memento vom 1. Novämber 2016 im Internet Archive) uf de Website vom Kanton Aargau ag.ch
- ↑ «Neue Grossräte für die Bezirke Baden und Zofingen» uf de Website vom Kanton Aargau. Abgruefen am 18. November 2019.
- ↑ Kandidatinnen und Kandidaten Liste 08a EVP uf de Website vom Kanton Aargau